జూబ్లీహిల్స్ ఉపఎన్నికకు పరిశీలకుల నియామకం

నవంబర్ 11న జరగనున్న జూబ్లీహిల్స్ అసెంబ్లీ నియోజకవర్గ ఉప ఎన్నికకు కేంద్ర ఎన్నికల సంఘం ముగ్గురు పరిశీలకులను నియమించింది. ఇది ఎన్నికల ప్రక్రియ పారదర్శకంగా, నిష్పక్షపాతంగా సజావుగా జరిగేలా చర్యలు తీసుకుంటుంది. ఈ అధికారులు ఎన్నికల ప్రక్రియలోని వివిధ అంశాలను పర్యవేక్షించనున్నారు. అందులో భాగంగా సాధారణ ఏర్పాట్లు, చట్టం-సువ్యవస్థ, ఖర్చు పర్యవేక్షణ ఉన్నాయి. మోడల్ కోడ్ ఆఫ్ కండక్ట్ అమలు, ఎన్నికల సమయంలో శాంతిభద్రతల పరిస్థితి, అభ్యర్థుల వ్యయాల పరిశీలన వంటి అంశాలను వీరు గమనించనున్నారు. ఎన్నికల కాలంలో సంబంధిత అధికారులతో సమన్వయం కోసం వీరు స్థానిక కాంటాక్ట్ నంబర్ల ద్వారా అందుబాటులో ఉంటారు.

పరిశీలకులుగా వీరే

ఎలక్షన్ కమిషన్ ఆఫ్ ఇండియా రంజిత్ కుమార్ సింగ్ ఐఏఎస్ ను సాధారణ పరిశీలకుడిగా ఓం ప్రసాద్ త్రిపాఠి పోలీస్ పరిశీలకుడు, సంజీవ్ కుమార్ లాల్ ఐఆర్ఎస్, వ్యయ పరిశీలకుడిగా నియమించింది. మంగళవారంతో నామినేషన్ల గడువు ముగిసింది. బుధవారం పరిశీలన (స్క్రూటిని) అక్టోబర్ 22న, నామినేషన్ల ఉపసంహరణకు అక్టోబర్ 24 గడువును విధించిన విషయం తెలిసిందే. అక్టోబర్ 6న ఎన్నికల సంఘం దేశవ్యాప్తంగా ఏడు రాష్ట్రాలు, ఓ కేంద్ర పాలిత ప్రాంతంలో ఎనిమిది అసెంబ్లీ నియోజకవర్గాల ఉప ఎన్నికలను నవంబర్ 11న నిర్వహించనున్నట్లు ప్రకటించింది.

ఆయా రాజకీయ పార్టీలు అభ్యర్థులను బరిలో దించాయి. ముఖ్యంగా కాంగ్రెస్ పార్టీ నుంచి బీసీ నేత వి. నవీన్ యాదవ్, బీఆర్‌ఎస్ నుంచి సునీత గోపీనాథ్, బీజేపీ నుంచి లంక దీపక్ రెడ్డి పోటీ చేస్తున్నారు. ఏఐఎంఐఎం అభ్యర్థిని నిలబెట్టలేదు. ఆ పార్టీ కాంగ్రెస్ పార్టీ అభ్యర్థికి మద్దతు ఇస్తామని ఇప్పటికే ప్రకటించింది.