టార్గెట్ అమెరికా.. శక్తివంతమైన క్షిపణి ఇంజిన్ని పరీక్షించిన ఉత్తర కొరియా
ఉత్తర కొరియా మరోసారి తన సైనిక శక్తిని ప్రదర్శించింది . అమెరికా ప్రధాన భూభాగాన్ని లక్ష్యంగా చేసుకోగల శక్తివంతమైన క్షిపణి ఇంజిన్ పరీక్షను ఆ దేశం విజయవంతంగా నిర్వహించింది. అధినేత కిమ్ జోంగ్ ఉన్ స్వయంగా ఈ పరీక్షను పర్యవేక్షించినట్లు ఆ దేశ అధికారిక వార్తా సంస్థ 'కేసీఎన్ఏ' ఆదివారం వెల్లడించింది. దేశ వ్యూహాత్మక సైనిక సామర్థ్యాన్ని పతాక స్థాయికి తీసుకెళ్లడంలో ఈ పరీక్ష కీలక మైలురాయి అని కిమ్ కొనియాడారు.
పెరిగిన ఇంజిన్ సామర్థ్యం
తాజా పరీక్షలో ఉపయోగించిన ఇంజిన్ మునుపటి కంటే అత్యంత శక్తిమంతమైనదని నిపుణులు విశ్లేషిస్తున్నారు. గత సెప్టెంబరులో నిర్వహించిన పరీక్షలో ఇంజిన్ సామర్థ్యం 1,971 కిలోటన్నులు ఉండగా, ఇప్పుడు దానిని 2,500 కిలోటన్నులకు పెంచారు. ఈ ఇంజిన్ తయారీలో అత్యాధునిక 'కాంపోజిట్ కార్బన్ ఫైబర్' పదార్థాన్ని వాడినట్లు సమాచారం. ఒకే క్షిపణి ద్వారా బహుళ అణ్వాయుధాలను ప్రయోగించేందుకు, అమెరికా రక్షణ వ్యవస్థలను ఛేదించేందుకు ఈ అధిక సామర్థ్యం గల ఇంజిన్లు ఉపయోగపడతాయని నిపుణులు భావిస్తున్నారు.
అమెరికాపై నిప్పులు చెరిగిన కిమ్
ఇటీవల ఉత్తర కొరియా పార్లమెంటులో ప్రసంగించిన కిమ్.. అమెరికాపై తీవ్రస్థాయిలో విరుచుకుపడ్డారు. పశ్చిమ ఆసియాలో జరుగుతున్న యుద్ధాన్ని ప్రస్తావిస్తూ.. అమెరికా ప్రపంచవ్యాప్తంగా స్టేట్ టెర్రరిజం, దురాక్రమణలకు పాల్పడుతోందని ఆరోపించారు. తమ దేశాన్ని అజేయమైన అణుశక్తిగా మార్చుకుంటామని, దీన్ని ఎవరూ వెనక్కి తీసుకోలేరని ఆయన స్పష్టం చేశారు. ఐదేళ్ల సైనిక ఆధునికీకరణ ప్రణాళికలో భాగంగానే ఈ పరీక్షలు నిర్వహిస్తున్నట్లు వెల్లడించారు.
'సాలిడ్ ఫ్యూయల్'తో పెరగనున్న ముప్పు
ఉత్తర కొరియా ఇప్పుడు 'సాలిడ్ ఫ్యూయల్' (ఘన ఇంధన) క్షిపణులపై దృష్టి పెట్టింది. పాత ద్రవ ఇంధన క్షిపణుల కంటే వీటిని ప్రయోగించడం సులభం. క్షిపణిని ప్రయోగించే ముందు ఇంధనం నింపే అవసరం ఉండదు కాబట్టి, ప్రత్యర్థి దేశాల రాడార్లు గుర్తించేలోపే వీటిని ప్రయోగించవచ్చు. 2019లో ట్రంప్-కిమ్ మధ్య జరిగిన చర్చలు విఫలమైనప్పటి నుండి ఉత్తర కొరియా తన అణ్వాయుధాల విస్తరణను వేగవంతం చేసింది. అమెరికా తనపై ఉన్న ఆంక్షలను తొలగిస్తేనే తదుపరి చర్చలకు అవకాశం ఉంటుందని కిమ్ పరోక్షంగా సంకేతాలిచ్చారు. కాగా ఉత్తర కొరియా క్షిపణి ప్రయోగాలు అమెరికా రక్షణ వ్యవస్థకు పెద్ద సవాలుగా మారుతున్నాయని అంతర్జాతీయ నిపుణులు ఆందోళన వ్యక్తం చేస్తున్నారు.