కేంద్ర ప్రభుత్వ విధానాలకు వ్యతిరేకంగా సీపీఎం ‘ఢిల్లీ మార్చ్’: మార్చి 24న భారీ నిరసన
కేంద్రంలోని ఎన్డీయే ప్రభుత్వం అనుసరిస్తున్న ప్రజా వ్యతిరేక విధానాలను నిరసిస్తూ మార్చి 24న దేశ రాజధానిలో భారీ ‘ఢిల్లీ మార్చ్’ నిర్వహించనున్నట్లు సీపీఐ(ఎం) ప్రధాన కార్యదర్శి ఎం.ఏ. బేబీ సోమవారం ప్రకటించారు. ముఖ్యంగా కార్మిక చట్టాలు, ఉపాధి హామీ పథకం మార్పులు, వాణిజ్య ఒప్పందాలకు వ్యతిరేకంగా ఈ నిరసన చేపట్టనున్నట్లు ఆయన తెలిపారు.
ఈ ఢిల్లీ మార్చ్కు ముందు ఉత్తర భారత రాష్ట్రాల్లో రాష్ట్ర స్థాయి కార్యక్రమాలు, జాథాలు నిర్వహిస్తూ వివిధ వర్గాల ప్రజలను సమీకరించనున్నట్లు చెప్పారు. ప్రజల జీవనోపాధి సమస్యలను ప్రధానంగా ప్రస్తావిస్తూ ఈ కార్యక్రమాలు సాగుతాయని పేర్కొన్నారు. కేంద్ర ప్రభుత్వ వాణిజ్య ఒప్పందాలపై కూడా ఆయన విమర్శలు గుప్పించారు. భారతదేశం ఎక్కడి నుంచి ముడి చమురు కొనాలి అన్న నిర్ణయం భారతదేశమే తీసుకోవాలా లేదా అనే ప్రశ్నను ప్రధాని నరేంద్ర మోదీ స్పష్టం చేయాలని ఆయన అన్నారు. అంతర్జాతీయ ఒత్తిళ్ల కారణంగా దేశ ఆర్థిక స్వావలంబనకు భంగం కలుగుతోందని ఆరోపించారు.
గతంలో అమెరికా అధ్యక్షుడు డొనాల్డ్ ట్రంప్ కొన్ని దేశాల నుంచి చమురు కొనవద్దని భారత్ను నియంత్రించారని, ఇప్పుడు వెనిజులా నుంచి కొనాలని సూచిస్తున్నారని, ఇది మన స్వయంప్రతిపత్తిని దెబ్బతీసే చర్యని ఆయన విమర్శించారు. అంతేకాకుండా, విదేశీ దేశాల సూచనల మేరకు చమురు కొనుగోళ్ల విషయంలో మార్పులు జరుగుతున్నాయని, ఇది దేశ సార్వభౌమాధికారంపై ప్రభావం చూపుతుందని ఎం.ఏ. బేబీ వ్యాఖ్యానించారు. ఈ నేపథ్యంలో కార్మికులు, రైతులు, సాధారణ ప్రజల సమస్యలను ముందుకు తీసుకెళ్లేందుకు ఢిల్లీ మార్చ్ నిర్వహించనున్నట్లు సీపీఐ(ఎం) వెల్లడించింది.
కేరళలో ఎల్డీఎఫ్ హ్యాట్రిక్ విజయం ఖాయం
కేరళలో ఇటీవల జరిగిన స్థానిక సంస్థల ఎన్నికల్లో అధికార ఎల్డీఎఫ్ ఎదుర్కొన్న ఎదురుదెబ్బ కేవలం తాత్కాలికమేనని, రాబోయే అసెంబ్లీ ఎన్నికల్లో వరుసగా మూడోసారి విజయం సాధించి మళ్ళీ అధికారంలోకి వస్తామని ఎం.ఏ. బేబీ ఆశాభావం వ్యక్తం చేశారు. సోమవారం హైదరాబాద్లో మీడియా ప్రతినిధులతో మాట్లాడిన ఆయన, కేరళ రాజకీయాలపై ఆసక్తికర వ్యాఖ్యలు చేశారు.
స్థానిక ఎన్నికల ఫలితాలపై బేబీ ఒక ఆసక్తికరమైన ఉదాహరణను ఇచ్చారు. గత ప్రపంచ కప్లో అర్జెంటీనా తన మొదటి మ్యాచ్లో సౌదీ అరేబియా చేతిలో ఓడిపోయింది. కానీ ఆ తర్వాత ఒక్క మ్యాచ్ కూడా ఓడిపోకుండా ప్రపంచ ఛాంపియన్గా నిలిచింది. కేరళలో మా పరిస్థితి కూడా సరిగ్గా అలాగే ఉంటుంది. ఈ చిన్నపాటి ఎదురుదెబ్బ మా అంతిమ విజయానికి ఆటంకం కాదు అని ఆయన అన్నారు.
కాంగ్రెస్ నేత వ్యాఖ్యల ప్రస్తావన
పినరయి విజయన్ నేతృత్వంలోని ఎల్డీఎఫ్ మళ్ళీ అధికారంలోకి వస్తుందని కాంగ్రెస్ సీనియర్ నేత మణిశంకర్ అయ్యర్ చేసిన వ్యాఖ్యలను బేబీ ఈ సందర్భంగా ప్రస్తావించారు. ఢిల్లీకి చెందిన ఒక కాంగ్రెస్ నేత వచ్చి ఇలాంటి ప్రకటన చేస్తున్నారంటే, అది కేరళ ప్రజల సామూహిక ఆలోచనా దృక్పథానికి ప్రతిబింబమని ఆయన అన్నారు. తన పార్టీ నాయకత్వం విమర్శించినప్పటికీ, అయ్యర్ తన వ్యాఖ్యలకు కట్టుబడి ఉండటం గమనార్హం. డిసెంబర్ 2025లో జరిగిన స్థానిక సంస్థల ఎన్నికల్లో తిరువనంతపురం కార్పొరేషన్ను బీజేపీ కైవసం చేసుకోగా, ప్రతిపక్ష యూడీఎఫ్ కూడా మెరుగైన ప్రదర్శన కనబరిచిన నేపథ్యంలో బేబీ ఈ వివరణ ఇచ్చారు.
ముఖ్యమంత్రి రేవంత్ రెడ్డికి సూచన
కేంద్రం తెచ్చిన కొత్త కార్మిక చట్టాలను తెలంగాణలో అమలు చేయవద్దని ముఖ్యమంత్రి రేవంత్ రెడ్డిని కోరుతున్నట్లు బేబీ చెప్పారు. అలాగే, కర్ణాటక ముఖ్యమంత్రి సిద్ధరామయ్యకు కూడా ఈ చట్టాలను అమలు చేయవద్దని రేవంత్ రెడ్డి సలహా ఇవ్వాలని ఆయన సూచించారు.