ఢిల్లీలో ఊపిరి పీల్చుకోనిస్తున్న గాలి..

దేశ రాజధాని ఢిల్లీలో గత మూడు రోజులుగా కొనసాగుతున్న ‘తీవ్రమైన’ వాయు కాలుష్య పరిస్థితి మంగళవారం ఉదయం స్వల్పంగా మెరుగుపడింది. నగర సగటు ఎయిర్ క్వాలిటీ ఇండెక్స్ 395 వద్ద నమోదవ్వడంతో, కాలుష్య స్థాయి ‘తీవ్రం’ నుంచి ‘చాలా దారుణం’ కేటగిరీకి పడిపోయింది.

కొనసాగుతున్న ప్రమాదం

గాలి నాణ్యతలో స్వల్ప మార్పు వచ్చినప్పటికీ, నగరంలోని పలు ప్రాంతాల్లో పరిస్థితి ఇంకా ఆందోళనకరంగానే ఉంది. మొత్తం మానిటరింగ్ కేంద్రాల్లో 23 స్టేషన్లు ఇంకా ‘తీవ్రమైన’ స్థాయిలోనే కాలుష్యాన్ని చూపుతున్నాయి. ముఖ్యంగా వజీర్‌పూర్ (445), ఆనంద్ విహార్ (444), జహంగీర్‌పురి (443) ప్రాంతాల్లో గాలి నాణ్యత అత్యంత దారుణంగా నమోదైంది.

గత మూడు రోజుల రికార్డు

గత శని, ఆది, సోమవారాల్లో ఎయిర్ క్వాలిటీ ఇండెక్స్ 400 మార్కును దాటి ‘తీవ్రమైన’ విభాగంలో కొనసాగింది. దీంతో కాలుష్య నియంత్రణ మండలి తక్షణమే స్పందించి, కఠినమైన ‘స్టేజ్ 4’ ఆంక్షలను అమలులోకి తెచ్చింది.

చలి పంజా.. పొగమంచు ముప్పు

కాలుష్యంతో పాటు చలి తీవ్రత కూడా ఢిల్లీ వాసులను వణికిస్తోంది. సఫ్దర్‌జంగ్ ప్రాంతంలో నగరంలోనే అత్యంత తక్కువగా 7.2 డిగ్రీల సెల్సియస్ కనిష్ట ఉష్ణోగ్రత నమోదైంది. పగటిపూట గరిష్ట ఉష్ణోగ్రత 24 డిగ్రీల వరకు ఉండవచ్చని, నగరవ్యాప్తంగా మోస్తరు పొగమంచు కమ్ముకుంటుందని వాతావరణ శాఖ తెలిపింది.

ఎయిర్ క్వాలిటీ వార్నింగ్ సిస్టమ్ అంచనా ప్రకారం.. రాబోయే రెండు రోజుల పాటు గాలి నాణ్యతలో పెద్దగా మార్పులు ఉండకపోవచ్చు. ఎయిర్ క్వాలిటీ ఇండెక్స్ ‘చాలా దారుణం’ కేటగిరీలోనే కొనసాగే అవకాశం ఉందని నిపుణులు హెచ్చరిస్తున్నారు.

ఢిల్లీలో వాయు కాలుష్యం 'తీవ్రం' స్థాయికి చేరుకున్నప్పుడు, గ్రేడెడ్ రెస్పాన్స్ యాక్షన్ ప్లాన్ కింద అత్యంత కఠినమైన 'స్టేజ్ 4' ఆంక్షలను అమలు చేస్తారు.

స్టేజ్ 4 కింద అమలు చేసే ప్రధాన ఆంక్షలు:

అత్యవసర వస్తువులను (పాలు, కూరగాయలు, మందులు) తీసుకువచ్చే వాహనాలు క్లీన్ ఫ్యూయల్ ట్రక్కులు మినహా, మిగిలిన ఏ భారీ వాహనాలను ఢిల్లీలోకి అనుమతించరు. ఢిల్లీ వెలుపల నమోదైన తక్కువ బరువున్న వాణిజ్య వాహనాలు కూడా నగరంలోకి ప్రవేశించడానికి వీల్లేదు (ఎలక్ట్రిక్ లేదా సిఎన్జి అయితే తప్ప).

రోడ్లు, ఫ్లైఓవర్లు, వంతెనలు, పవర్ లైన్లు, పైప్‌లైన్ల వంటి ప్రభుత్వ రంగ ప్రాజెక్టులతో సహా అన్ని రకాల నిర్మాణ పనులు, కూల్చివేత పనులను పూర్తిగా నిలిపివేయాలి. ఢిల్లీ, ఎన్సీఆర్ ప్రాంతాల్లో బిఎస్ -IV లేదా అంతకంటే తక్కువ ప్రమాణాలు కలిగిన డీజిల్ నాలుగు చక్రాల వాహనాల వినియోగాన్ని నిషేధిస్తారు. కాలుష్యం నుండి పిల్లలను రక్షించడానికి 6 నుండి 9 తరగతులు, 11వ తరగతి వరకు విద్యార్థులకు ఫిజికల్ క్లాసులు నిలిపివేసి, ఆన్‌లైన్ తరగతులు నిర్వహించాలని ప్రభుత్వం ఆదేశించవచ్చు. ప్రభుత్వ కార్యాలయాల్లో 50% మంది ఉద్యోగులు ఇంటి నుండే పని చేసేలా నిబంధనలు విధిస్తారు. ప్రైవేట్ కార్యాలయాలు కూడా ఇదే విధానాన్ని అనుసరించాలని సిఫార్సు చేస్తారు.

పరిస్థితి ఇంకా విషమిస్తే, సరి-బేసి వాహన నియమాన్ని అమలు చేయడం లేదా ఇతర అత్యవసర చర్యలు చేపట్టే అధికారం ప్రభుత్వానికి ఉంటుంది. ఈ ఆంక్షలు అమలులో ఉన్నప్పుడు ప్రజలు అనవసరంగా బయటకు రాకూడదని, ముఖ్యంగా వృద్ధులు మరియు శ్వాసకోశ సమస్యలు ఉన్నవారు జాగ్రత్తగా ఉండాలని సూచిస్తారు.