గోల్కొండలో ఘనంగా బోనాల ప్రారంభం.. తొలి బోనం సమర్పించిన మంత్రులు!

హైదరాబాద్‌లో ఆషాఢ మాస బోనాల మహోత్సవాలు అత్యంత వైభవంగా ప్రారంభమయ్యాయి. తెలంగాణ సంస్కృతి, సంప్రదాయాలకు ప్రతీకగా నిలిచే బోనాల పండుగ సందర్భంగా ప్రభుత్వం తరఫున పలుచోట్ల ప్రత్యేక పూజలు నిర్వహించారు. రాష్ట్ర ప్రభుత్వం తరఫున మంత్రులు కనకాల కట్ట మైసమ్మ అమ్మవారికి, అనంతరం గోల్కొండ జగదాంబ మహంకాళి అమ్మవారికి పట్టు వస్త్రాలు సమర్పించి ప్రత్యేక పూజలు నిర్వహించారు. వేలాది మంది భక్తులు, మహిళలు, కళాకారులు, పోతురాజులు పాల్గొనడంతో నగరం ఆధ్యాత్మిక శోభతో కళకళలాడింది.

ఆషాఢ మాస బోనాల పండుగలో తొలి ఘట్టమైన లోయర్ ట్యాంక్ బండ్ వద్ద కుమ్మర్ల తొలి బోనం కార్యక్రమం భక్తిశ్రద్ధల మధ్య జరిగింది. కనకాల కట్ట మైసమ్మ అమ్మవారికి రాష్ట్ర ప్రభుత్వం తరఫున మంత్రి పొన్నం ప్రభాకర్, సహచర మంత్రి కొండా సురేఖ కలిసి ప్రత్యేక పూజలు నిర్వహించి తొలి బోనం సమర్పించారు. వేద పండితులు మంత్రోచ్ఛారణల మధ్య ఆలయ ఆచార సంప్రదాయాల ప్రకారం పూజలు నిర్వహించగా, మంత్రులు అమ్మవారి ఆశీస్సులు తీసుకుని రాష్ట్ర ప్రజల సుఖసంతోషాలు, వర్షాలు సమృద్ధిగా కురవాలని ప్రార్థించారు.

ఈ సందర్భంగా మంత్రి పొన్నం ప్రభాకర్ మాట్లాడుతూ తెలంగాణ సంస్కృతికి బోనాల పండుగ జీవం లాంటిదని అన్నారు. అమ్మవారి కటాక్షంతో రాష్ట్ర ప్రజలందరూ సుఖశాంతులతో ఉండాలని కోరుకుంటున్నామని తెలిపారు. ప్రతి ఏడాది ప్రభుత్వం బోనాల ఉత్సవాలను ఘనంగా నిర్వహించేందుకు అన్ని ఏర్పాట్లు చేస్తోందని పేర్కొన్నారు. భక్తులకు ఎలాంటి అసౌకర్యం కలగకుండా అన్ని శాఖలు సమన్వయంతో పనిచేస్తున్నాయని చెప్పారు.

తొలి బోనం కార్యక్రమంలో రాజ్యసభ సభ్యుడు ఆర్. కృష్ణయ్య, ఎమ్మెల్యేలు దానం నాగేందర్‌తో పాటు పలువురు ప్రజాప్రతినిధులు, అధికారులు, భక్తులు పాల్గొన్నారు.

అనంతరం గోల్కొండ బోనాల ప్రారంభోత్సవాల్లో భాగంగా లంగర్ హౌస్ చౌరస్తాలోని శ్రీ శ్రీ శ్రీ గోల్కొండ జగదాంబ మహంకాళి అమ్మవారి ఆలయానికి రాష్ట్ర ప్రభుత్వం తరఫున పట్టు వస్త్రాలు సమర్పించారు. మంత్రి పొన్నం ప్రభాకర్, మంత్రి కొండా సురేఖ కలిసి అమ్మవారికి పట్టు వస్త్రాలు సమర్పించి ప్రత్యేక పూజలు నిర్వహించారు. ఆలయ అర్చకులు సంప్రదాయబద్ధంగా పూజలు నిర్వహించి మంత్రులకు తీర్థప్రసాదాలు అందజేశారు.

పోతురాజులతో నర్తించిన మంత్రి

గోల్కొండ బోనాల ఉత్సవాల్లో పోతురాజుల విన్యాసాలు ప్రత్యేక ఆకర్షణగా నిలిచాయి. మంత్రి పొన్నం ప్రభాకర్ పోతురాజులతో కలిసి సంప్రదాయ నృత్యం చేస్తూ ఉత్సవాల్లో పాల్గొనడం భక్తులను విశేషంగా ఆకట్టుకుంది. డప్పుల మోతలు, కోలాటాలు, జానపద కళారూపాలు, శివసత్తుల విన్యాసాలతో గోల్కొండ పరిసరాలు పండుగ వాతావరణాన్ని సంతరించుకున్నాయి. మహిళలు సంప్రదాయ వస్త్రధారణలో అలంకరించిన బోనాలను తలపై మోసుకుంటూ అమ్మవారికి సమర్పించడం ప్రత్యేకంగా కనిపించింది.

ఈ కార్యక్రమంలో ప్రభుత్వ సలహాదారు వి. హనుమంతరావు, ఎమ్మెల్యే దానం నాగేందర్, బీసీ కమిషన్ చైర్మన్ నిరంజన్, మాజీ ఎంపీ మధు యాష్కీ గౌడ్‌తో పాటు పలువురు అధికారులు, ప్రజాప్రతినిధులు, భక్తులు పెద్ద సంఖ్యలో హాజరయ్యారు.

బోనాల ఉత్సవాల సందర్భంగా భక్తులకు ఎలాంటి ఇబ్బందులు కలగకుండా పోలీసులు విస్తృత భద్రతా ఏర్పాట్లు చేశారు. ట్రాఫిక్ నియంత్రణ, వైద్య శిబిరాలు, తాగునీటి సదుపాయాలు, పారిశుధ్య చర్యలు, ప్రత్యేక క్యూలైన్లు ఏర్పాటు చేసి భక్తులకు సౌకర్యాలు కల్పించారు. ఆలయ పరిసరాల్లో సీసీ కెమెరాల నిఘా, అత్యవసర సేవలను కూడా అందుబాటులో ఉంచారు.

తెలంగాణ ప్రజల ఆరాధ్య పండుగగా గుర్తింపు పొందిన ఆషాఢ బోనాలు రాష్ట్ర సంస్కృతి, సంప్రదాయాల గొప్పతనాన్ని మరోసారి ప్రతిబింబించాయి. ప్రభుత్వం తరఫున తొలి బోనం సమర్పణ, పట్టు వస్త్రాల సమర్పణతో బోనాల మహోత్సవాలకు అధికారికంగా శ్రీకారం చుట్టగా, రాబోయే రోజుల్లో సికింద్రాబాద్ ఉజ్జయిని మహంకాళి, లాల్‌దర్వాజా మహంకాళి తదితర ఆలయాల్లో జరిగే బోనాల ఉత్సవాలకు భారీగా భక్తులు తరలివచ్చే అవకాశం ఉంది.