కేకేఆర్కు కొత్త హెడ్ కోచ్గా అభిషేక్ నాయర్
కోల్కతా నైట్ రైడర్స్ జట్టుకు మాజీ భారత సహాయక కోచ్ అభిషేక్ నాయర్ను కొత్త హెడ్ కోచ్గా నియమించినట్లు ఫ్రాంచైజీ నిన్న గురువారం ప్రకటించింది. మూడు ఐపీఎల్ సీజన్లు జట్టును నడిపిన చంద్రకాంత్ పాండే తప్పుకోవడంతో ఈ మార్పు వచ్చింది. దీర్ఘకాల సభ్యుడైన నాయర్కు ఇది ముఖ్యమైన అడుగు.
43 ఏళ్ల నాయర్ 2018 నుంచి కేకేఆర్ బృందంలో కీలక పాత్ర పోషిస్తున్నాడు. ఆటగాళ్ల మనస్తత్వాన్ని లోతుగా అర్థం చేసుకుని, విశ్లేషణాత్మక దృక్పథంతో జట్టు ఆలోచనా విభాగంలో ప్రభావవంతంగా ఉన్నాడు. యువ, అనుభవజ్ఞులైన ఆటగాళ్ల కెరీర్లను రూపొందించడంలో ఆయన పాత్ర ఎంతో కీలకం.
నియామకాన్ని స్వాగతిస్తూ కేకేఆర్ సీఈవో వెంకీ మైసూర్ మాట్లాడుతూ, ‘2018 నుంచి అభిషేక్ మా నైట్ రైడర్స్ బృందంలో అంతర్భాగం. మైదానంలోనూ, బయట కూడా ఆటగాళ్లను తీర్చిదిద్దాడు. ఆట పట్ల ఆయనకున్న అవగాహన, ఆటగాళ్లతో ఉన్న అనుబంధం మా అభివృద్ధికి మూలస్తంభం. హెడ్ కోచ్గా ఆయన నేతృత్వంలో కేకేఆర్ కొత్త అధ్యాయాన్ని ప్రారంభించడం సంతోషంగా ఉంది’ అని తెలిపాడు.
కేకేఆర్లో చేరకముందు నాయర్ గౌతమ్ గంభీర్ బృందంలో భాగంగా భారత జాతీయ జట్టుతో దాదాపు తొమ్మిది నెలలు పనిచేశాడు. ఈ ఏడాది మొదట ఛాంపియన్స్ ట్రోఫీ విజయం తర్వాత ఆయన స్థానంలో సితాంశు కోటక్ వచ్చాడు.
మూడు వన్డేలు ఆడిన మాజీ భారత ఆల్రౌండర్ నాయర్ వ్యక్తిగత కోచ్, మార్గదర్శకుడిగా గుర్తింపు పొందాడు. రోహిత్ శర్మ, కేఎల్ రాహుల్, దినేష్ కార్తీక్ వంటి ప్రముఖులతో సన్నిహితంగా పనిచేశాడు. అంగ్క్రిష్ రఘువంశీ వంటి యువ ప్రతిభలను గుర్తించిన ఘనత కూడా ఆయనదే. ఫ్రాంచైజీని లోపలి నుంచి బాగా తెలిసిన కోచ్ నేతృత్వంలో కేకేఆర్ ప్రస్తుత బలమైన కోర్ను మరింత బలోపేతం చేసుకుని, మూడో ఐపీఎల్ టైటిల్ సాధనకు ప్రయత్నించనుంది.