కేంద్ర ఓబీసీ జాబితాలో తెలంగాణ 40 బీసీ కులాలను చేర్చాలి: ఎన్సీబీసీ చైర్మన్కు వీహెచ్ వినతి
తెలంగాణ ప్రభుత్వ వెనుకబడిన తరగతుల (బీసీ) సంక్షేమం, అభివృద్ధి సలహాదారు వి. హనుమంతరావు (వీహెచ్) మంగళవారం న్యూఢిల్లీలో జాతీయ వెనుకబడిన తరగతుల కమిషన్ (ఎన్సీబీసీ) చైర్మన్ను మర్యాదపూర్వకంగా కలిశారు. తెలంగాణకు చెందిన 40 బీసీ కులాలను కేంద్ర ఓబీసీ జాబితాలో చేర్చాలనే దీర్ఘకాలిక ప్రతిపాదనపై ఈ ఉన్నత స్థాయి సమావేశంలో సమగ్రంగా చర్చించారు.
ఈ సందర్భంగా చైర్మన్కు ఆయన అధికారిక వినతిపత్రాన్ని సమర్పించారు. రాష్ట్ర ప్రభుత్వం గుర్తించిన ఈ 40 కులాలు కేంద్ర జాబితాలో లేకపోవడం వల్ల తెలంగాణ యువత కేంద్ర ప్రభుత్వ ఉద్యోగాలు, కేంద్ర విద్యాసంస్థల్లో ప్రవేశాల అవకాశాలను కోల్పోతున్నారని వీహెచ్ చెప్పారు. వీరికి కేంద్ర సంక్షేమ ఫలాలు, రిజర్వేషన్లు అందేలా చూసేందుకు సాంకేతిక అడ్డంకులను తొలగించి ఈ ప్రక్రియను వేగవంతం చేయాలని కోరారు.
ఎన్సీబీసీ చైర్మన్ హామీ
వినతిపత్రంపై జాతీయ కమిషన్ చైర్మన్ ఎంతో సానుకూలంగా స్పందించారని ఆయన తెలిపారు. ఈ సమస్యను వీలైనంత త్వరగా కేంద్ర ప్రభుత్వం దృష్టికి తీసుకెళ్తాను. ఓబీసీలకు ఖచ్చితంగా న్యాయం చేస్తాను అని ఆమె స్పష్టమైన హామీ ఇచ్చారని వీహెచ్ పేర్కొన్నారు. కమిషన్ ఇచ్చిన గట్టి హామీపై వీహెచ్ సంతోషం వ్యక్తం చేశారు. బాధిత వర్గాలకు త్వరితగతిన న్యాయం జరిగేలా, ఈ ప్రతిపాదన తక్షణ అమలు కోసం తెలంగాణ ప్రభుత్వం కమిషన్తో నిరంతరం సంప్రదింపులు జరుపుతూ పర్యవేక్షిస్తుందని తెలిపారు.