ఛత్తీస్గఢ్లో రోడ్డు ప్రమాదం.. నలుగురు మృతి
రాష్ట్రంలోని ధమ్తారి జిల్లాలో శనివారం ఉదయం జరిగిన ఘోర రోడ్డు ప్రమాదంలో ముగ్గురు సీఆర్పీఎఫ్ జవాన్లు, ఒక కారు డ్రైవర్ మృతి చెందగా, మరో జవాన్ తీవ్ర గాయాలతో చికిత్స పొందుతున్నారు. జాగ్దల్పూర్–రాయ్పూర్ జాతీయ రహదారిపై ధమ్తారి బైపాస్ సమీపంలోని ఖప్రీ గ్రామం వద్ద ఉదయం సుమారు 8 గంటల సమయంలో ఈ ప్రమాదం జరిగింది.
పోలీసుల వివరాల ప్రకారం, సెంట్రల్ రిజర్వ్ పోలీస్ ఫోర్స్కు చెందిన ఎలైట్ కోబ్రా యూనిట్లో పనిచేస్తున్న నలుగురు జవాన్లు, ఒక పౌర డ్రైవర్తో కలిసి బస్తర్ జిల్లా కేంద్రం జాగ్దల్పూర్ నుంచి రాయ్పూర్కు ప్రయాణిస్తున్నారు. సెలవుల నిమిత్తం స్వగ్రామాలకు వెళ్లే క్రమంలో ఈ ఘటన చోటుచేసుకుంది. వారి కారు రహదారి పక్కన నిలిపి ఉంచిన ట్రక్కును ఢీకొట్టినట్లు ప్రాథమిక సమాచారం. ఢీకొన్న ప్రభావం తీవ్రంగా ఉండటంతో ఇద్దరు అక్కడికక్కడే మృతి చెందగా, మరో ఇద్దరు ఆసుపత్రికి తరలిస్తుండగా ప్రాణాలు కోల్పోయారు. మృతుల్లో సౌరభ్ తోమర్, ముకేశ్ కుమార్, రాజ్కుమార్ గోడ్ అనే సీఆర్పీఎఫ్ సిబ్బంది, అలాగే డ్రైవర్ హీరాలాల్ నగర్ ఉన్నట్లు అధికారులు వెల్లడించారు.
మరో కోబ్రా కమాండో అభిమన్ రాయ్ (28) గాయాలతో రాయ్పూర్లో చికిత్స పొందుతున్నాడు. సివిల్ సర్జన్ అభిషేక్ టోండర్ తెలిపిన వివరాల ప్రకారం, ప్రమాదం తీవ్రత ఎక్కువగా ఉండటంతో రక్షణ చర్యలు వెంటనే చేపట్టినా నలుగురిని కాపాడలేకపోయామన్నారు. ప్రాథమికంగా డ్రైవర్ నిద్ర మత్తులో వాహనం నడిపి ఉండవచ్చని పోలీసులు అనుమానిస్తున్నారు. ఘటనపై కేసు నమోదు చేసి దర్యాప్తు ప్రారంభించారు. బస్తర్ ప్రాంతంలో నక్సలైట్ వ్యతిరేక చర్యల కోసం సీఆర్పీఎఫ్, కోబ్రా యూనిట్ విస్తృతంగా విధులు నిర్వహిస్తున్న నేపథ్యంలో ఈ ప్రమాదం భద్రతా దళాల్లో తీవ్ర విషాదాన్ని మిగిల్చింది.