త్వరలో జొన్నగిరి గని నుంచి పసిడి ఉత్పత్తి

ఆంధ్రప్రదేశ్‌లోని కర్నూలు జిల్లా జొన్నగిరిలో జియోమైసూర్ సర్వీసెస్, దక్కన్ గోల్డ్ మైన్స్ సంస్థలు సంయుక్తంగా అభివృద్ధి చేస్తున్న భారతదేశపు మొట్టమొదటి భారీ ప్రైవేట్ రంగ బంగారు గని త్వరలో ప్రారంభం కానుంది. ఇది భారత బంగారు గనుల రంగంలో ఒక చారిత్రక ఘట్టం కానుందని దక్కన్ గోల్డ్ మైన్స్ మేనేజింగ్ డైరెక్టర్ హనుమ ప్రసాద్ తెలిపారు. గత ఎనిమిది దశాబ్దాల్లో భారతదేశంలో ప్రారంభమైన మొదటి కొత్త బంగారు గని ఇదేనని ఆయన పేర్కొన్నారు.

సీఐఐ నిర్వహించిన ఇండియన్ మైనింగ్ సమ్మిట్ 2025లో ఆయన మాట్లాడుతూ, ‘గత 80 ఏళ్లలో మన దేశంలో ఒక్క బంగారు గని కూడా కొత్తగా ప్రారంభం కాలేదు. 1945లో బ్రిటిష్ కాలంలో కర్ణాటకలో చివరిసారిగా ఒక బంగారు గనిని స్థాపించారు. ఆ తర్వాత ఇప్పటి వరకూ ఏ కొత్త గని ప్రారంభం కాలేదు. మా సంస్థ ప్రారంభించబోయే గని మొట్టమొదటిది. ఇందులో దక్కన్ సంస్థకు మైనారిటీ వాటా ఉంది. ఇది చాలా త్వరగా కార్యరూపం దాల్చనుంది' అని వివరించారు. ఈ గని ప్రారంభం కావడం దేశ బంగారు గనుల పరిశ్రమకు ఒక చారిత్రక ఘట్టం అని ఆయన అభివర్ణించారు.

ఈ ప్రాజెక్ట్ భవిష్యత్తులో భారత బంగారు గనుల రంగంలో పెట్టుబడులను ఆకర్షించడానికి ఒక ఉత్ప్రేరకంగా పని చేస్తుందని, మరింత మంది పారిశ్రామికవేత్తలు ఈ రంగంలోకి రావడానికి స్ఫూర్తినిస్తుందని ప్రసాద్ ఆశాభావం వ్యక్తం చేశారు. అయితే, బంగారు తవ్వకం చాలా పెట్టుబడితో కూడుకున్నదని, అధిక ప్రమాదం ఉన్న పరిశ్రమ అని ఆయన హెచ్చరించారు. ‘దీనికి చాలా అన్వేషణ అవసరం, ఇందులో పెట్టే పెట్టుబడి అధిక ప్రమాదంతో కూడుకున్నది’ అని ఆయన అన్నారు. ప్రస్తుతం ప్రపంచవ్యాప్తంగా బంగారం ధరలు ఎక్కువగా ఉన్నప్పటికీ, ఈ రంగంలోకి ప్రవేశించే వారు ఇది చాలా శ్రమతో కూడిన పని అని, గణనీయమైన ప్రమాదాన్ని కలిగి ఉంటుందని స్పష్టంగా అర్థం చేసుకోవాలని సూచించారు.

ప్రస్తుతం భారతదేశం తన బంగారం అవసరాలలో 99 శాతం దిగుమతులపై ఆధారపడుతోంది. దేశీయంగా ఉన్న ఒకే ఒక్క గని నుంచి సుమారు 1.5 టన్నుల బంగారం మాత్రమే ఉత్పత్తి అవుతోంది. దిగుమతులపై ఇంతగా ఆధారపడటం ఆర్థికంగా సరికాదని ప్రసాద్ అభిప్రాయపడ్డారు. ‘బంగారం పెట్రోలియంలా వాడి అయిపోయే వస్తువు కాదు. అది ఇంట్లో ఒక ఆస్తిగా నిలిచిపోతుంది. కానీ దాన్ని దిగుమతి చేసుకోవడానికి మనం బిలియన్ల కొద్దీ డాలర్లు ఖర్చు చేస్తున్నాం’ అని ఆయన అన్నారు.

సరఫరాను సులభతరం చేయడానికి ప్రభుత్వం ఇటీవల దిగుమతి సుంకాలను తగ్గించినప్పటికీ, దేశీయ ఉత్పత్తిని పెంచడానికి విధాన సంస్కరణలు అవసరమని ఆయన అన్నారు. ‘బంగారు గనుల పరిశ్రమను పునరుద్ధరించడానికి ప్రభుత్వం చాలా సీరియస్‌గా ఉంది. అనేక బ్లాకులను వేలం వేశారు, కానీ అనుమతులు లభించినా, గనిని ఏర్పాటు చేయడానికి 6-7 సంవత్సరాలు పడుతుంది’ అని ఆయన తెలిపారు.

భవిష్యత్తుపై ఆశాభావం వ్యక్తం చేస్తూ, దక్కన్ గని కార్యకలాపాలు ప్రారంభమైతే అది భారత బంగారు గనుల పరిశ్రమకు ఒక కొత్త అధ్యాయానికి నాంది పలుకుతుందని హనుమ ప్రసాద్ అన్నారు. ‘ఈ ఏడాది నుంచి ఉత్పత్తిని ప్రారంభించాలని లక్ష్యంగా పెట్టుకున్నాం. వచ్చే ఏడాది నుంచి ఆదాయం రావడం మొదలవుతుందని భావిస్తున్నాం’ అని ప్రసాద్ చెప్పారు. కాగా ప్రారంభంలో జొన్నగిరి గని నుంచి ఏటా 750 కిలోల పసిడి ఉత్పత్తి చేయవచ్చని డీజీఎంఎల్‌ భావిస్తోంది. తర్వాత రెండు, మూడేళ్లలో ఇది వెయ్యి టన్నులకు చేరే అవకాశం ఉంది.