కేరళలో ఎడ్ల పందాలకు చట్ట బద్ధత

కేరళ అసెంబ్లీ ఈ వారం రాష్ట్రంలోని సంప్రదాయ ఎద్దుల పందేలు కలపొట్టు (మరమడి), కన్నుపొట్టు, ఉళవు, పొతొట్టం లకు చట్టబద్ధ హోదా కల్పించే ప్రివెన్షన్ ఆఫ్ క్రూరిటీ టు యానిమల్స్ (కేరళ సవరణ) బిల్లు, 2025 ను ఆమోదించింది. ఈ బిల్లుతో కేంద్ర చట్టంలోని నిషేధం నుంచి రాష్ట్రానికి మినహాయింపు లభిస్తుంది. జిల్లాకలెక్టర్లు అనుమతులు ఇస్తారు, వెటర్నరీ సర్టిఫికేట్లు తప్పనిసరి అవుతాయి, అలాగే ఈ పందేలు నిర్వహణకు సంబంధించిన నియమాలను ప్రభుత్వం రూపొందిస్తుంది.

నిషేధం నుంచి మళ్లీ చట్ట బద్ధత

కేరళలో పంటల అనంతర కాలంలో జరిగే ఈ ఎద్దుల పందేలు శతాబ్దాల నుంచి రైతుల ఉత్సవాలలో భాగంగా కొనసాగాయి. కానీ జంతు సంక్షేమ చట్టాలు కఠినతరం కావడంతో 2015 తర్వాత వీటిపై నిషేధం విధించబడింది. తమిళనాడులో జల్లికట్టు మీద నిషేధం పెట్టడాన్ని వ్యతిరేకిస్తూ జరిగిన భారీ ప్రజా ఉద్యమం తరువాత, ఆ రాష్ట్రం చట్ట సవరణ చేసి ఆ సంప్రదాయానికి చట్టబద్ధత ఇచ్చింది. కర్ణాటక కూడా కంబాలా (ఎద్దుల రేసులు) కి అనుమతి ఇచ్చింది. ఇప్పుడు అదే దారిలో కేరళ కూడా నడిచింది. ప్రభుత్వం ఈ చట్టాన్ని వ్యవసాయ సంస్కృతిని కాపాడటానికి, స్థానిక జాతి ఎద్దులను రక్షించటానికి, గ్రామీణ ఆర్థిక వ్యవస్థను ప్రోత్సహించటానికి అనివార్యమని భావిస్తోంది.

మరమడి లేదా కలపొట్టు రేసులు సాధారణంగా వర్షాకాలం తరువాత నీటితో నిండిన పొలాల్లో జరుగుతాయి. రెండు ఎద్దులను జతగా కట్టి రైతులు లేదా కాపరులు వాటిని మట్టి పొలంలో పరుగెత్తిస్తారు. కొన్నిసార్లు వారిని పగ్గాలతో నియంత్రిస్తారు. ఈ పందేలు పంటల పండుగలతో, ఆలయ ఉత్సవాలతో ముడిపడి ఉంటాయి. వేలాది మంది ప్రేక్షకులు, రైతులు, బహుమతుల కోసం పోటీ పడే ఎద్దుల యజమానులు పాల్గొంటారు. పంట ఉత్పత్తిలో ఎద్దుల పాత్రను గౌరవించే ఉత్సవంగా ఇది పరిగణించబడుతుంది.

ఈ సవరణ ప్రకారం జిల్లాకలెక్టర్ నుంచి ముందస్తు అనుమతి, జంతువుల ఆరోగ్య పరీక్ష తప్పనిసరి. నిర్వహణ సమయంలో భద్రతా చర్యలు ఉండాలి.ప్రభుత్వం తర్వాత వివరణాత్మక నియమాలు జారీ చేయనుంది. అధికారుల పర్యవేక్షణలో ఉత్సవాలు జరగాలన్నదే లక్ష్యం.

ఈ ఉత్సవాలకు అనుకూలంగా , వ్యతిరేకంగా వాదనలున్నాయి

• సాంస్కృతిక వారసత్వం: గ్రామీణ జీవితంలో ఎద్దుల ప్రాధాన్యతను గుర్తుచేసే ఉత్సవం.

• ఆర్థిక లాభం: ఎద్దుల పెంపకం, రేసుల నిర్వహణతో స్థానిక ఉపాధి పెరుగుతుంది.

• జాతి రక్షణ: స్థానిక ఎద్దుల జాతులు నశించకుండా సంరక్షణకు అవకాశం.

• పర్యాటక ఆకర్షణ: దేశీయ, అంతర్జాతీయ পর্যాటకులను ఆకర్షించగల గ్రామీణ క్రీడ.

వ్యతిరేక వాదనలు

• జంతు క్రూరత్వం: శిక్షణలో లేదా రేసులో ఎద్దులు గాయపడే ప్రమాదం ఎక్కువ.

• నియంత్రణ సమస్య: పర్యవేక్షణలో లోపాలుంటే దుర్వినియోగం జరుగుతుంది.

• న్యాయపరమైన సవాళ్లు: కేంద్ర చట్టాన్ని ఉల్లంఘించినట్టుగా వాదిస్తూ జంతు హక్కుల సంస్థలు కోర్టులో వెళ్లే అవకాశం ఉంది.

• సామాజిక భద్రతా సమస్యలు: ప్రేక్షకుల గాయాలు, నియంత్రణ కోల్పోవడం వంటి సంఘటనలు పలు రాష్ట్రాల్లో గతంలో చోటుచేసుకున్నాయి.

ఇతర రాష్ట్రాల అనుభవాలు

• తమిళనాడు: 2017లో జల్లికట్టు నిషేధానికి వ్యతిరేకంగా ఉద్యమం జరగడంతో రాష్ట్రం చట్టసవరణ చేసింది.

• కర్ణాటక: కంబాలా రేసులకు నిబంధనలతో అనుమతి ఇచ్చింది.

• మహారాష్ట్ర, హరియాణాలో కూడా పశు పందేలు సంస్కృతిలో భాగంగా ఉన్నాయి.

కేరళ ఈ రాష్ట్రాల తరహాలోనే “సంస్కృతిని కాపాడుతూ, జంతు సంక్షేమాన్ని సమన్వయం చేసే” దారిని ఎంచుకుంది.

కేరళ చట్టం సాంస్కృతిక భావోద్వేగానికి ప్రతిస్పందనగా వచ్చినా, అమలు స్థాయిలో కఠిన పర్యవేక్షణ లేకుంటే ఇది వివాదాస్పదమవుతుంది. జంతు సంక్షేమ సంఘాలు ఇప్పటికే వ్యతిరేక ధోరణి వ్యక్తం చేస్తున్నాయి. అనుమతుల ప్రక్రియ, వైద్య పర్యవేక్షణ, పారదర్శక నిర్వహణ, ఇవన్నీ అమలులో సవాళ్లుగా మారవచ్చు. సంప్రదాయ పండుగల పునరుద్ధరణకు ఈ చట్టం మార్గం చూపుతుందో, లేక మరొక న్యాయపరమైన తుఫానుకు తలుపుతీయుతుందో రాబోయే నెలలలో స్పష్టమవుతుంది.