ట్రంప్ 'బోర్డ్ ఆఫ్ పీస్' ఆహ్వానాన్ని తిరస్కరించిన స్పెయిన్
స్విట్జర్లాండ్లోని దావోస్లో జరిగిన వరల్డ్ ఎకనామిక్ ఫోరమ్ సదస్సులో ట్రంప్ తన 'బోర్డ్ ఆఫ్ పీస్'ను అధికారికంగా ప్రారంభించారు. ఈ మండలిలో సభ్య దేశంగా చేరాలని స్పెయిన్కు కూడా ఆహ్వానం అందింది. అయితే బ్రస్సెల్స్లో జరిగిన యూరోపియన్ యూనియన్ (ఈయూ) సమావేశం అనంతరం స్పెయిన్ ప్రధాని సాంచెజ్ విలేకరులతో మాట్లాడుతూ, "మీ ఆహ్వానానికి ధన్యవాదాలు, కానీ మేము ఇందులో చేరలేము" అని కుండబద్దలు కొట్టారు.
నిరాకరించడానికి గల కారణాలు ఇవే
ట్రంప్ ప్రతిపాదించిన 'బోర్డ్ ఆఫ్ పీస్'లో చేరడానికి స్పెయిన్ ప్రధానంగా మూడు కీలక కారణాలను చూపుతూ నిరాకరించింది. మొదటిది, అంతర్జాతీయ సమస్యల పరిష్కారానికి ఐక్యరాజ్యసమితి వంటి అనేక దేశాలతో కూడిన ఉమ్మడి వేదికలే అత్యంత ప్రామాణికమని, ఈ కొత్త బోర్డు ఐరాసకు వెలుపల ఉండటం సరికాదని స్పెయిన్ ప్రధాని అభిప్రాయపడ్డారు. రెండోది, ఈ మండలిలో ఇజ్రాయెల్కు చోటు కల్పించి పాలస్తీనా అథారిటీని పక్కన పెట్టడం పక్షపాత ధోరణిగా వారు భావిస్తున్నారు. చివరగా కేవలం అంతర్జాతీయ చట్టాలు, నిబంధనలకు కట్టుబడి ఉండాలనే నిబద్ధతతోనే, అమెరికా ఆహ్వానాన్ని సున్నితంగా తిరస్కరిస్తున్నట్లు స్పెయిన్ ప్రభుత్వం స్పష్టం చేసింది.
ట్రంప్ 'బోర్డ్ ఆఫ్ పీస్'లో ఎవరున్నారు? ఎవరు లేరు?
మద్దతు ఇస్తున్న దేశాలు:
ఇజ్రాయెల్, సౌదీ అరేబియా, యునైటెడ్ అరబ్ ఎమిరేట్స్, ఖతార్, ఈజిప్ట్, టర్కీ, జోర్డాన్, పాకిస్థాన్, ఇండోనేషియా, హంగేరీ, బల్గేరియా, అర్జెంటీనా, మొరాకో, అజర్బైజాన్, అర్మేనియా, కజకిస్థాన్, బెలారస్, వియత్నాం, అల్బేనియా
తిరస్కరించిన దేశాలు:
స్పెయిన్, ఫ్రాన్స్, నార్వే, స్వీడన్, స్లోవేనియా, చైనా, కెనడా (కెనడాకు పంపిన ఆహ్వానాన్ని ట్రంప్ స్వయంగా ఉపసంహరించుకున్నారు)
నిర్ణయం తీసుకోని దేశాలు:
భారత్, రష్యా, జర్మనీ, బ్రిటన్, బ్రెజిల్, ఇటలీ, జపాన్, ఆస్ట్రేలియా, సౌత్ కొరియా, సింగపూర్, థాయిలాండ్, నెదర్లాండ్స్.