కేబీఆర్ పార్క్ చుట్టూ వన్వే.. భారీ ట్రాఫిక్ జామ్
హైదరాబాద్లోని కేబీఆర్ పార్క్ చుట్టూ హైదరాబాద్ ట్రాఫిక్ పోలీసులు చేపట్టిన 360 డిగ్రీల వన్-వే మార్గం మొదటి రోజే ప్రయాణికులకు తీవ్ర ఇబ్బందులను తెచ్చిపెట్టింది. హెచ్-సిటి ప్రాజెక్ట్లో భాగంగా ఫ్లైఓవర్లు, అండర్పాస్ల నిర్మాణ పనులను వేగవంతం చేసేందుకు మంగళవారం ఉదయం 6 గంటల నుంచి ఈ ఐదు కిలోమీటర్ల మార్గాన్ని వన్-వేగా మార్చారు.
ఈ కొత్త విధానం వల్ల బంజారాహిల్స్, జూబ్లీహిల్స్ ప్రాంతాల్లో తీవ్ర ట్రాఫిక్ జామ్ ఏర్పడింది. సాధారణంగా 10 నుంచి 15 నిమిషాల్లో పూర్తయ్యే 3 కిలోమీటర్ల ప్రయాణానికి దాదాపు 30 నిమిషాల సమయం పట్టింది. జూబ్లీహిల్స్ రోడ్ నెంబర్ 45 ద్వారా హైటెక్ సిటీ, గచ్చిబౌలి, ఫిలింనగర్ వెళ్లే మార్గాల్లో ఉదయం 9:30 నుంచి మధ్యాహ్నం వరకు ఆఫీస్ సమయాల్లో రాకపోకలు తీవ్రంగా నెమ్మదించాయి.
రోడ్డు సూచికలను గమనించని వాహనదారులు, తమ గమ్యస్థానాలకు చేరుకోవడానికి దారులు మారుస్తుండటంతో ట్రాఫిక్ మరీ నెమ్మదించింది. ట్రాఫిక్ పోలీసులు ప్రతి 100–200 మీటర్లకు పోలీసు సిబ్బందిని ఏర్పాటు చేసి వాహనదారులు, పాదచారులు, సైక్లిస్టులకు మార్గనిర్దేశం చేశారు. కొత్త ట్రాఫిక్ విధానానికి అలవాటు పడే వరకు వాహనదారులు సహకరించాలని పోలీసులు కోరారు. మారిన మార్గాలను తెలుసుకునేందుకు అప్డేట్ చేసిన గూగుల్ మ్యాప్స్ను పరిశీలించాలని, రహదారి సూచికలను పాటించాలని, రాంగ్సైడ్ డ్రైవింగ్కు పాల్పడవద్దని సూచించారు. ఏడాదిన్నరపాటు కేబీఆర్ పార్క్ మీదుగా ఇతర ప్రాంతాలకు వెళ్లే వాహనదారులు ట్రాఫిక్ ఆంక్షలు పాటించాలని పోలీసులు కోరారు.