చండీఘర్ యూనివర్సిటీకి చెందిన 18 మంది విద్యార్థులకు 'నాసా సిటిజన్ సైంటిస్ట్' గుర్తింపు

అంతరిక్ష పరిశోధన రంగంలో భారతీయ విద్యార్థులు మరో అద్భుతమైన మైలురాయిని అధిగమించారు. చండీఘర్ యూనివర్సిటీకి చెందిన 18 మంది విద్యార్థులు తమ అసాధారణ మేధస్సుతో 'నాసా సిటిజన్ సైంటిస్ట్' హోదాను దక్కించుకున్నారు. అమెరికాకు చెందిన అంతరిక్ష పరిశోధనా సంస్థ నాసా మద్దతుతో నిర్వహించిన అంతర్జాతీయ కార్యక్రమంలో వీరు ఈ గౌరవాన్ని పొందారు.

రెండు కొత్త గ్రహశకలాల ఆవిష్కరణ

ఈ ఘనత కేవలం గుర్తింపుతోనే ఆగిపోలేదు. విద్యార్థుల బృందం తమ పరిశోధనలో భాగంగా అంతరిక్షంలో ఇప్పటివరకు ఎవరూ గుర్తించని రెండు కొత్త గ్రహశకలాలను కనుగొన్నారు. వీటికి తాత్కాలికంగా ‘డిఐవి /1111’, ‘ఏఎన్‌సి /0505’ అని నామకరణం చేశారు. విద్యార్థి దశలోనే అంతరిక్ష వస్తువులను కనుగొనడం గ్లోబల్ స్పేస్ రీసెర్చ్‌లో ఒక పెద్ద విజయంగా భావిస్తున్నారు.

ఇంటర్నేషనల్ ఆస్ట్రాయిడ్ సెర్చ్ క్యాంపెయిన్

ఈ పరిశోధన అంతా ఇంటర్నేషనల్ ఆస్ట్రాయిడ్ సెర్చ్ క్యాంపెయిన్ ఆధ్వర్యంలో జరిగింది. ఇది నాసా సహకారంతో నడిచే ఒక ప్రతిష్టాత్మక 'సిటిజన్ సైన్స్' కార్యక్రమం. ఇందులో భాగంగా ప్రపంచవ్యాప్తంగా ఎంపిక చేసిన విద్యార్థులకు అసలైన అంతరిక్ష డేటాను అందిస్తారు, తద్వారా వారు కొత్త గ్రహశకలాలను కనిపెట్టే అవకాశం పొందుతారు.

చండీగఢ్ యూనివర్సిటీ ఆస్ట్రానమీ క్లబ్‌కు చెందిన మొత్తం 26 మంది విద్యార్థులు ఈ కార్యక్రమంలో పాల్గొన్నారు. సుమారు 45 రోజుల పాటు వీరు లోతైన అంతరిక్ష డేటాను విశ్లేషించారు. అత్యంత క్లిష్టమైన ఖగోళ చిత్రాలను పరిశీలిస్తూ, గ్రహశకలాల కదలికలను గుర్తించడంలో నిమగ్నమయ్యారు. చివరికి వీరిలో 18 మంది విద్యార్థులు నాసా ప్రమాణాల మేరకు ఫలితాలను సాధించి సర్టిఫికేట్లు పొందారు.

ఈ అన్వేషణ కోసం విద్యార్థులు 'ఆస్ట్రోమెట్రికా' అనే ప్రత్యేకమైన సాఫ్ట్‌వేర్‌ను ఉపయోగించారు. నాసా మద్దతు ఉన్న ప్రపంచంలోని అత్యంత అధునాతన స్కై-సర్వే టెలిస్కోప్ వ్యవస్థలలో ఒకటైన 'పాన్-స్టార్స్' రూపొందించిన అసలైన ఖగోళ డేటాను వీరు విశ్లేషించారు. భూమికి సమీపంలో ఉన్న వస్తువులు, మెయిన్ బెల్ట్ గ్రహశకలాలను పరిశీలించడంలో వీరు చేసిన కృషికి గానూ ఈ ప్రతిష్టాత్మక గుర్తింపు లభించింది. అధిక రిజల్యూషన్ కలిగిన టెలిస్కోప్ చిత్రాలను విశ్లేషించడం ద్వారా వీరు సమర్పించిన ఖచ్చితమైన కొలతలు గ్లోబల్ ఆస్ట్రాయిడ్ ట్రాకింగ్ మరియు ప్లానెటరీ డిఫెన్స్ (గ్రహ రక్షణ) పరిశోధనలకు ఎంతగానో తోడ్పడతాయి.

వివిధ విభాగాల విద్యార్థుల భాగస్వామ్యం

ఈ పరిశోధనలో పాల్గొన్న విద్యార్థుల బృందాలు ఐఏఎస్‌సీ మార్గదర్శకాల ప్రకారం నివేదికలను సమర్పించాయి. నాసా సిటిజన్ సైంటిస్టులుగా గుర్తింపు పొందిన ఈ 18 మంది విద్యార్థులలో 15 మంది ఏరోస్పేస్ ఇంజనీరింగ్ విభాగం నుండి, ఇద్దరు సైన్స్ విభాగం నుండి ఒకరు కంప్యూటర్ సైన్స్ ఇంజనీరింగ్ నుండి ఉన్నారు.

విద్యార్థులు చేసిన ఈ పరిశోధన భవిష్యత్తులో భూమికి పొంచి ఉన్న గ్రహశకలాల ముప్పును గుర్తించడానికి ఉపయోగపడుతుంది. భూమికి సమీపంలో ఉన్న వస్తువులను ట్రాక్ చేయడం ద్వారా అంతరిక్ష రక్షణలో వీరు భాగస్వాములయ్యారు. ఈ డేటా నాసా తన అంతరిక్ష రక్షణ ప్రణాళికలను రూపొందించుకోవడంలో సహాయపడుతుంది.

దేశానికే గర్వకారణం - మేనేజ్మెంట్ హర్షం

నాసా సిటిజన్ సైంటిస్ట్ గుర్తింపు పొందడం అంటే, విద్యార్థుల అన్వేషణలు అంతర్జాతీయ శాస్త్రీయ ప్రమాణాలకు అనుగుణంగా ఉన్నాయని అర్థం. ఈ గౌరవం వారిని ప్రపంచ అంతరిక్ష శాస్త్ర సమాజంలో ఒక ప్రత్యేక స్థానంలో నిలబెట్టింది. నిజమైన అంతరిక్ష పరిశీలన, ఖగోళ ఆవిష్కరణలలో గణనీయమైన సహకారం అందించిన అతికొద్ది మంది గ్లోబల్ గ్రూపులో వీరు చేరారు.

చండీఘర్ యూనివర్సిటీ విద్యార్థుల అద్భుత విజయానికి హర్షం వ్యక్తం చేస్తూ, సీనియర్ మేనేజింగ్ డైరెక్టర్ దీప్ ఇందర్ సింగ్ సంధు అభినందనలు తెలిపారు. "ఈ విజయం కేవలం చండీగఢ్ యూనివర్సిటీకే కాదు, ప్రపంచ అంతరిక్ష శాస్త్ర పరిశోధనలో విస్తరిస్తున్న భారతదేశ ముద్రకు కూడా గర్వకారణం. విద్యార్థులు అసలైన శాస్త్రీయ డేటా అధునాతన విశ్లేషణాత్మక సాధనాలతో పనిచేసేలా ప్రోత్సహించడం ద్వారా మా విశ్వవిద్యాలయం స్టెమ్ రంగంలో ఎక్సలెన్స్ హబ్‌గా తన స్థానాన్ని బలోపేతం చేసుకుంది," అని ఆయన అన్నారు.

"18 మంది విద్యార్థులకు లభించిన ఈ గుర్తింపు దేశవ్యాప్తంగా ఉన్న యువ శాస్త్రవేత్తలకు పరిశోధకులకు గొప్ప స్ఫూర్తినిస్తుంది. అంకితభావం, సరైన మార్గదర్శకత్వం ఉంటే విద్యార్థి దశలోనే ప్రపంచ గుర్తింపు పొందవచ్చని ఇది నిరూపించింది. ఖగోళ శాస్త్రం, అంతరిక్ష శాస్త్రం అభివృద్ధి చెందుతున్న సాంకేతిక రంగాలలో మరిన్ని అవకాశాలను విస్తరించడానికి మా విశ్వవిద్యాలయం కట్టుబడి ఉంది," అని సంధు అన్నారు.

ఐఏఎస్‌సీ అంటే ..

ఇంటర్నేషనల్ ఆస్ట్రాయిడ్ సెర్చ్ క్యాంపెయిన్ అనేది నాసా అనుబంధంతో నడిచే ప్రపంచ ఖగోళ సిటిజన్-సైన్స్ ప్రోగ్రామ్. ఇది ప్రపంచవ్యాప్తంగా ఉన్న విద్యార్థులకు ఔత్సాహిక ఖగోళ శాస్త్రవేత్తలకు నిజమైన టెలిస్కోప్ డేటాను అందిస్తుంది. దీని ద్వారా పాల్గొనేవారు ప్రొఫెషనల్ ఖగోళ సాధనాలతో పనిచేసే అనుభవాన్ని పొందుతారు. అంతర్జాతీయ శాస్త్రీయ ప్రమాణాలకు అనుగుణంగా విశ్లేషణలు చేసిన విద్యార్థులను నాసా అధికారికంగా గుర్తిస్తుంది.

చండీఘర్ యూనివర్సిటీ గురించి..

చండీఘర్ యూనివర్సిటీ నాక్ ఏ+ గ్రేడ్, క్యూఎస్ వరల్డ్ ర్యాంకింగ్ పొందిన విశ్వవిద్యాలయం. పంజాబ్ రాష్ట్రంలోని చండీఘర్ సమీపంలో ఉన్న ఈ స్వయంప్రతిపత్తి కలిగిన విద్యా సంస్థ యూ జీ సి ఆమోదం పొందింది. ఇది భారతదేశంలోని అత్యంత తక్కువ వయస్సు గల విశ్వవిద్యాలయాల్లో ఒకటి. నాక్ ద్వారా ఏ+ గ్రేడ్ పొందిన పంజాబ్‌లోని ఏకైక ప్రైవేట్ విశ్వవిద్యాలయం. ఇంజనీరింగ్, మేనేజ్మెంట్, ఫార్మసీ, లా వంటి అనేక రంగాలలో 109 కి పైగా కోర్సులను అందిస్తోంది.