జార్ఖండ్ హైకోర్టు ప్రధాన న్యాయమూర్తిగా జస్టిస్ మహేష్ శరద్‌చంద్ర సోనక్ ప్రమాణ స్వీకారం

జస్టిస్ మహేష్ శరద్‌చంద్ర సోనక్ శుక్రవారం జార్ఖండ్ హైకోర్టు ప్రధాన న్యాయమూర్తిగా ప్రమాణ స్వీకారం చేశారు. ఇక్కడి లోక్ భవన్‌లో జరిగిన కార్యక్రమంలో గవర్నర్ సంతోష్ కుమార్ గంగ్వార్ ఆయనతో పదవీ ప్రమాణం చేయించారు.

అంతకుముందు బాంబే హైకోర్టులో న్యాయమూర్తిగా పనిచేస్తున్న జస్టిస్ సోనక్ పేరును, జార్ఖండ్ హైకోర్టు కొత్త ప్రధాన న్యాయమూర్తిగా సుప్రీంకోర్టు కొలీజియం గత నెలలో సిఫార్సు చేసింది.

అప్పటి వరకు ప్రధాన న్యాయమూర్తిగా ఉన్న జస్టిస్ తర్లోక్ సింగ్ చౌహాన్, 62 ఏళ్ల వయస్సు పూర్తి కావడంతో జనవరి 8న పదవీ విరమణ చేశారు. ఆయన స్థానంలో జస్టిస్ సోనక్ బాధ్యతలు స్వీకరించారు. ఈ కార్యక్రమంలో పలువురు ప్రముఖులు మరియు న్యాయ విభాగ ప్రతినిధులు పాల్గొన్నారు.

కాగా జార్ఖండ్ హైకోర్టు ప్రధాన న్యాయమూర్తిగా బాధ్యతలు స్వీకరించిన జస్టిస్ మహేష్ శరద్‌చంద్ర సోనక్ నవంబర్ 28, 1964న గోవాలోని పనాజీలో జన్మించారు. పనాజీలోని 'డాన్ బాస్కో హైస్కూల్'లో పాఠశాల విద్యను పూర్తి చేశారు. అనంతరం 'ధెంపే కాలేజ్ ఆఫ్ ఆర్ట్స్ అండ్ సైన్స్' నుండి బి.ఎస్సీ, పనాజీలోని 'ఎం.ఎస్. కాలేజ్ ఆఫ్ లా' నుండి ఎల్.ఎల్.బి ప్రథమ శ్రేణిలో ఉత్తీర్ణులయ్యారు. జేవియర్ సెంటర్ ఆఫ్ హిస్టారికల్ రీసెర్చ్ నుండి ఆయన 'పోర్చుగీస్ లాంగ్వేజ్ డిప్లొమా' కూడా పొందారు.

తొలిసారి అక్టోబర్ 1988లో మహారాష్ట్ర, గోవా బార్ కౌన్సిల్‌లో న్యాయవాదిగా నమోదు చేసుకున్నారు. బాంబే హైకోర్టులోని పనాజీ బెంచ్‌లో సివిల్, రాజ్యాంగ, కార్మిక, పర్యావరణ, వాణిజ్య, పన్ను చట్టాలపై ప్రాక్టీస్ చేశారు. కేంద్ర ప్రభుత్వానికి అడిషనల్ స్టాండింగ్ కౌన్సిల్‌గా, రాష్ట్ర ప్రభుత్వానికి వివిధ చట్టబద్ధమైన సంస్థలకు ప్రత్యేక కౌన్సిల్‌గా సేవలందించారు.

జూన్ 21, 2013న బాంబే హైకోర్టులో అడిషనల్ జడ్జిగా నియమితులయ్యారు. ఆ తర్వాత శాశ్వత న్యాయమూర్తిగా పదోన్నతి పొందారు. ప్రస్తుతం సుప్రీంకోర్టు కొలీజియం సిఫార్సు మేరకు, జనవరి 9, 2026న జార్ఖండ్ హైకోర్టు 18వ ప్రధాన న్యాయమూర్తిగా ప్రమాణ స్వీకారం చేశారు.

ముఖ్యమైన తీర్పులు, అభిప్రాయాలు:

బాంబే హైకోర్టులో ఉన్న సమయంలో ఆయన పలు కీలకమైన తీర్పులు ఇచ్చారు. ఒక కేసు విచారణలో "అభివ్యక్తి స్వేచ్ఛ ప్రమాదంలో ఉన్నప్పుడు పోలీసు యంత్రాంగం చాలా సున్నితంగా వ్యవహరించాలి" అని ఆయన పేర్కొన్నారు.

మతపరమైన భావాలను గాయపరిచే ఉద్దేశ్యం లేని పక్షంలో, మతాన్ని అవమానించడం ఎప్పుడూ నేరం కాదని (సెక్షన్ 295A కింద) స్పష్టం చేశారు.

గోవాలోని తాత్కాలిక బీచ్ షాక్స్‌ వల్ల పర్యావరణంపై ప్రతికూల ప్రభావం ఉండదని పేర్కొంటూ గతంలో కీలక ఉత్తర్వులు ఇచ్చారు.

బాంబే హైకోర్టు నుండి వీడ్కోలు పొందుతున్నప్పుడు, "మాట్లాడాల్సిన బాధ్యత ఉన్నప్పుడు మౌనంగా ఉండటం నేరం" అని ఆయన చేసిన వ్యాఖ్యలు చర్చనీయాంశమయ్యాయి. ఆయన నవంబర్ 27, 2026న పదవీ విరమణ చేయనున్నారు.