కేకేఆర్కు భారీ షాక్: ఐపీఎల్ 2026కు హర్షిత్ రాణా దూరం
ఐపీఎల్ 2026 సీజన్ ప్రారంభానికి ముందే కోల్కతా నైట్ రైడర్స్ (కేకేఆర్) జట్టుకు గట్టి ఎదురుదెబ్బ తగిలింది. ఆ జట్టు స్టార్ పేసర్ హర్షిత్ రాణా మోకాలి గాయం కారణంగా ఈ ఏడాది టోర్నీ మొత్తానికి దూరమయ్యాడు. ఇటీవల జరిగిన టీ20 ప్రపంచకప్కు ముందు దక్షిణాఫ్రికాతో జరిగిన వార్మప్ మ్యాచ్లో రాణా కుడి మోకాలికి తీవ్రమైన లిగమెంట్ గాయమైంది. దీనికి సంబంధించి ఫిబ్రవరిలో అతను శస్త్రచికిత్స చేయించుకోగా, ప్రస్తుతం కోలుకోవడానికి డీటెయిల్ రీహాబిలిటేషన్ ప్రాసెస్ అవసరమని వైద్యులు తేల్చారు.
హర్షిత్ రాణా దూరం కావడంపై కేకేఆర్ హెడ్ కోచ్ అభిషేక్ నాయర్ మాట్లాడుతూ.. గత కొన్ని సీజన్లుగా, ముఖ్యంగా ఛాంపియన్షిప్ గెలిచిన సమయంలో హర్షిత్ మా జట్టులో కీలక సభ్యుడిగా ఉన్నాడు. అతని స్థానాన్ని భర్తీ చేయడం అంత సులభం కాదు. అయితే, గత కొన్ని రోజులుగా కొంతమంది బౌలర్లను పరిశీలిస్తున్నాం, త్వరలోనే తుది నిర్ణయం తీసుకుంటాం అని నాయర్ పేర్కొన్నారు.
మరోవైపు, శ్రీలంక ఫాస్ట్ బౌలర్ మతీషా పతిరానా కూడా గాయం నుంచి కోలుకుంటుండటంతో అతను ఫిజికల్ పెర్ఫార్మెన్స్ టెస్ట్ ఎదుర్కోవాల్సి ఉంది. ఇది కూడా కేకేఆర్ ప్రణాళికలను కాస్త కలవరపెడుతోంది. ప్రస్తుతం ఈడెన్ గార్డెన్స్లో నవదీప్ సైనీ, ఆకాష్ మధ్వాల్, సిమర్జీత్ సింగ్ వంటి బౌలర్లు శిక్షణ పొందుతున్నారు. వీరిలో ఒకరు రాణా స్థానంలో వచ్చే అవకాశం ఉంది.
టీ20 ప్రపంచకప్లో భారీగా పరుగులు సాధించిన స్పిన్నర్ వరుణ్ చక్రవర్తి గురించి కేకేఆర్ కెప్టెన్ అజింక్య రహానే స్పందించారు. వరుణ్ బౌలింగ్ సామర్థ్యంపై మాకు ఎటువంటి సందేహం లేదు. ప్రపంచకప్లో ప్రత్యర్థి బ్యాటర్లు అతడిని అద్భుతంగా ఆడారు, దానికి వారికి క్రెడిట్ ఇవ్వాలి. ప్రపంచకప్ తర్వాత వచ్చిన 10 రోజుల విరామం వరుణ్కు బాగా ఉపయోగపడింది, ఐపీఎల్లో అతను రాణిస్తాడనే నమ్మకం ఉంది అని రహానే అన్నారు. ప్రపంచకప్లో వరుణ్ 14 వికెట్లు తీసినప్పటికీ, అతని ఎకానమీ రేటు 9.25గా ఉంది.
కేకేఆర్ షెడ్యూల్
ఐపీఎల్ 2026 మార్చి 28న ప్రారంభం కానుండగా, కేకేఆర్ తన తొలి మ్యాచ్ను మార్చి 29న ముంబై ఇండియన్స్తో ఆడుతుంది. అనంతరం ఏప్రిల్ 2న సన్రైజర్స్ హైదరాబాద్తో తమ హోమ్ గ్రౌండ్లో తలపడనుంది.