టర్కీని వణికించిన భారీ భూకంపం

టర్కీని మరోసారి భారీ భూకంపం వణికించింది. పశ్చిమ టర్కీ ప్రాంతంలో భారత కాలమానం ప్రకారం మంగళవారం తెల్లవారుజామున 6.1 తీవ్రతతో భూకంపం సంభవించింది. ఇది గత మూడు నెలల్లో ఈ ప్రాంతంలో నమోదైన రెండవ అతిపెద్ద భూకంపం కావడం గమనార్హం. ఈ భూకంప కేంద్రం బాలికెసిర్ ప్రావిన్స్‌లోని సిందిర్గి పట్టణం సమీపంలో భూమికి 5.99 కిలోమీటర్లు లోతులో ఉన్నట్లు టర్కీ విపత్తు-అత్యవసర నిర్వహణ సంస్థ తెలిపింది. ఆర్థికంగా, జనాభా పరంగా ముఖ్యమైన నగరాలైన ఇస్తాంబుల్, ఇజ్మిర్తో పాటు సమీపంలోని బుర్సా, మానిసా వంటి ప్రావిన్సులలో కూడా ఈ భూకంప ప్రకంపనలు కనిపించాయి. గాఢ నిద్రలో ఉన్న ప్రజలు ఉలిక్కిపడి, భయంతో ఇళ్ల నుంచి బయటకు పరుగులు తీశారు.

22 మందికి గాయాలు

ప్రస్తుతానికి ఈ భూకంపం కారణంగా ఎటువంటి ప్రాణనష్టం జరగలేదని అక్కడి స్థానిక అధికారులు తెలిపారు. అయితే భయంతో పరుగులు తీయడం వల్ల సుమారు 22 మంది గాయపడినట్లు బాలికెసిర్ గవర్నర్ ఇస్మాయిల్ ఉస్తావోగ్లు అన్నారు. అంతర్గత వ్యవహారాల మంత్రి అలీ యెర్లికాయ తెలిపిన వివరాల ప్రకారం, సిందిర్గి పట్టణంలో గతంలో భూకంపాల వల్ల బలహీనపడిన మూడు భవనాలు, ఒక రెండంతస్తుల దుకాణం తాజా ప్రకంపనల ధాటికి కూలిపోయాయి. అయితే ఆ భవనాలను అప్పటికే ఖాళీ చేయించినందున పెద్ద ప్రమాదం తప్పింది.

ప్రజలు భయాందోళనలకు గురికావద్దని, పుకార్లను నమ్మకుండా అప్రమత్తంగా ఉండాలని అధికారులు సూచించారు. రెస్క్యూ టీమ్‌లు ప్రభావిత ప్రాంతాల్లో సహాయక చర్యలు చేపట్టాయి. భూకంప కేంద్రమైన బాలికెసిర్‌లో ఇప్పటివరకు 14 సార్లు భూమి కంపించిందని అధికారులు తెలిపారు. ఇవాళ కూడా చిన్నపాటి భూకంపనలు వచ్చే అవకాశం ఉందని టర్కీ విపత్తు-అత్యవసర నిర్వహణ సంస్థ అంచనా వేసింది.

టర్కీకి భూకంపాల బెడద కారణాలు

టర్కీ దేశం మూడు ప్రధాన భూకంప టెక్టానిక్ ప్లేట్‌ల మధ్యలో ఉంది. అనేక ఫాల్ట్ లైన్లపై ఉండటం వల్ల ఇది ప్రపంచంలోనే భూకంపాలకు అత్యంత ప్రభావితమైన దేశాలలో ఒకటిగా పరిగణించబడుతోంది. సిందిర్గి ప్రాంతం పర్వతాల మధ్య ఉండటం వల్ల కూడా తరచుగా భూకంపాలు సంభవిస్తుంటాయి.

గతంలో భారీ నష్టాలు

ఈ తాజా భూకంపం పెద్ద నష్టాన్ని కలిగించనప్పటికీ, టర్కీకి భూకంపాల చరిత్ర భయంకరమైనది. 2023 ఫిబ్రవరిలో 7.8 తీవ్రతతో సంభవించిన అతిపెద్ద భూకంపం కారణంగా టర్కీలో 53,000 మందికి పైగా ప్రాణాలు కోల్పోయారు. పొరుగున ఉన్న సిరియా ఉత్తర ప్రాంతాల్లో మరో 6,000 మంది మరణించారు. ఈ విపత్తులో లక్షలాది భవనాలు ధ్వంసమయ్యాయి. ఈ ప్రాంతంలో ఈ ఏడాది ఆగస్టు 10న కూడా 6.1 తీవ్రతతో భూకంపం వచ్చి ఒకరు మరణించారు, 50 మందికి పైగా గాయపడ్డారు. టర్కీలోని అధికార యంత్రాంగం ప్రస్తుతం అప్రమత్తంగా ఉంటూ పరిస్థితిని నిశితంగా పర్యవేక్షిస్తోంది.

నేపాల్‌లో స్వల్ప భూకంపం

ఇదే సమయంలో పొరుగు దేశమైన నేపాల్‌లో కూడా భూకంపం సంభవించింది. తూర్పు నేపాల్‌లోని కోషి ప్రావిన్స్‌లోని సంఖువాసభ జిల్లాలో మంగళవారం ఉదయం 7:15 గంటలకు 3.5 తీవ్రతతో భూకంపం సంభవించింది. జాతీయ భూకంప పర్యవేక్షణ, పరిశోధన కేంద్రం ప్రకారం, కాఠ్మాండుకు తూర్పున 225 కిలోమీటర్ల దూరంలో, టిబెట్ సరిహద్దు సమీపంలోని కిమతంగ్‌కా ప్రాంతంలో ఉదయం 7:32 గంటలకు ఈ భూకంపం నమోదైంది. పొరుగు జిల్లాలైన తప్లేజుంగ్, భోజ్‌పూర్, సోలుఖుంబులలో కూడా భూకంప ప్రభావం కనిపించింది. అయితే ఈ ప్రకంపనల వల్ల ఎటువంటి ప్రాణ, ఆస్తి నష్టం జరగలేదని నివేదికలు తెలిపాయి. కాగా నేపాల్ అత్యంత క్రియాశీలక టెక్టోనిక్ జోన్‌లలో ఉండటం వలన తరచూ భూకంపాలు సంభవిస్తుంటాయి. 2015 ఏప్రిల్‌లో ఇక్కడ 7.8 తీవ్రతతో సంభవించిన భారీ భూకంపం కారణంగా దాదాపు 9 వేల మంది ప్రాణాలు కోల్పోయిన సంగతి తెలిసిందే.