డెన్మార్క్ ఓపెన్: టైటిల్పై సాత్విక్ జోడీ గురి
ప్రపంచ బ్యాడ్మింటన్ సమాఖ్య (బీడబ్ల్యూఎఫ్) వరల్డ్ టూర్ సూపర్ 750 టోర్నమెంట్ అయిన ప్రతిష్టాత్మక డెన్మార్క్ ఓపెన్ కోసం భారత షట్లర్లు సిద్ధమయ్యారు. నేటి నుండి ప్రారంభమయ్యే ఈ టోర్నీలో భారత పురుషుల డబుల్స్ స్టార్ జోడీ సాత్విక్ సాయిరాజ్ రంకిరెడ్డి - చిరాగ్ శెట్టి ఈ సీజన్లో తమ తొలి టైటిల్ను గెలవాలనే లక్ష్యంతో బరిలోకి దిగనున్నారు.
సాత్విక్-చిరాగ్పైనే అందరి దృష్టి
ఈ ఏడాదిలో సాత్విక్-చిరాగ్ జోడీ అద్భుతమైన ప్రదర్శన కనబరుస్తున్నప్పటికీ, టైటిల్ గెలవడంలో మాత్రం చివరి మెట్టుపై విఫలమవుతున్నారు. ఇటీవల జరిగిన హాంకాంగ్ ఓపెన్, చైనా మాస్టర్స్ సూపర్ 750 టోర్నమెంట్లలో ఫైనల్స్కు చేరుకున్నారు. అలాగే వరల్డ్ ఛాంపియన్షిప్స్లో కాంస్య పతకాన్ని కూడా సాధించారు. సెమీ ఫైనల్స్లో పలుమార్లు మెరుగైన ప్రదర్శన చేసిన ఈ జోడీ, డెన్మార్క్ ఓపెన్లో తమ విజయ పరంపరను టైటిల్గా మలచుకోవాలని ఉవ్విళ్లూరుతున్నారు.
ఆరో సీడ్గా బరిలోకి దిగుతున్న ఈ భారత జోడీ, తమ తొలి రౌండ్లో స్కాట్లాండ్కు చెందిన క్రిస్టోఫర్ గ్రిమ్లీ, మాథ్యూ గ్రిమ్లీ జోడీతో తలపడనుంది. గాయాలు, ఇతర వ్యక్తిగత సమస్యల కారణంగా కొంత విరామం తీసుకున్నప్పటికీ, వారు ప్రపంచంలోని అత్యుత్తమ జట్లకు గట్టి పోటీని ఇస్తున్నారు.
టోర్నీలో పాల్గొనే ఇతర భారత ఆటగాళ్లు
పురుషుల సింగిల్స్ విభాగంలో ప్రపంచ ర్యాంకింగ్స్లో 19వ స్థానంలో ఉన్న లక్ష్యసేన్ ఐర్లాండ్కు చెందిన నట్ న్గుయెన్తో తన పోరాటాన్ని మొదలుపెట్టనున్నాడు. హాంకాంగ్ సూపర్ 500లో రన్నరప్గా నిలిచి ఫామ్ను తిరిగి పొందిన లక్ష్య సేన్, ఈ టోర్నీలో అదే దూకుడును కొనసాగించాలని చూస్తున్నాడు. అలాగే ఈ ఏడాది యూఎస్ ఓపెన్ సూపర్ 300 టైటిల్ను గెలిచిన ప్రపంచ 28వ ర్యాంకర్ ఆయుష్ శెట్టి, ఫ్రాన్స్కు చెందిన టోమా జూనియర్ పోపోవ్తో తలపడతాడు. ఇక మహిళల సింగిల్స్ విభాగానికి వస్తే, ఆర్కిటిక్ ఓపెన్లో తన తొలి సూపర్ 500 సెమీ ఫైనల్కు చేరుకున్న యువ షట్లర్ అన్మోల్ ఖర్బ్, తొలి రౌండ్లో ఇండోనేషియాకు చెందిన ఏడో సీడ్ పుత్రి కుసుమా వార్దానీతో తలపడనుంది.
పురుషుల డబుల్స్ విభాగంలో పృథ్వీ కృష్ణమూర్తి రాయ్-సాయి ప్రతీక్ జోడీ చైనీస్ తైపీకి చెందిన లియు కుయాంగ్ హెంగ్-యాంగ్ పో హాన్లతో తలపడుతుంది. మహిళల డబుల్స్లో రుతపర్ణ పాండా-శ్వేతపర్ణ పాండా, అలాగే కవిప్రియ సెల్వం-సిమ్రాన్ సింగ్ జంటలు కూడా బరిలో ఉన్నాయి. మిక్స్డ్ డబుల్స్లో మోహిత్/లక్షిత జాగ్లాన్, రోహన్ కపూర్/రుత్విక శివాని, ధ్రువ్ కపిల/తనిషా క్రాస్టో జంటలు కూడా ఈ టోర్నీలో తమ సత్తా చాటాలని చూస్తున్నాయి. భారత షట్లర్లు ఈ డెన్మార్క్ ఓపెన్లో అగ్రశ్రేణి ఆటగాళ్లకు గట్టి పోటీనిచ్చి, మెరుగైన ఫలితాలు సాధించాలని భారత అభిమానులు కోరుకుంటున్నారు.
టైటిల్ విజేతలుగా భారత షట్లర్లు
డెన్మార్క్ ఓపెన్ చరిత్రలో భారతీయ షట్లర్లు ఇప్పటివరకు మూడు సింగిల్స్ టైటిళ్లను గెలుచుకున్నారు. 1980లో పురుషుల సింగిల్స్ విభాగంలో టైటిల్ గెలిచిన మొట్టమొదటి భారతీయుడు ప్రకాష్ పదుకొనే. ఆయన తర్వాత 2017లో ఫైనల్లో కొరియాకు చెందిన లీ హ్యూన్ ఇల్ను ఓడించి కిదాంబి శ్రీకాంత్ టైటిల్ గెలిచాడు. ఇది శ్రీకాంత్కు ఆ సీజన్లో మూడవ సూపర్ సిరీస్ టైటిల్గా నిలిచింది. 2012లో మహిళల సింగిల్స్ విభాగంలో ఫైనల్ పోరులో జర్మనీకి చెందిన జూలియానె షెంక్ను ఓడించి సైనా నెహ్వాల్ ఈ టైటిల్ను గెలుచుకుంది. ఈ టోర్నీ గెలిచిన మొదటి భారతీయ మహిళా షట్లర్ కూడా ఆమెనే. ప్రస్తుతం సాత్విక్-చిరాగ్ జోడీ ఈ టోర్నీలో డబుల్స్ టైటిల్ గెలిచిన మొట్టమొదటి భారతీయ జోడీగా చరిత్ర సృష్టించాలని లక్ష్యంగా పెట్టుకుంది. గతంలో ఎవరూ డబుల్స్ విభాగంలో టైటిల్ గెలవలేదు. కాబట్టి ఈ జోడీ టోర్నీలో అద్భుత ప్రదర్శన చేసి టైటిల్ను గెలవాలని భారత అభిమానులు ఆశిస్తున్నారు.