టుక్డే గ్యాంగ్కు టీఎంసీ మద్దతు: ప్రధాని మోడీ
పశ్చిమ బెంగాల్లో జరుగుతున్న అసెంబ్లీ ఎన్నికల ప్రచారంలో భాగంగా ప్రధాని నరేంద్రమోడీ శనివారం సిలిగురిలో జరిగిన బహిరంగ సభలో తృణమూల్ కాంగ్రెస్ (టీఎంసీ)పై తీవ్ర విమర్శలు చేశారు. ఆదివారం సిలిగురి కవాఖాలి మైదానంలో జరిగిన సభలో ఆయన మాట్లాడుతూ టుక్డే-టుక్డే గ్యాంగ్ సిలిగురి కారిడార్ను విభజించేందుకు ప్రయత్నం చేసిందని ఆరోపించారు. ఆ గ్యాంగ్కు టీఎంసీ పార్లమెంట్ నుంచి వీధుల వరకు మద్దతు ఇచ్చిందని ఆయన వ్యాఖ్యానించారు.
సిలిగురి కారిడార్పై వ్యాఖ్యలు
సిలిగురి కారిడార్ (చికెన్నెక్) దేశానికి అత్యంత వ్యూహాత్మక ప్రాంతమని పేర్కొన్న ప్రధాని, దీనిని దేశ భద్రత, ఆర్థిక అభివృద్ధికి కీలక మార్గంగా అభివర్ణించారు. ఈ ప్రాంతాన్ని బలోపేతం చేసేందుకు కేంద్ర ప్రభుత్వం అనేక ప్రాజెక్టులు చేపడుతోందని తెలిపారు. సిక్కిం–సిలిగురి మధ్య నిర్మాణంలో ఉన్న సెవోక్–రంగ్పో రైల్వే లైన్ ద్వారా వాణిజ్యం, పర్యాటక రంగాలు అభివృద్ధి చెందుతాయని ఆయన అన్నారు.
టీఎంసీపై తీవ్ర ఆరోపణలు
టీఎంసీ ప్రభుత్వం బుజ్జగింపు రాజకీయాలు చేస్తోందని ఆరోపించిన మోడీ, అది రాష్ట్ర అభివృద్ధిని అడ్డుకుంటోందని అన్నారు. టీఎంసీ 15 ఏళ్ల పాలనలో రాష్ట్రానికి నష్టం జరిగిందని ఆయన వ్యాఖ్యానించారు. అంతేకాకుండా, మతపరమైన విద్యా సంస్థల (మదర్సాల) అభివృద్ధికి పెద్ద మొత్తంలో నిధులు కేటాయించగా, ఉత్తర బెంగాల్ అభివృద్ధికి సరిపడ నిధులు ఇవ్వలేదని ఆరోపించారు.
అభివృద్ధి హామీలు
బీజేపీ అధికారంలోకి వస్తే ఉత్తర బెంగాల్ కోసం ప్రత్యేక అభివృద్ధి ప్యాకేజీ ఇస్తామని హామీ ఇచ్చారు. ఇందులో భాగంగా ఆధునిక ఇంజినీరింగ్, మెడికల్ కాలేజీలు, క్యాన్సర్ ఆసుపత్రి, ఫ్యాషన్ డిజైన్ ఇనిస్టిట్యూట్ వంటి ప్రాజెక్టులు ఉంటాయని తెలిపారు. నియంత్రణ లేని అక్రమ వలసల వల్ల స్థానిక ఉద్యోగాలు దెబ్బతింటున్నాయని, సామాజిక సమతౌల్యం భంగం అవుతోందని ఆయన ఆరోపించారు. ఈ సమస్యను అరికట్టేందుకు ప్రజలు బీజేపీకి ఓటు వేయాలని కోరారు.
కేంద్ర ప్రాజెక్టులు
పోర్బందర్–సిల్చర్ ఈస్ట్–వెస్ట్ కారిడార్ వంటి కీలక ప్రాజెక్టులు బెంగాల్లో ఆలస్యం అవుతున్నాయని మోడీ పేర్కొన్నారు. రాష్ట్ర ప్రభుత్వం సహకరించకపోవడం వల్ల అభివృద్ధి పనులు నిలిచిపోయాయని ఆయన ఆరోపించారు. బీజేపీకి అవకాశం ఇవ్వండి, బెంగాల్లో అభివృద్ధి, ఉద్యోగాలు, భద్రత తిరిగి తీసుకువస్తామని ప్రధాని అన్నారు. రాష్ట్రంలో భయం నుంచి నమ్మకమైన వాతావరణం తీసుకువస్తామని ఆయన హామీ ఇచ్చారు. ఏప్రిల్ 23న తొలి దశ పోలింగ్ జరగనుండగా, ఏప్రిల్ 29న రెండో దశ పోలింగ్, మే 4న ఓట్ల లెక్కింపు జరగనుంది.