గల్ఫ్లో యుద్ధమేఘాలు.. ఇరాన్కు ట్రంప్ హెచ్చరిక
పశ్చిమ ఆసియాలో మరోసారి యుద్ధ మేఘాలు కమ్ముకుంటున్నాయి. అణ్వాయుధ తయారీ దిశగా అడుగులు వేస్తున్న ఇరాన్కు అమెరికా అధ్యక్షుడు డొనాల్డ్ ట్రంప్ తీవ్రస్థాయిలో హెచ్చరికలు జారీ చేశారు. చర్చలకు రావడానికి 'సమయం మించిపోతోందని', వెంటనే తన పద్ధతి మార్చుకోవాలని స్పష్టం చేశారు. ఒకవేళ చర్చలు జరగాలంటే ఇరాన్ తన అణ్వాయుధ ఆకాంక్షను వదులుకోవాలని, లేదంటే భారీ మూల్యం చెల్లించుకోక తప్పదని హెచ్చరించారు. ఈ మేరకు తన 'ట్రూత్ సోషల్' వేదికగా ఒక సుదీర్ఘ పోస్ట్ను షేర్ చేశారు.
రంగంలోకి అమెరికా భారీ యుద్ధనౌక
ఇరాన్పై ఒత్తిడి పెంచేలా అమెరికా తన సైనిక శక్తిని గల్ఫ్ ప్రాంతంలో భారీగా మోహరిస్తోంది. సుమారు 5,000 మంది నావికులు, అత్యాధునిక యుద్ధ విమానాలతో కూడిన 'యూఎస్ఎస్ అబ్రహం లింకన్' విమాన వాహక నౌక ఇప్పటికే అరేబియా సముద్ర తీరానికి చేరుకుంది. ఈ మోహరింపును ట్రంప్ ఒక 'భారీ ఆర్మడ'గా అభివర్ణించారు. గతంలో వెనిజులాకు పంపిన దానికంటే ఇది చాలా పెద్దదని, అవసరమైతే మెరుపువేగంతో దాడి చేయడానికి ఇది సిద్ధంగా ఉందని ఆయన పేర్కొన్నారు.
గత దాడులను గుర్తుచేసిన ట్రంప్
2025 జూన్లో ఇరాన్లోని అణు కేంద్రాలైన ఫోర్డో, నతాంజ్, ఇస్ఫాహాన్లపై అమెరికా జరిపిన 'మిడ్నైట్ హామర్' దాడులను ఈ సందర్భంగా ట్రంప్ గుర్తుచేశారు. ఆ దాడులు ఇరాన్ అణు సామర్థ్యాన్ని దెబ్బతీశాయని, మళ్ళీ అలాంటి తప్పు చేస్తే ఈసారి జరిగే దాడి ఊహాతీతంగా ఉంటుందని హెచ్చరించారు. మరోవైపు ఇరాన్ తన డ్రోన్ కార్యకలాపాలను పెంచడం, స్ట్రెయిట్ ఆఫ్ హార్ముజ్ వద్ద సైనిక విన్యాసాలు చేస్తుండటంతో ఈ ప్రాంతంలో ఉద్రిక్తతలు పతాక స్థాయికి చేరాయి.
అమెరికా డిమాండ్లు ఇవే..
ఇరాన్ అణు ఇంధన శుద్ధిని నిలిపివేయాలని, ప్రస్తుతం ఉన్న నిల్వలను ధ్వంసం చేయాలని ట్రంప్ డిమాండ్ చేస్తున్నారు. వీటితో పాటు క్షిపణి పరీక్షలను అరికట్టడం, తమ అనుబంధ సంస్థలకు మద్దతు ఇవ్వడం ఆపేయాలని కోరుతున్నారు. ఇరాన్తో ఒక న్యాయమైన, సమానమైన ఒప్పందాన్ని కుదుర్చుకోవడానికి తాము సిద్ధంగా ఉన్నామని, కానీ అది అణ్వాయుధాలు లేని దేశంగా మారితేనే సాధ్యమని ఆయన తేల్చి చెప్పారు.
దౌత్యం కావాలా.. బెదిరింపులా? ఇరాన్ స్పందన
అమెరికా హెచ్చరికలపై ఇరాన్ విదేశాంగ మంత్రి అబ్బాస్ అరాగ్చీ స్పందించారు. సైనిక బెదిరింపుల ద్వారా దౌత్యం సాధ్యపడదని ఆయన వ్యాఖ్యానించారు. అమెరికా తన మితిమీరిన డిమాండ్లను పక్కన పెడితేనే చర్చలు సాధ్యమని స్పష్టం చేశారు. తాము అణ్వాయుధాల తయారీని ఎప్పుడూ లక్ష్యంగా పెట్టుకోలేదని ఇరాన్ పునరుద్ఘాటించింది. అయితే జనవరి 29 వరకు ఇరాన్ లైవ్-ఫైర్ డ్రిల్స్ (యుద్ధ విన్యాసాలు) నిర్వహిస్తుండటంతో ప్రపంచ చమురు రవాణాకు కీలకమైన ఈ మార్గంలో ఎప్పుడు ఏం జరుగుతుందోనన్న ఆందోళన నెలకొంది.