చిదంబరం వ్యాఖ్యలు విద్వేషపూరితం: బీజేపీ అధ్యక్షులు రామచందర్
కాంగ్రెస్ సీనియర్ నాయకుడు పి. చిదంబరం చేసిన వివాదాస్పద వ్యాఖ్యలు, ఆంధ్రప్రదేశ్ ముఖ్యమంత్రి నారా చంద్రబాబు నాయుడు 'సూపర్మ్యాన్, హనుమంతుడి' పోలికలపై తెలంగాణ బీజేపీ రాష్ట్ర అధ్యక్షులు ఎన్. రామచందర్ రావు శనివారం స్పందించారు. ఈ సందర్భంగా ఆయన కాంగ్రెస్ తీరును ఎండగడుతూనే, భారతీయ పురాణాల గొప్పతనాన్ని చాటిచెప్పారు.
ఈ సందర్బంగా ఆయన మాట్లాడుతూ, బీజేపీపై ద్వేషభావంతోనే చిదంబరం ఈ వ్యాఖ్యలు చేశారని ఆయన ఆరోపించారు. బీజేపీ మహాత్మా గాంధీని రెండుసార్లు హత్య చేసిందని చిదంబరం అనడం అత్యంత తీవ్రమైన ఆరోపణ. ఇది పూర్తిగా అసత్యం, చరిత్రను వక్రీకరించడమే. దేశాన్ని ఏకం చేసిన గాంధీజీని రాజకీయ ప్రయోజనాల కోసం ఈ విధంగా ఉపయోగించుకోవడం బాధాకరం అని రాంచందర్రావు అన్నారు.
చిదంబరం ఆరోపణలు అవాస్తవం
గాంధీజీ హత్యకు సంబంధించిన విషయాలు దేశ చరిత్రలో స్పష్టంగా నమోదు అయ్యాయని, అందులో బీజేపీకి సంబంధం ఉందని చెప్పడం కేవలం రాజకీయ దూషణ మాత్రమేనని ఆయన స్పష్టం చేశారు. ఇటువంటి వ్యాఖ్యల ద్వారా కాంగ్రెస్ నేతలు ప్రజలను తప్పుదారి పట్టించేందుకు ప్రయత్నిస్తున్నారని, ముఖ్యంగా ఎన్నికల సమయంలో బీజేపీ ప్రతిష్ఠను దెబ్బతీయాలనే ఉద్దేశంతోనే ఈ రకమైన ఆరోపణలు చేస్తున్నారని ఆయన విమర్శించారు. దేశంలో అభివృద్ధి, పాలన వంటి అంశాలపై చర్చించలేకపోతున్న కాంగ్రెస్ నేతలు, వ్యక్తిగత దూషణలకు దిగుతున్నారని ఆయన వ్యాఖ్యానించారు.
హనుమంతుడే సూపర్మ్యాన్కు స్ఫూర్తి
అదే విధంగా ఆంధ్రప్రదేశ్ ముఖ్యమంత్రి ఎన్. చంద్రబాబు నాయుడు చేసిన వ్యాఖ్యలపై కూడా రాంచందర్రావు స్పందించారు. హనుమంతుడు సూపర్మ్యాన్ కంటే గొప్పవాడని చంద్రబాబు నాయుడు చెప్పడంలో ఎలాంటి తప్పు లేదు. నిజానికి సూపర్మ్యాన్ అనే పాత్ర హనుమంతుడి నుంచి ప్రేరణ పొందిందే అని ఆయన అభిప్రాయపడ్డారు. భారతీయ పురాణాలు, ఇతిహాసాల్లో ఉన్న శక్తివంతమైన పాత్రలే ప్రపంచవ్యాప్తంగా అనేక సూపర్హీరో క్యారెక్టర్లకు ప్రేరణగా నిలిచాయని ఆయన అన్నారు.
మన సంస్కృతి, సంప్రదాయాలు, పురాణాలు ఎంతో లోతైన తాత్విక విలువలను కలిగి ఉన్నాయని, వాటిని తక్కువ చేసి చూడడం సరికాదని రాంచందర్రావు స్పష్టం చేశారు. పాశ్చాత్య దేశాల్లో రూపొందిన అనేక కల్పిత పాత్రలు భారతీయ పురాణాల్లోని దేవతలు, వీరుల లక్షణాలను ఆధారంగా తీసుకున్నవేనని చెప్పారు. ఈ నేపథ్యంలో చంద్రబాబు చేసిన వ్యాఖ్యలను వివాదాస్పదం చేయాల్సిన అవసరం లేదని ఆయన అన్నారు.
మొత్తంగా చూస్తే, దేశ చరిత్ర, సంస్కృతి అంశాలను రాజకీయ లాభనష్టాల కోణంలో కాకుండా, బాధ్యతాయుతంగా మాట్లాడాలని అన్ని పార్టీల నేతలకు రాంచందర్రావు సూచించారు. ప్రజల సమస్యలపై దృష్టి పెట్టకుండా, అనవసర వ్యాఖ్యలతో రాజకీయ వాతావరణాన్ని కలుషితం చేయడం మంచిది కాదని ఆయన హెచ్చరించారు.