గ్రీన్లాండ్ విలీనం కోసం అమెరికా బిల్లు
ప్రపంచంలోనే అతిపెద్ద ద్వీపమైన గ్రీన్లాండ్ను అమెరికాలో విలీనం చేసే దిశగా అడుగులు పడుతున్నాయి. డెన్మార్క్ స్వయంప్రతిపత్తి కలిగిన భూభాగమైన గ్రీన్లాండ్ను అమెరికా స్వాధీనం చేసుకోవడానికి, ఆ తర్వాత దానికి అధికారికంగా రాష్ట్ర హోదా కల్పించడానికి వీలు కల్పించే ‘గ్రీన్లాండ్ అనెక్సేషన్ అండ్ స్టేట్హుడ్ యాక్ట్’ను రిపబ్లికన్ కాంగ్రెస్ సభ్యుడు రౌండీ ఫైన్ సోమవారం అమెరికా కాంగ్రెస్లోని దిగువ సభ అయిన ప్రతినిధుల సభలో అధికారికంగా ప్రవేశపెట్టారు. అమెరికా అధ్యక్షుడిగా బాధ్యతలు చేపట్టిన డొనాల్డ్ ట్రంప్ ఆశయాలకు అనుగుణంగా ఈ బిల్లును రూపొందించారు.
అధ్యక్షుడికి సర్వాధికారాలు
ఈ బిల్లు గురించి రౌండీ ఫైన్ తన 'ఎక్స్' వేదికగా స్పందిస్తూ.. "ఇది ఒక గొప్ప వార్త! గ్రీన్లాండ్ను అమెరికా యూనియన్లో చేర్చుకోవడానికి అధ్యక్షుడికి అవసరమైన అన్ని మార్గాలను అన్వేషించేలా, అధికారాలను కల్పించేలా ఈ బిల్లును ప్రవేశపెట్టినందుకు గర్వపడుతున్నాను" అని పేర్కొన్నారు. గ్రీన్లాండ్ను అమెరికా భూభాగంగా మార్చడం ద్వారా వచ్చే శతాబ్ద కాలం పాటు ఆర్కిటిక్ ప్రాంతంపై అమెరికా తన ఆధిపత్యాన్ని కొనసాగించవచ్చని ఆయన అభిప్రాయపడ్డారు.
చైనా, రష్యాల కన్ను.. అమెరికా అప్రమత్తం
ఆర్కిటిక్ ప్రాంతంలో అమెరికా ప్రత్యర్థి దేశాలు పట్టు సాధించేందుకు ప్రయత్నిస్తున్నాయని, దాన్ని ఎట్టి పరిస్థితుల్లోనూ అనుమతించబోమని ఫైన్ స్పష్టం చేశారు. రష్యా, చైనా వంటి దేశాలు గ్రీన్లాండ్ వైపు కన్నేస్తున్నాయని, అమెరికా ఆధిపత్యం దెబ్బతినకుండా ఉండాలంటే గ్రీన్లాండ్ను స్వాధీనం చేసుకోవడం ఒక్కటే మార్గమని ఆయన వెల్లడించారు. అమెరికా విదేశాంగ మంత్రి మార్కో రూబియో కూడా ఇదే అభిప్రాయాన్ని వ్యక్తం చేస్తున్నారని ఆయన గుర్తు చేశారు.
వైట్ హౌస్ కీలక వ్యాఖ్యలు
గ్రీన్లాండ్ విషయంలో ప్రెసిడెంట్ ట్రంప్ ఆలోచనలను వైట్ హౌస్ ప్రెస్ సెక్రటరీ కరోలిన్ లెవిట్ మీడియాకు వివరించారు. "గ్రీన్లాండ్ భద్రత అమెరికా, యూరోపియన్ దేశాలకు అత్యంత కీలకం. మనం గ్రీన్లాండ్ను స్వాధీనం చేసుకోకపోతే, భవిష్యత్తులో శత్రు దేశాలు దాన్ని బలవంతంగా ఆక్రమించుకునే ప్రమాదం ఉంది. అది ప్రపంచ భద్రతకే ముప్పు" అని ఆమె పేర్కొన్నారు.
గ్రీన్లాండ్ను స్వాధీనం చేసుకోవడానికి డెన్మార్క్తో చర్చలు జరపడానికి లేదా అవసరమైన ఏ ఇతర చర్యలైనా తీసుకోవడానికి ఈ బిల్లు అధ్యక్షుడికి అధికారాన్ని ఇస్తుంది. అమెరికాలో భాగం కావడం వల్ల కేవలం అమెరికాకే కాకుండా, గ్రీన్లాండ్కు కూడా ఎంతో మేలు జరుగుతుందని ట్రంప్ భావిస్తున్నారు. గ్రీన్లాండ్ స్వాధీనం ఎప్పటిలోగా పూర్తి చేయాలనే దానిపై ప్రస్తుతం ఎటువంటి డెడ్లైన్ విధించలేదు, కానీ ఇది ప్రభుత్వానికి ఒక ప్రాధాన్యతా అంశమని లెవిట్ స్పష్టం చేశారు.
అమెరికాకు గ్రీన్ ల్యాండ్ ఎందుకు?
గ్రీన్ల్యాండ్ ఆర్కిటిక్ ప్రాంతంలో అమెరికా రక్షణకు కంచుకోట వంటిది. ఇక్కడ ఇప్పటికే ఉన్న 'థూలే ఎయిర్ బేస్' ద్వారా రష్యా క్షిపణులను పసిగట్టడం, అంతరిక్ష పర్యవేక్షణ చేయడం అమెరికాకు సులువవుతుంది. అలాగే గ్రీన్ల్యాండ్లో అపారంగా ఉన్న అరుదైన భూలోహ ఖనిజాలు (రేర్ ఎర్త్ ఎలిమెంట్స్), చమురు, యురేనియం నిల్వలు అమెరికా టెక్నాలజీ, రక్షణ రంగాలకు అత్యంత కీలకం. ముఖ్యంగా ఈ ఖనిజాల సరఫరాలో చైనా గుత్తాధిపత్యాన్ని దెబ్బతీయడానికి, భవిష్యత్తులో మంచు కరిగి ఏర్పడే కొత్త సముద్ర వాణిజ్య మార్గాలపై పట్టు సాధించడానికి గ్రీన్ల్యాండ్ స్వాధీనం అమెరికాకు ఒక వ్యూహాత్మక అవసరం.
మరోవైపు గ్రీన్ల్యాండ్లో చైనా, రష్యాల ప్రభావం పెరిగితే అది అమెరికా జాతీయ భద్రతకు నేరుగా ముప్పుగా మారుతుంది. చైనా తన ఆర్థిక పెట్టుబడుల ద్వారా, రష్యా తన సైనిక చర్యల ద్వారా ఇక్కడ పట్టు సాధిస్తే అమెరికా రాడార్ వ్యవస్థలు దెబ్బతినే ప్రమాదం ఉంది. ఒకవేళ అమెరికా బలవంతంగా స్వాధీనం చేసుకుంటే డెన్మార్క్, యూరోపియన్ యూనియన్తో దౌత్య సంబంధాలు దెబ్బతినడంతో పాటు పర్యావరణపరంగా తీవ్ర విమర్శలు ఎదుర్కోవాల్సి వస్తుంది. అందుకే ప్రత్యర్థుల ఆధిపత్యాన్ని అడ్డుకుంటూ, ఆర్కిటిక్ ప్రాంతంలో తన ప్రాబల్యాన్ని శాశ్వతం చేసుకోవాలని అమెరికా భావిస్తోంది.