ట్రేడ్ డీల్ చారిత్రకమైనది: అమిత్ షా
భారత్–అమెరికా మధ్య కుదిరిన వాణిజ్య ఒప్పందాన్ని కేంద్ర హోంమంత్రి అమిత్ షా చారిత్రకమైనదిగా అభివర్ణించారు. ఈ ఒప్పందం రెండు దేశాల మధ్య వ్యూహాత్మక భాగస్వామ్యాన్ని మరింత ఉన్నత స్థాయికి తీసుకెళ్లడమే కాకుండా, బలమైన వాణిజ్య సంబంధాలు, పరస్పర వృద్ధికి దారితీస్తుందని ఆయన పేర్కొన్నారు.
అమిత్ షా ‘ఎక్స్’వేదికగా చేసిన వరుస పోస్టుల్లో ఈ ఒప్పందం భారత యువత, పారిశ్రామికవేత్తలు, టెక్నాలజీ రంగంలో ఉన్న వారికి అంతులేని అవకాశాలకు ద్వారాలు తెరుస్తుందని అన్నారు. 18 శాతానికి తగ్గించిన టారిఫ్తో భారత్–అమెరికా వాణిజ్య ఒప్పందం ఖరారైన సందర్భంగా ఇది భారత్–అమెరికా సంబంధాలకు గొప్ప రోజు. బలమైన వాణిజ్య బంధాలు, పరస్పర వృద్ధికి ఇది మార్గం సుగమం చేస్తుందని ఆయన పేర్కొన్నారు. ఈ చారిత్రక ఒప్పందానికి ప్రధాని నరేంద్ర మోడీ, అమెరికా అధ్యక్షుడు డొనాల్డ్ ట్రంప్లకు షా అభినందనలు తెలిపారు. ఈ ఒప్పందం మా వ్యూహాత్మక భాగస్వామ్యాన్ని మరింత బలోపేతం చేస్తుంది. రెండు దేశాలకు, ప్రజలకు ఎంతో లాభం చేకూరుస్తుంది. భారత్–అమెరికా మధ్య వ్యాపారం మరింత వికసిస్తుందని ఆయన అన్నారు.
ఈ వాణిజ్య ఒప్పందం భారతదేశంలోని సూక్ష్మ, చిన్న, మధ్యతరహా పరిశ్రమలకు (ఎంఎస్ఎంఈ) కొత్త ఊపునిస్తుందని, చిన్న పరిశ్రమల గ్లోబల్ పోటీ సామర్థ్యాన్ని పెంచుతుందని అమిత్ షా స్పష్టం చేశారు. ఉద్యోగావకాశాలు పెరుగుతాయి, కొత్త సరఫరా వ్యవస్థలో భారత సంస్థలకు స్థానం లభిస్తుంది, పెట్టుబడులు, రుణ ప్రవాహం మెరుగుపడుతుందన్నారు. భారత్–అమెరికా ఒప్పందం ప్రకారం, భారత ఉత్పత్తులపై అమెరికా విధించే పరస్పర టారిఫ్ను మొత్తం 50 శాతం నుంచి 18 శాతానికి తగ్గించేందుకు వాషింగ్టన్ అంగీకరించింది.
ఈ ముందడుగు దేశంలోని చిన్న పారిశ్రామికవేత్తలకు నేరుగా లాభం చేకూరుస్తుంది. ఈ కీలక నిర్ణయానికి మోదీ జీకి కృతజ్ఞతలు అని పేర్కొన్నారు. సాఫ్ట్వేర్, సేవల రంగాల్లో భారత్కు కొత్త శక్తిని అందిస్తూ, ఈ ఒప్పందం దేశాన్ని మరో ఆర్థిక బూమ్ దిశగా నడిపిస్తుందని ఆయన అన్నారు. అమెరికా అధ్యక్షుడు ట్రంప్ ఈ ఒప్పందాన్ని ప్రకటించిన అనంతరం ప్రధాని మోడీ ధన్యవాదాలు తెలిపారు. అధికారుల ప్రకారం, ఈ ఒప్పందంతో భారత్కు ఇతర ఎగుమతి దేశాల కంటే తక్కువ టారిఫ్ లభించింది. ఇండోనేషియాకు 19 శాతం, వియత్నామ్, బంగ్లాదేశ్కు 20 శాతం, చైనాకు 34 శాతం టారిఫ్లు ఉన్నాయని వారు పేర్కొన్నారు.
గత టారిఫ్ పరిస్థితి, ఇప్పుడు కొత్తగా వచ్చే అవకాశాలు
భారత్ –యునైటెడ్ స్టేట్స్ మధ్య వచ్చిన తాజా వాణిజ్య ఒప్పందం దేశంలో పెద్ద చర్చకు దారితీస్తోంది. ఈ ఒప్పందం ఎందుకు అవసరమైందో, గతంలో టారిఫ్ లేని సమయంలో పరిస్థితి ఎలా ఉండేదో, ఇప్పుడు యువత, పారిశ్రామికవేత్తలకు కొత్త అవకాశాలు ఎందుకు కలుగుతాయో స్పష్టమైన వివరణ ప్రజలకు తెలుస్తోంది. కొంతకాలంగా భారత్-యుఎస్ మధ్య వాణిజ్య సంబంధాలలో తారతమ్యం ఉండేది. ట్రంప్ హయాంలో అమెరికా భారత్ ఉత్పత్తులపై టారిఫ్ను పెంచింది. సాధారణంగా భారత్ నుంచి అమెరికాకి వస్తువులు పంపించే పరిశ్రమలు పెరిగిన టారిఫ్ భారంతో, ఖర్చు ఎక్కువై పోవడంతో, ఉత్పత్తులు తక్కువగా అమ్మేసే పరిస్థితి వచ్చింది.
గతంలో టారిఫ్ లేకపోతే ఏమైందో?
తూర్పు-పశ్చిమ ఆర్థిక వ్యవస్థల పరిణామం ప్రారంభమైన తరువాత భారత వ్యాపారాలు వేగంగా అంతర్జాతీయ మార్కెట్లలోకి ప్రవేశించాయి. కానీ గతంలో యుఎస్ మార్కెట్లో టారిఫ్లు తక్కువగా ఉన్నప్పటికీ, అనేక చిన్న వ్యాపారాలు నేరుగా అమెరికా ఖాతాదారులతో సంబంధాలు ఏర్పరచలేకపోయాయి. పెద్ద ఐటీ, ఫార్మా సంస్థలు విజయం సాధించగా, ఎంఎస్ఎంఈలు, చిన్న ఉత్పత్తిదారులు మాత్రం ప్రత్యక్ష ప్రయోజనం పెద్దగా పొందలేకపోయారు. కానీ ఈ వాణిజ్య ఒప్పందం ద్వారా అమెరికా-భారత టారిఫ్ను 50 శాతం నుంచి 18 శాతం వరకు తగ్గించినప్పుడు, దేశీయ పరిశ్రమలకు గ్లోబల్ మార్కెట్లలో పోటీ అవకాశం మెరుగుపడుతోంది.