కోల్కతా రెడ్లైట్ ప్రాంతాల్లోనూ ‘సర్’క్యాంపులు
పశ్చిమ బెంగాల్లో జరుగుతున్న ఎలక్టోరల్ రోల్స్ స్పెషల్ ఇంటెన్సివ్ రివిజన్ (ఎస్ఐఆర్) కార్యక్రమంలో భాగంగా సెక్స్ వర్కర్లు ఓటరు నమోదు ఫారాలు పూరించేందుకు సహాయం చేయడానికి బుధవారం కోల్కతాలోని పలు రెడ్లైట్ ప్రాంతాల్లో పశ్చిమ బెంగాల్ ముఖ్య ఎన్నికల అధికారి (సీఈవో) కార్యాలయం ప్రత్యేక క్యాంపులు ఏర్పాటు చేసింది. కిడ్డర్పూర్, కాలీఘాట్, చేత్లా ప్రాంతాల్లోని రెడ్లైట్ జోన్లలో ఈ క్యాంపులు ఏర్పాటు చేశారు. మంగళవారం ఆసియాలోనే అతిపెద్ద రెడ్లైట్ జిల్లా అయిన సోనాగచ్చిలో ఇలాంటి సహాయ క్యాంపులు నిర్వహించిన ఒక రోజు తర్వాత ఈ చర్య తీసుకున్నారు. కిడ్డర్పూర్లోని మున్షీగంజ్ రోడ్డులోని ఫైవ్ స్టార్ క్లబ్, 148 కాలీఘాట్ రోడ్, చేత్లాలోని 29/ఏ రాఖల్దాస్ అడ్డా రోడ్డు వద్ద ఈ ప్రత్యేక క్యాంపులు ఏర్పాటు చేశామని ఎన్నికల కమిషన్ అధికారి తెలిపారు.
ఈ క్యాంపులు ఉదయం 11 గంటల నుంచి ప్రారంభమైనట్టు ఆయన చెప్పారు. సెక్స్ వర్కర్లకు ఫారాలు పూరించడంలో సహాయం అందిస్తాం. మధ్యాహ్నం 4 గంటల వరకు క్యాంపులు కొనసాగుతాయని ఆయన పేర్కొన్నారు. కిడ్డర్పూర్లో కనీసం 70 మంది, కాలీఘాట్లో సుమారు 100 మంది, చేత్లాలో దాదాపు 60 మంది సెక్స్ వర్కర్లు ఉన్నారని అధికారి తెలిపారు.సెక్స్ వర్కర్ల సంక్షేమం, వారి పిల్లల హక్కుల కోసం పనిచేస్తున్న అనేక సంస్థలు ఆందోళన వ్యక్తం చేసిన నేపథ్యంలో ఈ చర్య తీసుకున్నట్లు సీఈవో కార్యాలయం తెలిపింది.
అర్హత ఉన్న ఏ ఓటరును తొలగించం
ఈ సమస్యలు పరిష్కరించేందుకు ప్రత్యేక క్యాంపులు ఏర్పాటు చేస్తామని ఇప్పటికే హామీ ఇచ్చినట్టు అధికారులు పేర్కొన్నారు. మంగళవారం సోనాగచ్చిలో జరిగిన క్యాంపులకు వందలాది మంది సెక్స్ వర్కర్లు హాజరయ్యారు. అర్హత ఉన్న ఏ ఒక్క ఓటరును కూడా మినహాయించమని రాష్ట్ర ముఖ్య ఎన్నికల అధికారి మనోజ్ కుమార్ అగర్వాల్ హామీ ఇచ్చారు.
ఉత్తర కోల్కతాలోని వార్డు నంబర్ 18లోని ఇరుకైన వీధులు, రద్దీగా ఉండే బజారులలో దశాబ్దాలుగా నివసిస్తున్న అనేక మంది మహిళలు తమకు పూర్వీకుల ఆధారాలు లేవని, ట్రాఫికింగ్కు గురైనా, విడిచిపెట్టినా, ఇంటి నుంచి పారిపోయి వచ్చిన తర్వాత కుటుంబంతో సంబంధాలు తెగిపోయాయని, అందువల్ల తమ పేర్లు ఓటరు జాబితా నుంచి తొలగించబడతాయేమోనని ఆందోళన వ్యక్తం చేశారు.