డ్రగ్స్‌ పడవలపై అమెరికా దాడులు.. 11 మంది మృతి

అంతర్జాతీయ జలాల్లో మాదకద్రవ్యాల అక్రమ రవాణాను అడ్డుకునేందుకు అమెరికా సైన్యం చేపట్టిన దాడులు తీవ్రరూపం దాల్చాయి. లాటిన్ అమెరికా తీర ప్రాంతాల్లో డ్రగ్స్ రవాణా చేస్తున్నాయనే ఆరోపణలతో మూడు పడవలపై అమెరికా దళాలు విరుచుకుపడ్డాయి. సోమవారం రాత్రి జరిగిన ఈ దాడుల్లో మొత్తం 11 మంది ప్రాణాలు కోల్పోయారు. ట్రంప్ ప్రభుత్వం గత ఏడాది సెప్టెంబర్ నుండి ప్రారంభించిన ఈ ప్రత్యేక ఆపరేషన్‌లో భాగంగా జరిగిన భీకర దాడుల్లో ఇది ఒకటిగా నిలిచింది.

ఎక్కడెక్కడ దాడులు జరిగాయంటే?

అమెరికా సదరన్ కమాండ్ వెల్లడించిన వివరాల ప్రకారం.. డ్రగ్స్ రవాణాకు ఎక్కువగా ఉపయోగించే మార్గాల్లోనే ఈ దాడులు జరిగాయి. తూర్పు పసిఫిక్ మహాసముద్రంలో ప్రయాణిస్తున్న రెండు పడవలపై దాడులు చేయగా, ఒక్కో పడవలో ఉన్న నలుగురు చొప్పున ఎనిమిది మంది చనిపోయారు. అదే సమయంలో కరేబియన్ సముద్రంలో మరో పడవను లక్ష్యంగా చేసుకుని చేసిన దాడిలో ముగ్గురు మరణించారు. ఈ ఐదు నెలల కాలంలో ఇప్పటివరకు మొత్తం 42 సార్లు ఇటువంటి దాడులు జరగగా, మృతుల సంఖ్య 145కి చేరింది.

ఆధారాలపై సందేహాలు.. సైన్యం వివరణ

ఈ పడవల్లో నిజంగానే మాదకద్రవ్యాలు ఉన్నాయా అనే విషయానికి సంబంధించి అమెరికా సైన్యం ఎటువంటి నిర్దిష్ట ఆధారాలను బయటపెట్టలేదు. కేవలం పడవలు సముద్రంలో పేలిపోతున్న వీడియోలను మాత్రమే విడుదల చేసింది. పట్టుబడిన వారిని గతంలో సాధారణ నేరస్తుల్లా చూసేవారు, కానీ ఇప్పుడు వారిని 'నార్కో టెర్రరిస్టులు' అని పిలుస్తూ అమెరికా సైన్యం నేరుగా క్షిపణి దాడులతో అంతమొందిస్తోంది.

యుద్ధంగా అభివర్ణించిన ట్రంప్

ఈ దాడులను అధ్యక్షుడు డొనాల్డ్ ట్రంప్ గట్టిగా సమర్థించుకుంటున్నారు. లాటిన్ అమెరికాలోని డ్రగ్ కార్టెళ్లతో అమెరికా ప్రస్తుతం ఒక 'సాయుధ పోరాటం' చేస్తోందని ఆయన ప్రకటించారు. దేశంలోకి డ్రగ్స్ ప్రవాహాన్ని అడ్డుకోవాలంటే ఇటువంటి కఠిన చర్యలు తప్పవని ఆయన వాదిస్తున్నారు. అయితే ఎటువంటి యుద్ధ ప్రకటన లేకుండా ఇలా మనుషులను చంపడంపై విమర్శలు వస్తున్నప్పటికీ, ప్రభుత్వం మాత్రం తన పంథాను మార్చుకోవడం లేదు.