జెనీవాలో ఉక్రెయిన్-రష్యా శాంతి చర్చలు అర్ధాంతరంగా ముగింపు
ఉక్రెయిన్-రష్యా శాంతి చర్చలు బుధవారం అర్ధాంతరంగా ముగిశాయి. నాలుగేళ్లుగా కొనసాగుతున్న యుద్ధానికి ముగింపు పలకడంపై జరిగిన ఈ చర్చలు అత్యంత క్లిష్టంగా సాగాయని ఉక్రెయిన్ అధ్యక్షుడు జెలెన్స్కీ వ్యాఖ్యానించారు. ఒప్పంద దశకు చేరుకున్న చర్చలను రష్యా ఉద్దేశపూర్వకంగా సాగదీస్తూ, ఆలస్యం చేస్తోందని ఆయన ఆరోపించారు
అమెరికా మధ్యవర్తిత్వం, ట్రంప్ వ్యాఖ్యలు
అమెరికా మధ్యవర్తిత్వంతో స్విట్జర్లాండ్లో జరిగిన ఈ చర్చల్లో.. డొనాల్డ్ ట్రంప్ వైఖరిపై ఉక్రెయిన్ అసంతృప్తి వ్యక్తం చేసింది. శాంతి కోసం ఉక్రెయిన్నే ముందడుగు వేయాలంటూ ట్రంప్ చేసిన వ్యాఖ్యలు కీవ్ను (ఉక్రెయిన్ ప్రభుత్వం) ఇరకాటంలో పడేశాయి. 'యాక్సియోస్' వార్తా సంస్థకు ఇచ్చిన ఇంటర్వ్యూలో జెలెన్స్కీ స్పందిస్తూ.. రష్యాను వదిలి కేవలం ఉక్రెయిన్పైనే బహిరంగంగా ఒత్తిడి తేవడం న్యాయం కాదని పేర్కొన్నారు. ముఖ్యంగా డోన్బాస్లో రష్యా ఆక్రమించని భూభాగాలను వదులుకోవాలనే ప్రతిపాదనలను ఉక్రెయిన్ ప్రజలు ఎట్టిపరిస్థితుల్లోనూ ఆమోదించరని, ప్రజాభిప్రాయ సేకరణలో అవి తిరస్కరణకు గురవుతాయని ఆయన స్పష్టం చేశారు.
రష్యా స్పందన
జెలెన్స్కీ వ్యాఖ్యల అనంతరం రష్యా ప్రభుత్వ వార్తా సంస్థ ఆర్ఐఏ, చర్చలు ముగిశాయని వెల్లడించింది. రష్యా ప్రధాన ప్రతినిధి వ్లాదిమిర్ మెడిన్స్కీ త్వరలోనే మరిన్ని చర్చలు ఉంటాయని తెలిపారు. అయితే తేదీని వెల్లడించలేదు. ఉక్రెయిన్ అధికారి ఒకరు కూడా చర్చలు సుమారు రెండు గంటలపాటు మాత్రమే సాగినట్లుధ్రువీకరించారు.
తీవ్ర ఉద్రిక్తతల మధ్య చర్చలు
రష్యా మీడియా సమాచారం ప్రకారం, మొదటి రోజు జరిగిన శాంతి చర్చలు ఇరు దేశాల మధ్య తీవ్ర ఉద్రిక్తతలకు దారితీశాయి. రష్యా, ఉక్రెయిన్ ప్రతినిధులు వేర్వేరు బృందాలుగా విడిపోయి దాదాపు ఆరు గంటల పాటు సుదీర్ఘంగా చర్చలు జరిపారు. అయితే ఉక్రెయిన్ ప్రతినిధి రుస్తెమ్ ఉమెరోవ్ మాత్రం ఈ భేటీ గురించి ఎక్కువగా వివరాలు వెల్లడించకుండా.. కేవలం యుద్ధం ఆపడానికి తీసుకోవాల్సిన కొన్ని ఆచరణాత్మక నిర్ణయాలు, వాటిని ఎలా అమలు చేయాలనే సాంకేతిక అంశాలపైనే ప్రధానంగా చర్చించినట్లు పేర్కొన్నారు.
మార్కెట్లపై చర్చల ప్రభావం
శాంతి చర్చల్లో ఆశించిన పురోగతి లభించలేదన్న వార్తలు అంతర్జాతీయ ఆర్థిక మార్కెట్లపై తక్షణ ప్రభావం చూపాయి. చర్చలు నిలిచిపోయినట్లు తెలియగానే యూరప్ ట్రేడింగ్లో ఉక్రెయిన్ ప్రభుత్వ బాండ్ల విలువ ఒక్కసారిగా డాలరుకు 1.9 సెంట్ల వరకు పడిపోయింది. అయితే, ఈ భేటీపై మొదటి నుంచీ పెద్దగా అంచనాలు లేవని ఉక్రెయిన్ ప్రతినిధి ఉమెరోవ్ వ్యాఖ్యానించడం గమనార్హం. ఎటువంటి పెద్ద 'బ్రేక్థ్రూ' (కీలక మార్పు) లభిస్తుందని తాము ముందే ఆశించలేదని ఆయన స్పష్టం చేశారు.
యుద్ధం - నాలుగేళ్ల విధ్వంసం
2022లో రష్యా దాడులతో మొదలైన ఈ యుద్ధం ఇప్పుడు నాలుగో ఏడాదిలోకి ప్రవేశిస్తోంది. ఈ సుదీర్ఘ పోరాటంలో ఇప్పటికే లక్షలాది మంది ప్రాణాలు కోల్పోగా, మరికొన్ని లక్షల మంది తమ ఇళ్లను వదిలి ఇతర ప్రాంతాలకు శరణార్థులుగా వలస వెళ్లారు. ఉక్రెయిన్లోని అనేక నగరాలు, పల్లెలు బాంబు దాడుల్లో చిధ్రమై తీవ్రంగా ధ్వంసమయ్యాయి. అయితే, తాము కేవలం సైనిక స్థావరాలనే లక్ష్యంగా చేసుకుంటున్నామని, పౌరులపై దాడులు చేస్తున్నామన్న ఆరోపణల్లో నిజం లేదని రష్యా మొదటి నుంచీ వాదిస్తోంది.
ప్రజల అవస్థలు
జెనీవా సమావేశానికి ముందే అబూదాబీలో రెండుసార్లు చర్చలు జరిగినప్పటికీ, ఇరు దేశాల మధ్య ఎటువంటి ఒప్పందం కుదరలేదు. ముఖ్యంగా తూర్పు ఉక్రెయిన్ భూభాగం ఎవరి ఆధీనంలో ఉండాలనే విషయంలో రష్యా, ఉక్రెయిన్ పట్టువీడటం లేదు. ప్రస్తుతం ఉక్రెయిన్కు చెందిన 20 శాతం భూభాగంతో పాటు క్రిమియా, డోన్బాస్ ప్రాంతాలు రష్యా ఆక్రమణలోనే ఉన్నాయి. దీనికి తోడు రష్యా జరిపిన తాజా దాడుల వల్ల విద్యుత్ వ్యవస్థ దెబ్బతినడంతో, ఈ కఠిన శీతాకాలంలో వేలాది మంది ఉక్రెయిన్ ప్రజలు కనీస వెలుతురు, వేడి (హీటింగ్) సౌకర్యాలు లేక తీవ్ర ఇబ్బందులు పడుతున్నారు. ఈ పరిణామాల నేపథ్యంలో ఆ ప్రాంతాల్లో శాంతి ఎప్పుడు పునరుద్ధరించబడుతుందో తెలియక యావత్ ప్రపంచం ఆందోళన చెందుతోంది.