చారిత్రక కనిష్టానికి రూపాయి పతనం: కేంద్రంపై ఆదిత్య థాకరే నిప్పులు
భారత కరెన్సీ రూపాయి విలువ అంతర్జాతీయ మార్కెట్లో నిలువునా కుప్పకూలింది. శుక్రవారం ట్రేడింగ్లో అమెరికన్ డాలర్తో పోలిస్తే రూపాయి మునుపెన్నడూ లేని విధంగా ఆల్టైమ్ కనిష్ట స్థాయికి పడిపోయింది. ఒక దశలో డాలర్ విలువ 92 రూపాయలకు చేరువ కావడంతో దేశీయ ఆర్థిక వర్గాల్లో ఆందోళన మొదలైంది. చివరకు రూపాయి స్వల్పంగా కోలుకుని 91.88 వద్ద ముగిసినప్పటికీ, ఈ పతనం ఇప్పుడు పెద్ద రాజకీయ దుమారానికి దారితీసింది.
రూపాయి పతనానికి ప్రధాన కారణాలివే..
ప్రస్తుతం రూపాయి ఇంతలా బలహీనపడటానికి ప్రధానంగా అంతర్జాతీయ పరిణామాలు కారణమని ఆర్థిక నిపుణులు విశ్లేషిస్తున్నారు. ప్రపంచవ్యాప్తంగా నెలకొన్న భౌగోళిక ఉద్రిక్తతలు అనిశ్చితి కారణంగా పెట్టుబడిదారులు తమ నిధులను సురక్షితమైన ఆస్తుల వైపు మళ్లిస్తున్నారు. దీనివల్ల భారత మార్కెట్ల నుండి విదేశీ సంస్థాగత పెట్టుబడిదారులు భారీగా నిధులను ఉపసంహరించుకుంటున్నారు. మరోవైపు, అమెరికా ఆర్థిక వ్యవస్థ బలంగా ఉండటంతో గ్లోబల్ మార్కెట్లో డాలర్ ఇండెక్స్ బలపడింది. చమురు ధరల పెరుగుదల పెరుగుతున్న దిగుమతి ఖర్చులు కూడా రూపాయిపై తీవ్ర ఒత్తిడిని పెంచుతున్నాయి.
కేంద్రం మౌనంపై ఆదిత్య థాకరే మండిపాటు
రూపాయి పతనంపై శివసేన (యుబిటి) నాయకుడు ఆదిత్య థాకరే కేంద్ర ప్రభుత్వంపై తీవ్రస్థాయిలో విరుచుకుపడ్డారు. గతంలో రూపాయి విలువ 40 వద్ద ఉన్నప్పుడే గగ్గోలు పెట్టిన బిజెపి నేతలు, ఇప్పుడు 92కు చేరువవుతున్నా ఎందుకు మౌనంగా ఉన్నారని ఆయన ప్రశ్నించారు.
"ప్రపంచంలోనే అత్యంత అధ్వాన్నంగా పనిచేస్తున్న కరెన్సీలలో ఒకటిగా రూపాయి నిలిచింది. 40 వద్ద ఉన్నప్పుడే దేశవ్యాప్త ఆందోళనలు సృష్టించిన బిజెపి సభ్యులు, ఇప్పుడు 91.99 మార్కు దాటుతున్నా కనీసం ప్రజలకు వివరణ ఇచ్చే ధైర్యం చేయడం లేదు. ఇది వారి విఫల పాలనకు నిదర్శనం," అని థాకరే ఎద్దేవా చేశారు.
కాగా, ఆదిత్య థాకరే మహారాష్ట్ర మాజీ ముఖ్యమంత్రి ఉద్ధవ్ థాకరే కుమారుడు, శివసేన వర్గానికి చెందిన కీలక యువ నాయకుడు. ఆయన ప్రస్తుతం ముంబైలోని వర్లి నియోజకవర్గం నుండి ఎమ్మెల్యేగా ప్రాతినిధ్యం వహిస్తున్నారు. గత మహా వికాస్ అఘాడీ ప్రభుత్వంలో పర్యాటక పర్యావరణ శాఖ మంత్రిగా పనిచేసిన ఆయన, థాకరే కుటుంబం నుండి ప్రత్యక్ష ఎన్నికల్లో పోటీ చేసి గెలిచిన మొదటి వ్యక్తిగా గుర్తింపు పొందారు. యువతలో మంచి పట్టున్న నాయకుడిగా పేరున్న ఆదిత్య, పర్యావరణ పరిరక్షణ, పట్టణాభివృద్ధి అంశాలపై నిరంతరం తన గళాన్ని వినిపిస్తూ, కేంద్ర, రాష్ట్ర ప్రభుత్వాల విధానాలను క్షేత్రస్థాయిలో ఎండగడుతుంటారు.
దేశ ప్రతిష్ట ఎక్కడుంది
రూపాయి పతనంపై ప్రతిపక్ష కాంగ్రెస్ పార్టీ తీవ్రంగా స్పందిస్తూ, దేశ ఆర్థిక వ్యవస్థ "ఐసియు"లో ఉందని విమర్శించింది. ప్రధాని మోదీ గతంలో రూపాయి విలువ పడిపోవడాన్ని దేశ ప్రతిష్టతో ముడిపెట్టారని, మరి ఇప్పుడు రూపాయి 92కు చేరువవుతుంటే దేశ ప్రతిష్ట ఎక్కడుందని కాంగ్రెస్ నేతలు ప్రశ్నించారు.
మరోవైపు, అధికార బీజేపీ ఈ ఆరోపణలను తిప్పికొట్టింది. ప్రపంచవ్యాప్తంగా నెలకొన్న యుద్ధ వాతావరణం అమెరికా ఆర్థిక విధానాల వల్ల అన్ని దేశాల కరెన్సీలు బలహీనపడుతున్నాయని, ఇతర అభివృద్ధి చెందుతున్న దేశాల కరెన్సీలతో పోలిస్తే రూపాయి పరిస్థితి మెరుగ్గానే ఉందని బీజేపీ ప్రతినిధులు సమర్థించుకున్నారు. ఆర్థిక మంత్రిత్వ శాఖ త్వరలోనే దీనిపై సమగ్ర ప్రకటన చేసే అవకాశం ఉందని వారు పేర్కొన్నారు.
ఆర్థిక స్థిరత్వంపై నీలినీడలు
రూపాయి విలువ నిరంతరాయంగా పడిపోతుండటం వల్ల దేశంలో ద్రవ్యోల్బణం పెరిగే అవకాశం ఉందని నిపుణులు హెచ్చరిస్తున్నారు. దిగుమతి చేసుకునే వస్తువులు, ముఖ్యంగా ముడి చమురు, ఎలక్ట్రానిక్ వస్తువుల ధరలు పెరిగి సామాన్యుడిపై భారం పడే ప్రమాదం ఉంది. ప్రస్తుతం రిజర్వ్ బ్యాంక్ ఆఫ్ ఇండియా, కేంద్ర ఆర్థిక శాఖ ఈ పరిణామాలను నిశితంగా గమనిస్తున్నాయని, రూపాయిని నిలబెట్టేందుకు తగిన చర్యలు తీసుకుంటారని మార్కెట్ వర్గాలు భావిస్తున్నాయి.