చలికి ఉత్తరాది గజగజ

ఉత్తర భారతదేశమంతా ప్రస్తుతం ఎముకలు కొరికే చలి గుప్పిట్లో చిక్కుకుంది. పంజాబ్, హర్యానా, రాజస్థాన్, బీహార్ వంటి రాష్ట్రాల్లో కనిష్ట ఉష్ణోగ్రతలు దారుణంగా పడిపోవడంతో సాధారణ జనజీవనం స్తంభించిపోయింది. ఈ ప్రాంతాల్లో చలి తీవ్రత అసాధారణంగా పెరిగింది. పంజాబ్, హర్యానా రాష్ట్రాలలో శుక్రవారం అత్యల్పంగా ఫరీద్‌కోట్‌లో 3.0 డిగ్రీల సెల్సియస్ నమోదైంది. బఠిండాలో 3.2, హర్యానాలోని నర్నౌల్‌లో 3.5, హిస్సార్‌లో 3.7 డిగ్రీల సెల్సియస్ ఉష్ణోగ్రతలు నమోదయ్యాయి. ఈ రెండు రాష్ట్రాల రాజధాని అయిన చండీగఢ్ కూడా 6.1 డిగ్రీల సెల్సియస్ చలితో గజగజ వణికింది. ఈ తీవ్రమైన చలి కారణంగా ఉదయం వేళల్లో ప్రజలు ఇళ్ల నుంచి బయటకు రావడానికి ఇబ్బంది పడుతున్నారు. భారత వాతావరణ శాఖ (ఐఎండీ) కూడా పంజాబ్, హర్యానా, తూర్పు రాజస్థాన్, జార్ఖండ్‌లలో చలిగాలుల వీచే అవకాశం ఉందని హెచ్చరికలు జారీ చేసింది.

చలి తీవ్రతను పరిశీలిస్తే, రాజస్థాన్‌లో పరిస్థితి మరీ దారుణంగా ఉంది. సికిర్ జిల్లాలోని ఫతేపూర్ రాష్ట్రంలోనే అత్యల్పంగా కేవలం 1.9 డిగ్రీల సెల్సియస్ కనిష్ట ఉష్ణోగ్రతను నమోదు చేసింది. రాజస్థాన్‌లోని చాలా ప్రాంతాలలో కనిష్ట ఉష్ణోగ్రతలు 10 డిగ్రీల సెల్సియస్ కంటే తక్కువగా నమోదవుతున్నాయి. బీహార్ రాష్ట్రంలో రాబోయే 2-3 రోజులు ఉష్ణోగ్రతలు మరో 2 నుండి 4 డిగ్రీల సెల్సియస్ వరకు పడిపోయే అవకాశం ఉందని వాతావరణ శాఖ హెచ్చరించింది. డిసెంబర్ 15 తర్వాత చలి పతాక స్థాయికి చేరే అవకాశం ఉందని, గంటకు 40 కిలోమీటర్ల వేగంతో చలిగాలులు వీస్తాయని బీహార్ వాతావరణ కేంద్రం తెలిపింది. బీహార్‌లోని చాలా జిల్లాల్లో కనిష్ట ఉష్ణోగ్రతలు ఇప్పటికే 10 డిగ్రీల సెల్సియస్ కంటే తక్కువగా నమోదవుతున్నాయి. దట్టమైన పొగమంచు కారణంగా ఉదయం పూట రహదారులపై విజిబిలిటీ 50-200 మీటర్లకు తగ్గి, ప్రమాదాలు జరిగే అవకాశం ఉందని అధికారులు ప్రజలను అప్రమత్తం చేశారు.

అయితే ఉత్తరాదిలోని కొన్ని ప్రాంతాల్లో చలి తీవ్రత పెరిగినా, కశ్మీర్‌లో మాత్రం వాతావరణం కాస్త మెరుగుపడింది. అక్కడ రాత్రి ఉష్ణోగ్రతలు సాధారణం కంటే పెరగడంతో ప్రజలకు ఉపశమనం లభించింది. శ్రీనగర్‌లో శుక్రవారం అత్యల్ప ఉష్ణోగ్రత 0.4 డిగ్రీల సెల్సియస్ వద్ద నమోదు కాగా, ముందు రోజు రాత్రి నమోదైన మైనస్ 4 డిగ్రీల సెల్సియస్‌తో పోలిస్తే ఇది చాలా మెరుగుదల. అయినప్పటికీ, కశ్మీర్‌లోని పుల్వామా జిల్లాలోని కోనిబాల్‌లో అత్యల్పంగా మైనస్ 3.0 డిగ్రీల సెల్సియస్ ఉష్ణోగ్రత నమోదైంది. మరోవైపు దేశంలోని ఇతర ప్రాంతాలైన తమిళనాడు, పుదుచ్చేరి, కారైకల్‌లలో భారీ వర్షాలు, ఉరుములు, మెరుపులతో కూడిన వాతావరణం ఉంటుందని వాతావరణ శాఖ అంచనా వేసింది. చలి కారణంగా ఢిల్లీ-ఎన్‌సీఆర్ ప్రాంతంలో గాలి నాణ్యత కూడా దారుణంగా పడిపోయింది. శుక్రవారం ఏక్యూఐ 325 వద్ద 'వెరీ పూర్' కేటగిరీలో నమోదైంది. ఈ నేపథ్యంలో ప్రజలందరూ ముఖ్యంగా చిన్న పిల్లలు, వృద్ధులు అప్రమత్తంగా ఉంటూ తగిన జాగ్రత్తలు తీసుకోవాలని అధికారులు సూచిస్తున్నారు.