టీ20 ప్రపంచకప్: భారత్తో మ్యాచ్కు పాక్ గ్రీన్ సిగ్నల్
ఎట్టకేలకు క్రికెట్ అభిమానులకు తీపి కబురు అందింది. టీ20 ప్రపంచకప్లో భాగంగా ఈనెల 15న జరగాల్సిన భారత్-పాకిస్థాన్ మ్యాచ్పై నెలకొన్న నీలినీడలు తొలగిపోయాయి. ఈ టోర్నీని బహిష్కరిస్తున్నట్లు గతంలో ప్రకటించిన పాకిస్థాన్ ప్రభుత్వం, తన నిర్ణయాన్ని వెనక్కి తీసుకుంది. షెడ్యూల్ ప్రకారం ఫిబ్రవరి 15న కొలంబో వేదికగా టీమ్ ఇండియాతో తలపడాలని పాక్ జట్టును ఆదేశిస్తూ అధికారిక ప్రకటన విడుదల చేసింది.
మిత్రదేశాల రాయబారం
పాకిస్థాన్ తన మొండి పట్టును వీడటానికి బంగ్లాదేశ్, శ్రీలంక దేశాల జోక్యం ప్రధాన కారణమని తెలుస్తోంది. టోర్నీ సజావుగా సాగాలంటే పాక్ ఆడటం చాలా ముఖ్యమని, ఆట ప్రయోజనాలను దృష్టిలో ఉంచుకుని బహిష్కరణ నిర్ణయాన్ని మార్చుకోవాలని ఆ దేశాలు కోరాయి. ముఖ్యంగా బంగ్లాదేశ్ క్రికెట్ బోర్డు చీఫ్ అమీనుల్ ఇస్లాం చేసిన విజ్ఞప్తి పాక్ ఆలోచనా విధానంలో మార్పు తెచ్చింది.
శ్రీలంక అధ్యక్షుడి చొరవ
శ్రీలంక అధ్యక్షుడు అనుర కుమార దిస్సానాయకే నేరుగా పాక్ ప్రధాని షెహబాజ్ షరీఫ్తో ఫోన్లో మాట్లాడారు. ఆతిథ్య దేశంగా శ్రీలంకలో జరుగుతున్న ఈ మెగా టోర్నీకి ఎటువంటి ఆటంకం కలగకుండా చూడాలని, వివాదాన్ని స్నేహపూర్వకంగా పరిష్కరించుకోవాలని ఆయన కోరారు. ఈ చొరవతో పాక్ ప్రభుత్వం మెత్తబడింది.
అధికారిక ప్రకటన
పాకిస్థాన్ ప్రభుత్వం సోమవారం సాయంత్రం ఒక పత్రికా ప్రకటన విడుదల చేసింది. "మిత్రదేశాల అభ్యర్థన మేరకు, అంతర్జాతీయ క్రికెట్ గౌరవాన్ని కాపాడేందుకు మేము ఈ నిర్ణయం తీసుకున్నాము. ఫిబ్రవరి 15న జరగబోయే మ్యాచ్లో మా జాతీయ క్రికెట్ జట్టు బరిలోకి దిగుతుంది" అని స్పష్టం చేసింది. దీంతో టోర్నీలో ఎదురైన అతిపెద్ద అడ్డంకి తొలగిపోయినట్లయ్యింది.
క్రికెట్ స్పూర్తికే ప్రాధాన్యం
ప్రపంచవ్యాప్తంగా క్రికెట్ ఆటపై కోట్లాది మందికి ఉన్న మక్కువను దృష్టిలో పెట్టుకుని ఈ నిర్ణయం తీసుకున్నట్లు పాక్ తెలిపింది. క్రీడా స్ఫూర్తిని కాపాడటం, అన్ని దేశాల్లో ఈ క్రీడ నిరంతరాయంగా కొనసాగేలా చూడటమే తమ లక్ష్యమని పాక్ ప్రభుత్వం తన ప్రకటనలో పేర్కొంది. దీనివల్ల ఆటతో పాటు క్రీడాకారుల ప్రయోజనాలు కూడా దెబ్బతినవని అభిప్రాయపడింది.
కొలంబోలో పోరుకు సిద్ధం
ఇప్పుడు అందరి దృష్టి ఫిబ్రవరి 15న కొలంబోలో జరగబోయే మహా సంగ్రామంపైనే ఉంది. చిరకాల ప్రత్యర్థుల మధ్య పోరు అంటే ఉండే క్రేజే వేరు. మ్యాచ్పై సందిగ్ధత వీడటంతో టికెట్ల విక్రయాలు మళ్లీ పుంజుకున్నాయి. ఇరు దేశాల ఆటగాళ్లు ఇప్పుడు మైదానంలో తమ సత్తా చాటడానికి సిద్ధమవుతున్నారు. ప్రపంచవ్యాప్తంగా ఉన్న క్రికెట్ అభిమానులు ఈ మ్యాచ్ కోసం ఆసక్తిగా ఎదురుచూస్తున్నారు.
బంగ్లాదేశ్పై ఐసీసీ ఉదారత
మరోవైపు, భారత్లో ఆడటానికి నిరాకరించిన బంగ్లాదేశ్ క్రికెట్ బోర్డుపై ఎటువంటి జరిమానా గానీ, నిషేధం గానీ విధించకూడదని ఐసీసీ నిర్ణయించింది. భద్రతా కారణాలతో బంగ్లాదేశ్ తప్పుకోవడంతో వారి స్థానంలో స్కాట్లాండ్ను చేర్చిన సంగతి తెలిసిందే. చర్చల అనంతరం, బంగ్లాదేశ్ హక్కులను గుర్తిస్తూనే, 2028-2031 మధ్య ఆ దేశానికి ఒక ఐసీసీ మెగా ఈవెంట్ నిర్వహించే అవకాశం ఇస్తామని ఐసీసీ హామీ ఇచ్చింది. క్రీడా స్ఫూర్తిని కాపాడటమే తమ లక్ష్యమని, బంగ్లాదేశ్ తమకు కీలక సభ్యదేశమని ఐసీసీ స్పష్టం చేసింది.