గూగుల్ మొదటి 100 బిలియన్ త్రైమాసికం మైలురాయి.. పిచాయ్

గూగుల్ దాని మాతృ సంస్థ ఆల్ఫాబెట్ మొదటిసారిగా 100 బిలియన్ డాలర్ల త్రైమాసిక ఆదాయాన్ని నమోదు చేసింది. ఈ ఆర్థిక మైలురాయిని సీఈఓ సుందర్ పిచాయ్ ఎక్స్‌లో పోస్ట్ చేస్తూ ప్రకటించారు. కృత్రిమ మేధ (ఏఐ) పురోగతులతో పాటు అన్ని ప్రధాన వ్యాపార విభాగాల్లో విస్తృత వృద్ధి ఈ విజయానికి ముఖ్య కారణమని తెలిపారు.

అన్ని ప్రధాన విభాగాల్లో రెండంకెల వృద్ధితో మొదటి 100 బిలియన్ డాలర్ల త్రైమాసికాన్ని సాధించాం. ఐదేళ్ల క్రితం మా త్రైమాసిక ఆదాయం 50 బిలియన్ డాలర్లు మాత్రమే అని పిచాయ్ పేర్కొన్నారు. సెర్చ్, యూట్యూబ్, క్లౌడ్ వంటి ముఖ్య ఉత్పత్తుల వేగవంతమైన విస్తరణ, ఏఐ సామర్థ్యాలు ఈ ఫలితాలకు ప్రతిబింబమని వివరించారు.

గూగుల్ ఏఐకి ‘ఫుల్-స్టాక్ విధానం’ను ఉదహరిస్తూ, జెమినీ 2.5 ప్రో, వీయో, జెనీ 3, నానో వంటి అధునాతన మోడళ్లు వేదికలన్నింటా ఆవిష్కరణలను నడిపిస్తున్నాయని చెప్పారు. ఇప్పటివరకు 1.3 కోట్లకు పైగా డెవలపర్లు గూగుల్ జనరేటివ్ ఏఐ మోడళ్లతో అనువర్తనాలు తయారు చేశారు. ఈ ఏడాది చివర్లో జెమినీ 3ను విడుదల చేయనున్నట్టు ప్రకటించారు. సెర్చ్ విభాగంలో విస్తరణాత్మక దశగా అభివర్ణిస్తూ మొత్తం వాణిజ్య ప్రశ్నలు సంవత్సరం లో పెరిగాయని తెలిపారు. ఏఐ ఓవర్‌వ్యూస్, ఏఐ మోడ్ కొత్త ఫీచర్లు త్వరగా అందుబాటులోకి వచ్చాయి. ఏఐ మోడ్ ఇప్పుడు 40 భాషల్లో అందుబాటులో ఉంది, రోజుకు 7.5 కోట్ల మంది వినియోగదారులను ఆకర్షిస్తోంది. అమెరికాలో మూడో త్రైమాసికంలో ఏఐ మోడ్ ప్రశ్నలు రెట్టింపు అయ్యాయి.

గూగుల్ క్లౌడ్ ఏఐ సంబంధిత ఆదాయంతో వేగంగా వృద్ధి చెందుతోంది. కొత్త కస్టమర్లు సంవత్సరం తులనలో 34 శాతం పెరిగారు. ఇప్పటికే ఉన్న 70 శాతం కస్టమర్లు గూగుల్ ఏఐ ఉత్పత్తులను వినియోగిస్తున్నారు. 13 క్లౌడ్ ఉత్పత్తులు సంవత్సరానికి 1 బిలియన్ డాలర్లకు మించిన రన్ రేట్ సాధించాయి. యూట్యూబ్ విషయంలో అమెరికాలో రెండేళ్లకు పైగా స్ట్రీమింగ్ వాచ్ టైమ్‌లో నంబర్ వన్‌గా నిలిచిందని పిచాయ్ తెలిపారు.

యూట్యూబ్ షార్ట్స్ ఇప్పుడు సాంప్రదాయ ఇన్-స్ట్రీమ్ వీడియోల కంటే వాచ్ అవర్‌కు ఎక్కువ ఆదాయం సమకూరుస్తోంది. ఆల్ఫాబెట్ స్వయంచాలక వాహన విభాగం వేమో లండన్‌తో పాటు డల్లాస్, నాష్‌విల్లే, డెన్వర్, సీటిల్ నగరాలకు విస్తరణకు సిద్ధమవుతోందని పేర్కొన్నారు. ప్రపంచవ్యాప్తంగా ఉద్యోగులు, భాగస్వాములకు కృతజ్ఞతలు తెలిపారు. పిచాయ్ పోస్ట్‌కు స్పందిస్తూ టెస్లా, ఎక్స్ సీఈఓ ఎలాన్ మస్క్ ‘గుడ్ వర్క్’ అని కామెంట్ చేశారు.