జనవరి 28 నుంచి పార్లమెంట్ బడ్జెట్ సమావేశాలు!

దేశ ఆర్థిక భవిష్యత్తును నిర్ణయించే కీలకమైన పార్లమెంట్ బడ్జెట్ సమావేశాలకు ముహూర్తం ఖరారైంది. 2026-27 ఆర్థిక సంవత్సరానికి సంబంధించిన కేంద్ర బడ్జెట్ సమావేశాలు ఈ నెల 28 నుంచి ప్రారంభం కానున్నట్లు అధికార వర్గాలు వెల్లడించాయి. పార్లమెంటరీ వ్యవహారాల కేబినెట్ కమిటీ రూపొందించిన తాత్కాలిక షెడ్యూల్ ప్రకారం.. ఫిబ్రవరి 1వ తేదీన ఆర్థిక మంత్రి కేంద్ర బడ్జెట్‌ను ప్రవేశపెట్టనున్నారు.

తొలిరోజు రాష్ట్రపతి ప్రసంగం

సంప్రదాయం ప్రకారం.. ప్రతి ఏటా జరిగే మొదటి పార్లమెంట్ సమావేశాల తొలిరోజున ఉభయ సభలను ఉద్దేశించి రాష్ట్రపతి ప్రసంగిస్తారు. దీని ప్రకారం జనవరి 28న రాష్ట్రపతి ద్రౌపది ముర్ము లోక్‌సభ, రాజ్యసభల సంయుక్త సమావేశంలో ప్రసంగించడంతో బడ్జెట్ పర్వం మొదలవుతుంది. మరుసటి రోజు (జనవరి 29న) గణతంత్ర వేడుకల ముగింపు ఘట్టమైన 'బీటింగ్ రిట్రీట్' ఉన్నందున సభకు సెలవు ఉంటుంది.

30న ఆర్థిక సర్వే.. 1న కేంద్ర బడ్జెట్

జనవరి 30న పార్లమెంట్ మళ్లీ సమావేశమవుతుంది. ఆ రోజే దేశ ఆర్థిక పరిస్థితిని ప్రతిబింబించే 'ఆర్థిక సర్వే'ను ప్రభుత్వం సభ ముందు ఉంచుతుంది. జనవరి 31న శనివారం కావడంతో సభలు జరగవు. ఇక ఫిబ్రవరి 1వ తేదీ ఆదివారం అయినప్పటికీ, ఆ రోజున ఆర్థిక మంత్రి పార్లమెంటులో కేంద్ర బడ్జెట్‌ను ప్రవేశపెడతారు.

నెల రోజుల సుదీర్ఘ విరామం

రాష్ట్రపతి ప్రసంగానికి ధన్యవాదాలు తెలిపే తీర్మానం, బడ్జెట్‌పై ప్రాథమిక చర్చల అనంతరం ఫిబ్రవరి 13 నుంచి పార్లమెంటుకు సుమారు నెల రోజుల పాటు విరామం ప్రకటిస్తారు. ఈ విరామ సమయంలో వివిధ మంత్రిత్వ శాఖల నిధుల కేటాయింపులను, వ్యయ అంచనాలను పార్లమెంటరీ స్టాండింగ్ కమిటీలు క్షుణ్ణంగా పరిశీలిస్తాయి. బడ్జెట్‌పై సమగ్రమైన చర్చ జరగడానికి ఈ విరామం దోహదపడుతుందని అధికారులు తెలిపారు.

ఏప్రిల్‌ 2న సమావేశాల ముగింపు

మధ్యలో విరామం తర్వాత మార్చి 9న పార్లమెంట్ రెండో విడత సమావేశాలు ప్రారంభమవుతాయి. ఈ విడతలో వివిధ శాఖల గ్రాంట్లపై చర్చలు, ఆర్థిక బిల్లు ఆమోదం వంటి కీలక ప్రక్రియలు పూర్తి చేస్తారు. సాధారణంగా పార్లమెంట్ సమావేశాలు శుక్రవారం ముగుస్తాయి. అయితే ఏప్రిల్ 3న 'గుడ్ ఫ్రైడే' పండుగ, ఆ తర్వాత వారాంతపు సెలవులు ఉండటంతో.. ఏప్రిల్ 2వ తేదీ గురువారమే బడ్జెట్ సమావేశాలను ముగించాలని ప్రభుత్వం యోచిస్తోంది.