కోకో -కోలా కొత్త సిఇఓ గా హెన్రిక్ బ్రాన్

కోకో -కోలా కంపెనీ తమ కొత్త ముఖ్య కార్యనిర్వహణాధికారి (సిఇఓ)ని ప్రకటించింది. ప్రస్తుతం చీఫ్ ఆపరేటింగ్ ఆఫీసర్‌గా ఉన్న హెన్రిక్ బ్రాన్ 2026 మొదటి త్రైమాసికంలో సిఇఓ బాధ్యతలు స్వీకరిస్తారు. అట్లాంటాకు చెందిన ఈ పానీయాల దిగ్గజం ప్రకటన ప్రకారం, బోర్డు సభ్యులు బ్రాన్‌ను 2026 మార్చి 31 నుండి సిఇఓ గా ఎన్నుకున్నారు. ప్రస్తుత చైర్మన్, సిఇఓ అయిన జేమ్స్ క్విన్సీ (60) ఇకపై కంపెనీకి ఎగ్జిక్యూటివ్ చైర్మన్‌గా వ్యవహరిస్తారు.

హెన్రిక్ బ్రాన్ పరిచయం

57 ఏళ్ల బ్రాన్ కోకో-కోలాలో మూడు దశాబ్దాలుగా పనిచేస్తున్నారు. సిఓఓ కాకముందు, ఆయన బ్రెజిల్, లాటిన్ అమెరికా, గ్రేటర్ చైనా, దక్షిణ కొరియాలో కంపెనీ కార్యకలాపాలను పర్యవేక్షించారు. సరఫరా గొలుసు, మార్కెటింగ్, కొత్త వ్యాపార అభివృద్ధి, ఇన్నోవేషన్ వంటి ముఖ్య విభాగాలలో ఆయన పనిచేశారు. కాలిఫోర్నియాలో పుట్టి, బ్రెజిల్‌లో పెరిగిన బ్రాన్, అగ్రికల్చరల్ ఇంజనీరింగ్‌లో బ్యాచిలర్ డిగ్రీ, మిచిగాన్ స్టేట్ యూనివర్సిటీ నుండి మాస్టర్ ఆఫ్ సైన్స్, జార్జియా స్టేట్ యూనివర్సిటీ నుండి ఎమ్ బిఏ పూర్తి చేశారు.

క్విన్సీ నాయకత్వంలో సాధించిన విజయాలు

కోకో-కోలా ప్రముఖ స్వతంత్ర డైరెక్టర్ డేవిడ్ వీన్‌బర్గ్, క్విన్సీని "పరివర్తన నాయకుడు"గా కొనియాడారు. క్విన్సీ తన తొమ్మిదేళ్ల సిఇఓ పదవీకాలంలో సాధించినవి, బాడీఆర్మోర్, ఫెయిర్‌లైఫ్‌తో సహా అదనంగా 10 కంటే ఎక్కువ బిలియన్ డాలర్ల బ్రాండ్‌లను కంపెనీలో చేర్చారు. అలాగే 2021లో టోపో చికో హార్డ్ సెల్ట్జర్ ప్రవేశంతో కోక్‌ను ఆల్కహాల్ పానీయాల మార్కెట్‌లోకి కూడా తీసుకువచ్చారు. 2020లో సంస్థను పునర్నిర్మించి, బ్రాండ్‌ల సంఖ్యను సగానికి తగ్గించి, వేలాది మంది ఉద్యోగులను తొలగించారు. సింప్లీ, మినిట్ మెయిడ్ వంటి వేగంగా అభివృద్ధి చెందుతున్న ఉత్పత్తులపై పెట్టుబడులను దృష్టి సారించారు.

ముందున్న సవాళ్లు

క్విన్సీ పదవి నుండి వైదొలగుతున్నా, కోకో -కోలా ప్రస్తుతం కొన్ని సవాళ్లను ఎదుర్కొంటోంది. అమెరికా, ఐరోపా మార్కెట్లలో ఉత్పత్తులకు డిమాండ్ తగ్గడం, అలాగే ఉత్పత్తుల్లోని పదార్థాలపై కస్టమర్ల నుండి పరిశీలన పెరగడం ప్రధాన సమస్యలుగా ఉన్నాయి.

ఈ నేపథ్యంలో, అధ్యక్షుడు డొనాల్డ్ ట్రంప్ నుండి ఒత్తిడి కారణంగా, కోక్ ఈ వేసవిలో అధిక-ఫ్రక్టోజ్ కార్న్ సిరప్‌కు బదులుగా చెరకు పంచదారతో కూడిన తన ట్రేడ్‌మార్క్ కోలా వెర్షన్‌ను విడుదల చేయనున్నట్లు తెలిపింది. బోర్డు బ్రాన్ నాయకత్వంపై విశ్వాసం వ్యక్తం చేసింది. ఆయన కంపెనీ బలాన్ని పెంచి, ప్రపంచవ్యాప్తంగా కొత్త వృద్ధి అవకాశాలను వెతుకుతారని వీన్‌బర్గ్ ఆశాభావం వ్యక్తం చేశారు. సిఇవో ప్రకటన తర్వాత మార్కెట్‌లో కోక్ షేర్లు స్థిరంగా ఉన్నాయి.