జూబ్లీ హిల్స్పై బీఆర్ఎస్ మాస్టర్ ప్లాన్

తెలంగాణలో అసెంబ్లీ ఎన్నికలు ముగిసి నెలలు గడుస్తున్నా జూబ్లీహిల్స్ నియోజకవర్గం ఉప ఎన్నిక రాజకీయ వేడిని రాజేస్తోంది. ఈ ఉప ఎన్నికను అన్ని ప్రధాన రాజకీయ పార్టీలు ప్రతిష్టాత్మకంగా తీసుకున్నాయి. గెలుపే లక్ష్యంగా వ్యూహాలు పన్నుతున్నాయి. ఈ ఉప ఎన్నిక ఫలితం భవిష్యత్తులో జరగనున్న స్థానిక సంస్థల ఎన్నికలు, ముఖ్యంగా జీహెచ్ఎంసీ ఎన్నికలపై గణనీయమైన ప్రభావాన్ని చూపుతుందని నాయకత్వం భావిస్తోంది. ఈ క్రమంలో ప్రధానంగా బీఆర్ఎస్, కాంగ్రెస్ పార్టీల మధ్య హోరాహోరీ పోరు కనిపిస్తోంది.

సానుభూతి ఓట్లు

2023 అసెంబ్లీ ఎన్నికల్లో జూబ్లీహిల్స్ స్థానం నుంచి విజయం సాధించిన బీఆర్ఎస్ అభ్యర్థి మాగంటి గోపీనాథ్ మృతి చెందడంతో ఈ ఉప ఎన్నిక అనివార్యమైంది. తమ సిట్టింగ్ స్థానాన్ని నిలబెట్టుకోవాలని బీఆర్ఎస్ తీవ్రంగా ప్రయత్నిస్తోంది. ఇందులో భాగంగా బీఆర్ఎస్ వర్కింగ్ ప్రెసిడెంట్ కేటీఆర్ స్వయంగా రంగంలోకి దిగారు. నియోజకవర్గంలోని డివిజన్ల వారీగా పార్టీ నేతలు, బూత్ కమిటీలతో ఆయన వరుస సమావేశాలు నిర్వహిస్తున్నారు. పార్టీ శ్రేణుల్లో ఉత్సాహాన్ని నింపి ఎన్నికల వ్యూహాలపై వారికి దిశానిర్దేశం చేస్తున్నారు. సోమవారం ఉదయం తెలంగాణ భవన్లో వెంగళరావు నగర్ డివిజన్ బూత్ కమిటీతో ఆయన భేటీ అయ్యారు. ఈ ఉప ఎన్నికల్లో అనుసరించాల్సిన వ్యూహంపై డివిజన్ నేతలకు కేటీఆర్ దిశానిర్దేశం చేశారు. మరోవైపు డివిజన్ల వారీగా ఇప్పటికే పలువురు నేతలను బీఆర్ఎస్ పార్టీ నియమించింది. ఈ ఎన్నికల్లో తమ సత్తా చాటాలని బీఆర్ఎస్ పార్టీ నేతలు కృత నిశ్చయంతో ఉన్నారు.

అభ్యర్థిగా సునీత?

కేటీఆర్ సమావేశాల్లో దివంగత మాగంటి గోపీనాథ్ సతీమణి సునీతను ఈ ఉప ఎన్నికలో అభ్యర్థిగా ప్రకటించే అవకాశాలు ఉన్నాయని ప్రచారం జరుగుతోంది. కేటీఆర్ సమావేశాల్లో కూడా సునీతను ఆశీర్వదించాలని కార్యకర్తలకు సూచిస్తున్నారు. ఇది కేవలం సానుభూతి ఓట్లను రాబట్టేందుకు బీఆర్ఎస్ వేస్తున్న వ్యూహాత్మక అడుగుగా రాజకీయ విశ్లేషకులు భావిస్తున్నారు. మాగంటి గోపీనాథ్కు నియోజకవర్గంలో ఉన్న వ్యక్తిగత ప్రభావం, ఆయన చేసిన అభివృద్ధి పనుల ఆధారంగా సునీత విజయం సాధిస్తారని బీఆర్ఎస్ అంచనా వేస్తోంది.

కాంగ్రెస్ వ్యూహం

మరోవైపు అధికారంలో ఉన్న కాంగ్రెస్ పార్టీ కూడా ఈ ఉప ఎన్నికను తేలికగా తీసుకోవడం లేదు. ముఖ్యమంత్రి రేవంత్ రెడ్డి ఆధ్వర్యంలో ఇటీవల జరిగిన సమావేశంలో పార్టీ నేతలకు ఈ ఎన్నిక ప్రాముఖ్యతను వివరించారు. గత పదేళ్ల బీఆర్ఎస్ పాలనలో జరిగిన అభివృద్ధి డొల్లా అని ప్రజల్లోకి తీసుకెళ్లాలని సూచించారు. అదే సమయంలో కాంగ్రెస్ ప్రభుత్వం అధికారంలోకి వచ్చిన తర్వాత అమలు చేస్తున్న 'ఆరు గ్యారంటీ' పథకాలను ప్రజలకు వివరించాలని దిశానిర్దేశం చేశారు. అధికార పార్టీగా తమ పాలనపై ప్రజల్లో నమ్మకాన్ని పెంచుకోవడం ద్వారా గెలుపొందాలని కాంగ్రెస్ ప్రయత్నిస్తోంది. అభ్యర్థి ఎంపికపై కూడా పార్టీ అధిష్టానం దృష్టి సారించింది. నవీన్ యాదవ్, అంజన్ కుమార్ యాదవ్, బొంతు రామ్మోహన్ వంటి ప్రముఖుల పేర్లు పరిశీలనలో ఉన్నట్లు సమాచారం.

సీఎం దిశానిర్దేశం

ఆదివారం జూబ్లీహిల్స్ ఉప ఎన్నికలపై సీఎం రేవంత్ రెడ్డి అధ్యక్షతన సమావేశం జరిగింది. ఈ సమావేశానికి నియోజకవర్గం నేతలతోపాటు పార్టీలోని కీలక నేతలు హాజరయ్యారు. ఈ ఎన్నికల్లో కాంగ్రెస్ పార్టీ సత్తా చాటాలని వారికి సీఎం స్పష్టం చేశారు. గత పదేళ్ల పాటు పాలించిన బీఆర్ఎస్ ప్రభుత్వం అభివృద్ధి డొల్లా అని ప్రజల్లోకి వెళ్లాలని వారికి సూచించారు. అలాగే కాంగ్రెస్ పార్టీ కొలువు తీరిన తర్వాత ప్రభుత్వం అమలు చేస్తున్న పథకాలను ప్రజల్లోకి తీసుకు వెళ్లి వివరించాలని దిశానిర్దేశం చేశారు. ఎన్నికల బరిలో నిలిచే అభ్యర్థిని కాంగ్రెస్ పార్టీ అధిష్టానం ఎంపిక చేస్తుందని ఇప్పటికే నేతలకు సీఎం రేవంత్ స్పష్టం చేశారు.

బీజేపీ ఎత్తుగడలు

ఈ ఉప ఎన్నికల్లో బీజేపీ కూడా తమ సత్తా చాటాలని చూస్తోంది. అభ్యర్థిని త్వరలో ప్రకటించే అవకాశం ఉంది. జూబ్లీహిల్స్ నియోజకవర్గంలో యాదవ, రెడ్డి, మైనారిటీ ఓట్లు అధికంగా ఉన్నందున అన్ని పార్టీలు ఆ సామాజిక వర్గాలను ఆకట్టుకోవడానికి ప్రయత్నిస్తున్నాయి. ఈ ఉప ఎన్నిక ఫలితం తెలంగాణ రాజకీయాల్లో కొత్త సమీకరణాలకు దారితీస్తుందా, అనే విషయంపై సర్వత్రా ఆసక్తి నెలకొంది. ఎన్నికల బరిలో నిలిచే ప్రధాన అభ్యర్థులు, వారి వెనుక ఉన్న పార్టీల వ్యూహాలు జూబ్లీహిల్స్ ఉప ఎన్నికను మరింత రసవత్తరంగా మార్చబోతున్నాయి.