ఛత్తీస్‌గఢ్‌లో వేగంగా మావోయిస్టుల లొంగుబాట్లు

చత్తీస్‌గఢ్‌లోని కాంకేర్ జిల్లాలో గత రెండు రోజుల్లో ఆరుగురు నక్సలైట్లు లొంగిపోయినట్లు పోలీసులు వెల్లడించారు. రాజ్‌నంద్‌గావ్–కాంకేర్ సరిహద్దు విభాగానికి చెందిన ఐదుగురు మావోయిస్టులు, అలాగే పీఎల్‌జీఏ (పీపుల్స్ లిబరేషన్‌ గెరిల్లా ఆర్మీ ) మిలిటరీ కంపెనీ నంబర్ 5కు చెందిన మరో ఒకరు పోలీసుల ఎదుట లొంగిపోయినట్టు కాంకేర్ ఎస్పీ నిఖిల్‌ రకేచా తెలిపారు. లొంగిపోయిన వారిలో ఏరియా కమిటీ సభ్యులు మంగేష్ పొడియామి, గణేష్ వి.కే, మంగ్తి జుర్రి, హిడ్మే మార్కం అలియాస్ సునీత, రాజే, అలాగే పీపీసీఎం (ప్లాటూన్ పార్టీ కమిటీ సభ్యుడు) స్వరూపా ఉసెండి ఉన్నారు. వీరు ఒక ఎస్‌ఎల్‌ఆర్ (సెల్ఫ్‌ లోడింగ్‌ రైఫిల్‌), రెండు .303 రైఫిళ్లు సహా మొత్తం మూడు ఆయుధాలను పోలీసులకు అప్పగించారు. వారి నుంచి సేకరించిన సమాచార ఆధారంగా, ఇంకా అడవుల్లో క్రియాశీలంగా ఉన్న ఇతర నక్సలైట్లను సంప్రదించి, హింస మార్గాన్ని విడిచిపెట్టి సామాజిక ప్రధాన ప్రవాహంలోకి రావాలని ప్రోత్సహించే చర్యలు కొనసాగుతున్నాయని అధికారులు తెలిపారు. లొంగిపోయిన వారికి సంబంధించిన పునరావాస ప్రక్రియ, సమాజంలో పునఃప్రవేశం, ఆయుధాల అప్పగింత వంటి చర్యలు త్వరలో పూర్తిచేయనున్నట్లు పేర్కొన్నారు.

పునరావాసం కల్పిస్తాం

బస్తర్ రేంజ్ ఐజీ పట్టిలింగం సుందర్‌‌రాజ్‌ మిగిలిన మావోయిస్టులకు హింసను విడిచిపెట్టి శాంతియుత జీవితం వైపు రావాలని పిలుపునిచ్చారు. లొంగిపోయే వారికి ప్రభుత్వ పునరావాస పథకాల కింద అన్ని ప్రయోజనాలు అందిస్తామని హామీ ఇచ్చారు. గత 26 నెలల్లో రాష్ట్ర ప్రభుత్వ లొంగుబాటు–పునరావాస విధానం కింద 2,700కు పైగా మావోయిస్టులు ప్రధాన ప్రవాహంలోకి చేరినట్లు తెలిపారు. ఇక మార్చి 24న బస్తర్ ప్రాంతంలో సీనియర్ మావోయిస్టు కమాండర్ పాపారావు తన 17 మంది సహచరులతో కలిసి లొంగిపోవడం రాష్ట్రంలో నక్సలిజంపై పోరాటంలో కీలక పరిణామంగా మారింది. ఆ తరువాత ఉప ముఖ్యమంత్రి విజయ్‌ శర్మ మాట్లాడుతూ, పాపారావు లొంగుబాటు అనంతరం రాష్ట్రంలో ఉన్నత స్థాయి నక్సల నాయకులు ఎవరూ క్రియాశీలంగా మిగలరని అన్నారు. మార్చి 31, 2026 నాటికి ఛత్తీస్‌గఢ్‌ను సాయుధ నక్సలిజం నుంచి పూర్తిగా విముక్తం చేయగలమనే నమ్మకాన్ని వ్యక్తం చేశారు.