చైనాతో కుదిరిన ఆ 'డీల్' ఏంటి? కేంద్రాన్ని ప్రశ్నించిన ఓవైసీ

భారత్-చైనా సరిహద్దు వివాదంపై ఎంఐఎం అధినేత, హైదరాబాద్ ఎంపీ అసదుద్దీన్ ఒవైసీ కేంద్ర ప్రభుత్వంపై తీవ్రస్థాయిలో విరుచుకుపడ్డారు. లడఖ్ సరిహద్దుల్లో ప్రస్తుత పరిస్థితిపై స్పష్టతనివ్వాలని డిమాండ్ చేస్తూ, చైనాతో ప్రభుత్వం ఎలాంటి ఒప్పందం చేసుకుందని ఆయన ప్రశ్నించారు.

చైనా సరిహద్దుల్లో ఏర్పడిన బఫర్ జోన్లు ఎంతకాలం కొనసాగుతాయో కేంద్రం స్పష్టత ఇవ్వాలని ఓవైసీ డిమాండ్ చేశారు. ఈ మేరకు ఆయన సామాజిక మాధ్యమం ‘ఎక్స్’ (మాజీ ట్విట్టర్)లో ప్రధాని కార్యాలయాన్ని ట్యాగ్ చేస్తూ పలు ప్రశ్నలు లేవనెత్తారు. చైనాతో మనం ఎలాంటి ఒప్పందం చేసుకున్నాం? ఏప్రిల్ 2020కు ముందు మన సైన్యం పర్యటించిన ప్రాంతాల్లో ఇప్పటికీ గస్తీ చేయగలుగుతోందా? లేకపోతే కారణం ఏమిటి? అని ఓవైసీ ప్రశ్నించారు.

ఇదే సందర్భంలో, చైనా పాకిస్థాన్‌కు సైనిక సహాయం అందించడాన్ని భారత్ అడ్డుకోగలిగిందా? ఒకవేళ అది సాధ్యం కాలేదంటే, చైనాతో స్నేహం వల్ల లాభం ఏమిటని ఆయన కేంద్రాన్ని నిలదీశారు. చైనా పాకిస్థాన్‌కు మిలిటరీ సపోర్ట్ ఇవ్వడం ఆపించలేకపోతే, మన స్నేహానికి అర్థం ఏంటి? అని వ్యాఖ్యానించారు.

అంతర్జాతీయ పత్రికలో వచ్చిన కథనాన్ని ప్రస్తావిస్తూ, కేంద్ర ప్రభుత్వం ఒక విదేశీ జర్నలిస్టును లడఖ్‌కు తీసుకెళ్లిందని, ఆ జర్నలిస్టు కథనం ప్రకారం 2020 తర్వాత లడఖ్ సరిహద్దులో చైనా మౌలిక వసతుల అభివృద్ధి రెండింతలు పెరిగిందని ఓవైసీ తెలిపారు. ఇలా జరుగుతుంటే మనం ఎలా అనుమతిస్తున్నాం? అని ప్రశ్నించారు.

చైనా విషయంలో కేంద్ర ప్రభుత్వం ఎందుకు భయపడుతోందని ఓవైసీ విమర్శించారు. చైనా సరిహద్దులో భారత సైన్యం కాల్పులు జరపకుండా అనేక పరిమితులు విధించారని ఆరోపించారు. అంతేకాకుండా, బఫర్ జోన్ల విషయంలో కూడా చైనా అభిప్రాయాన్నే లైన్ ఆఫ్ యాక్చువల్ కంట్రోల్ (ఎల్‌ఏసీ)కు ప్రామాణికంగా తీసుకున్నట్టు ప్రభుత్వం వ్యవహరిస్తోందని ఆయన మండిపడ్డారు.

దేశం, ప్రజల ప్రయోజనాల కోసం కేంద్ర ప్రభుత్వం సరైన నిర్ణయాలు తీసుకోవాలని ఓవైసీ సూచించారు. పార్లమెంట్ సజావుగా నడిచితేనే ప్రతిపక్షాలకు ఈ కీలక అంశాలపై ప్రశ్నలు లేవనెత్తే అవకాశం ఉంటుందని ఆయన అన్నారు. పార్లమెంట్ పనిచేయనిస్తే ఈ విషయాలపై చర్చ జరిగేది. కానీ రేపు కూడా సభ గందరగోళంలోనే ప్రధాని కార్యాలయం తరఫున ఒక ప్రకటన వస్తుందని అనుకుంటున్నాను అని వ్యాఖ్యానించారు.

ఇదిలా ఉండగా, లోక్‌సభలో ప్రభుత్వం, ప్రతిపక్షాల మధ్య ఘర్షణ మంగళవారం మరింత తీవ్రరూపం దాల్చింది. 2020 భారత్, చైనా ఘర్షణపై మాజీ సైన్యాధిపతి ఎం.ఎం. నరవణే రాసిన ప్రచురించని మెమాయర్ ను ప్రస్తావించిన కథనాన్ని ఉదహరించకుండా కాంగ్రెస్ నేత రాహుల్ గాంధీని రెండో రోజు కూడా అడ్డుకోవడంతో పరిస్థితి ఉద్రిక్తంగా మారింది. ఈ నిరసనల నేపథ్యంలో అశాస్త్రీయ ప్రవర్తన కారణంగా ఎనిమిది మంది ఎంపీలను సస్పెండ్ చేశారు.