టీ20 ప్రపంచకప్: శతక్కొట్టిన హ్యారీ బ్రూక్.. సెమీస్‌కు ఇంగ్లాండ్

టీ20 ప్రపంచకప్‌లో భాగంగా మంగళవారం పాకిస్థాన్‌తో జరిగిన కీలక పోరులో ఇంగ్లండ్ జట్టు రెండు వికెట్ల తేడాతో విజయం సాధించింది. 165 పరుగుల లక్ష్య ఛేదనలో ఇంగ్లండ్ ఆదిలోనే 35/3, ఆ తర్వాత 58/4తో కష్టాల్లో ఉన్నప్పటికీ, కెప్టెన్ హ్యారీ బ్రూక్ (100; 51 బంతుల్లో) తన కెరీర్‌లోనే అత్యుత్తమ ఇన్నింగ్స్‌ను ఆడి జట్టును సెమీస్‌లోకి తీసుకెళ్లాడు. పాకిస్థాన్ పేసర్ షాహీన్ షా అఫ్రిది (4/30) వికెట్లతో చెలరేగినా, బ్రూక్ మాత్రం మొక్కవోని ధైర్యంతో 10 ఫోర్లు, 4 సిక్సర్లతో ప్రత్యర్థి బౌలర్లను ఉతికి ఆరేశాడు.

వ్యూహాత్మక ఇన్నింగ్స్

మూడో స్థానంలో బ్యాటింగ్‌కు వచ్చిన బ్రూక్, ఆచితూచి ఆడుతూనే స్పిన్నర్లను లక్ష్యంగా చేసుకున్నాడు. సయీమ్ అయూబ్, మహమ్మద్ నవాజ్, షాదాబ్ ఖాన్‌ల బౌలింగ్‌లో అద్భుతమైన ఫుట్‌వర్క్‌తో పరుగుల వరద పారించాడు. మైదానం పరిమాణాన్ని దృష్టిలో ఉంచుకుని, 13 సార్లు రెండు పరుగులు తీయడం ద్వారా స్కోరు బోర్డును పరుగులు పెట్టించాడు. ముఖ్యంగా నవాజ్ బౌలింగ్‌లో 17 పరుగులు రాబట్టిన ఓవర్ మ్యాచ్‌కు ఊపిరి పోసింది. విల్ జాక్స్ (28)తో కలిసి ఐదో వికెట్‌కు 52 పరుగుల భాగస్వామ్యాన్ని నెలకొల్పి మ్యాచ్‌ను ఇంగ్లండ్ వైపు తిప్పాడు. చివరలో జోఫ్రా ఆర్చర్ విజయాన్ని ఖాయం చేయడంతో, ఇంగ్లండ్ సెమీస్ బెర్తును దక్కించుకుంది.

నిరాశ పరిచిన పాక్ బ్యాటింగ్

అంతకుముందు బ్యాటింగ్‌కు దిగిన పాకిస్థాన్ జట్టు, సాహిబ్జాదా ఫర్హాన్ (63; 45 బంతుల్లో) అర్ధశతకంతో నిర్ణీత ఓవర్లలో 164/9 స్కోరును నమోదు చేసింది. స్పిన్నర్ లియామ్ డాసన్ (3/24) కట్టుదిట్టమైన బౌలింగ్‌తో పాక్ బ్యాటర్లను కట్టడి చేశాడు. 18వ ఓవర్‌లో డాసన్ వరుస వికెట్లతో పాకిస్థాన్ భారీ స్కోరు సాధించకుండా అడ్డుకున్నాడు. పాక్ కెప్టెన్ సల్మాన్ అలీ వ్యూహాలు పెద్దగా ఫలించకపోవడం, ముఖ్యంగా చివర్లో బౌలర్ల మార్పులో చేసిన తప్పిదాలు పాకిస్థాన్‌కు శాపంగా మారాయి.

ఈ గెలుపుతో ప్రస్తుత ప్రపంచకప్‌లో సెమీస్‌కు అర్హత సాధించిన తొలి జట్టుగా ఇంగ్లండ్ నిలిచింది. వరుసగా ఐదోసారి టీ20 ప్రపంచకప్ సెమీఫైనల్స్‌కు చేరుకుని, తమ ఆధిక్యాన్ని నిరూపించుకుంది. కెప్టెన్ హ్యారీ బ్రూక్ ఇన్నింగ్స్, టీ20 ప్రపంచకప్ చరిత్రలో ఒక ఇంగ్లండ్ కెప్టెన్ చేసిన అత్యధిక స్కోరుగా రికార్డు సృష్టించింది.