డిసెంబర్ 9-14 వరకు టెన్నిస్ ప్రీమియర్ లీగ్ సీజన్ 7
చాలా కాలంగా ఎదురుచూస్తున్న టెన్నిస్ ప్రీమియర్ లీగ్ సీజన్ 7, క్లియర్ ప్రీమియం వాటర్ సహకారంతో, ఈరోజు గుజరాత్ యూనివర్సిటీ టెన్నిస్ స్టేడియంలో వైభవంగా ప్రారంభం కానుంది. డిసెంబర్ 9 నుండి 14వ తేదీ వరకు ఆరు రోజుల పాటు సాగే ఈ టోర్నమెంట్లో, ఎనిమిది జట్లు అత్యంత వేగవంతమైన, విప్లవాత్మక ఫార్మాట్లో ప్రతిష్టాత్మకమైన కప్పు కోసం హోరాహోరీగా పోటీపడనున్నాయి.
ఈ టెన్నిస్ పండుగకు భారత టెన్నిస్ దిగ్గజాలైన లియాండర్ పేస్, సానియా మీర్జా, మహేష్ భూపతి మద్దతు పలకడం విశేషం. ఈ ఎడిషన్ దేశంలోని అత్యుత్తమ ప్రతిభావంతులతో పాటు, ప్రపంచ ర్యాంకింగ్స్లో టాప్ 50లో ఉన్న అంతర్జాతీయ తారలను ఆకర్షించింది. ప్రతి ఫ్రాంచైజీకి జట్టు ప్రచారాన్ని నడిపించడానికి ఒక మార్క్యూ ప్లేయర్ను కేటాయించారు. అలాగే, అభిమానులను ఆకర్షించడానికి గ్లామర్ను పెంచడానికి ప్రముఖ సెలబ్రిటీ అంబాసిడర్లు కూడా జట్లలో భాగమయ్యారు.
టీపీఎల్ ఫార్మాట్ ప్రత్యేకమైనది: ప్రతి మ్యాచ్ నాలుగు రౌండ్లను కలిగి ఉంటుంది, అవి మహిళల సింగిల్స్, మిక్స్డ్ డబుల్స్, పురుషుల సింగిల్స్ ,పురుషుల డబుల్స్. ప్రతి రౌండ్కు 25 పాయింట్లు లభిస్తాయి, కాబట్టి ప్రతి మ్యాచ్ మొత్తం 100 పాయింట్ల విలువైనదిగా మారుతుంది. డిసెంబర్ 9 నుండి 13 వరకు జట్లు మొత్తం ఐదు లీగ్ మ్యాచ్లు ఆడతాయి. వాటిలో అత్యధిక పాయింట్లు సాధించిన టాప్ నాలుగు జట్లు సెమీ-ఫైనల్కు చేరుకుంటాయి. ఫైనల్ మ్యాచ్ డిసెంబర్ 14న జరుగుతుంది.
వివిధ జట్ల వివరాలు చూస్తే, రెండుసార్లు గ్రాండ్ స్లామ్ విజేత రోహన్ బోపన్న SG పైపర్స్కు నాయకత్వం వహిస్తున్నారు. ఆయనతో పాటు శ్రీవల్లి భామిడిపాటి, రామకుమార్ రామనాథన్ ఉన్నారు. రాజస్థాన్ రేంజర్స్ ఇటలీకి చెందిన లుసియానో డార్డెరి (ప్రపంచ ర్యాంక్ 26), రష్యాకు చెందిన అనస్తాసియా గసనోవా , ధక్షిణేశ్వర్ సురేష్పై ఆధారపడనుంది. గుర్గావ్ గ్రాండ్స్లామర్స్లో బ్రిటన్ ఆటగాడు డేనియల్ ఎవాన్స్ (కెరీర్-హై ర్యాంక్ 21), భారత నంబర్ వన్ మహిళా ప్లేయర్ సహజ యమలపల్లి,శ్రీరామ్ బాలాజీ ఉన్నారు.
ఇక ఇతర బలమైన జట్లను పరిశీలిస్తే, గుజరాత్ పాంథర్స్కు ఫ్రాన్స్కు చెందిన అలెగ్జాండర్ ముల్లర్ (ప్రపంచ ర్యాంక్ 42) నాయకత్వం వహిస్తున్నారు. డిఫెండింగ్ ఛాంపియన్ అయిన హైదరాబాద్ స్ట్రైకర్స్కు రకుల్ ప్రీత్ సింగ్ సెలబ్రిటీ అంబాసిడర్గా వ్యవహరిస్తున్నారు. స్పెయిన్ ఆటగాడు పెడ్రో మార్టినెజ్ , డబుల్స్ వెటరన్ విష్ణువర్ధన్పై ఈ జట్టు భారీ ఆశలు పెట్టుకుంది. జీఎస్ ఢిల్లీ ఏసెస్లో బ్రిటన్కు చెందిన బిల్లీ హారిస్ (ప్రపంచ ర్యాంక్ 4), బెల్జియం ప్లేయర్ సోఫియా కోస్టౌలాస్ వంటి వారు ఉన్నారు. చెన్నై స్మాషర్స్ చెక్ రిపబ్లిక్కు చెందిన దాలిబోర్ స్విర్చినా ,రోమానియాకు చెందిన ఇరినా బారాలపై దృష్టి పెట్టింది.
టాప్-50 ఏటీపీ ఆటగాళ్లు అహ్మదాబాద్కు చేరుకోవడంతో, సీజన్ 7 నాన్స్టాప్, అత్యుత్తమ నాణ్యత గల టెన్నిస్ను అందిస్తుందని టీపీఎల్ సహ వ్యవస్థాపకులు కునాల్ ఠాకూర్ , మృణాల్ జైన్ ధీమా వ్యక్తం చేశారు. ఆరు రోజుల పాటు అద్భుతమైన మ్యాచ్లు, స్టార్లతో కూడిన జట్లు,ఎలక్ట్రిఫైయింగ్ పోటీని అభిమానులు చూడవచ్చని వారు తెలిపారు. ఈ సీజన్ అద్భుతమైన టెన్నిస్ యాక్షన్కు వేదిక కానుంది.