కెనడా-అలాస్కా సరిహద్దులో భారీ భూకంపం.. తీవ్రత 7.0గా నమోదు

కెనడాలోని యూకాన్-అలాస్కా సరిహద్దు ప్రాంతాన్ని స్థానిక కాలమానం ప్రకారం శనివారం మధ్యాహ్నం భారీ భూకంపం వణికించింది. రిక్టర్ స్కేల్‌పై దీని తీవ్రత 7.0గా నమోదైంది. ఎర్త్‌క్వేక్స్ కెనడా ఇచ్చిన వివరాల ప్రకారం, ఈ భూకంపం భూమి లోపల కేవలం 5 కిలోమీటర్ల లోతులో సంభవించింది. భూ ఉపరితలానికి ఇంత దగ్గరగా భూకంపం సంభవించడం వల్ల ప్రకంపనల తీవ్రత ఎక్కువగా ఉంది, అయినప్పటికీ ఈ ప్రాంతంలో జనాభా చాలా తక్కువగా ఉండటం వలన పెద్ద నష్టం జరగలేదని అధికారులు తెలిపారు.

భూకంపం సంభవించిన వెంటనే యూకాన్ హైవేస్ అండ్ పబ్లిక్ వర్క్స్ అధికారులు కీలక చర్యలు తీసుకున్నారు. ప్రధానంగా భూకంపం కారణంగా హిమపాతం సంభవించే అవకాశం ఉన్నందున అధికారులు సౌత్ క్లోండైక్ హైవేను మూసివేశారు. కిలోమీటరు 24 నుండి కిలోమీటరు 106 వరకు ఉన్న ఈ రహదారిని శనివారం సాయంత్రం 5 గంటల నుండి రాత్రంతా మూసి ఉంచారు.

భూకంపం వచ్చినప్పుడు భూమి గట్టిగా కంపించడం వలన పర్వతాలపై పేరుకుపోయిన మంచు, రాళ్లు పట్టుకోల్పోయి ఒక్కసారిగా కిందకి జారిపోయే అవకాశం ఉంది. అందుకే ప్రమాదం జరగకుండా ముందు జాగ్రత్తగా ఈ రహదారిని మూసివేశారు. పరిస్థితిని పరిశీలించి, రహదారిని తిరిగి తెరిచే విషయంపై నిర్ణయం తీసుకుంటామని అధికారులు తెలిపారు.

మునుపటి భూకంపాలు

యూనివర్సిటీ ఆఫ్ విక్టోరియాకు చెందిన ప్రొఫెసర్ ఎడ్విన్ నిస్సెన్ ప్రకారం, యూకాన్-అలాస్కా సరిహద్దు ప్రాంతం భూకంపాలకు నిలయంగా ఉంది. ఈ ప్రాంతంలో గతంలో కూడా (1899, 1979, 2002, 2017) బలమైన భూకంపాలు పలుమార్లు సంభవించాయి.

ఈ ప్రాంతం పసిఫిక్ రింగ్ ఆఫ్ ఫైర్‌లో భాగం కావడంతో తరచుగా భూకంపాలకు గురవుతుంది. ఇంత భారీ తీవ్రతతో భూకంపం వచ్చినా, జనావాసాలు తక్కువగా ఉన్న మారుమూల ప్రాంతంలో సంభవించడం వలన ప్రస్తుతానికి ఎలాంటి గాయాలు లేదా ఆస్తి నష్టం జరిగినట్లు నివేదికలు అందలేదని అధికారులు వెల్లడించారు. ఈ భారీ భూకంపం తర్వాత 20కి పైగా స్వల్ప ఆఫ్టర్‌షాక్‌లు (5.3, 5.0 తీవ్రతలతో సహా) కూడా నమోదయ్యాయి. ప్రస్తుతానికి సునామీ హెచ్చరికలు లేనప్పటికీ, ప్రజలు అప్రమత్తంగా ఉండాలని, ముఖ్యంగా కొండ ప్రాంతాలలో ఉన్నవారు హిమపాతం ప్రమాదం పట్ల జాగ్రత్తగా ఉండాలని స్థానిక అధికారులు సూచిస్తున్నారు.

నేపాల్‌లోనూ భూప్రకంపనలు

నేపాల్ దేశం మరోసారి భూకంపాలతో వణికింది ఆదివారం ఉదయం 8:13 గంటలకు 4.1 తీవ్రతతో భూకంపం సంభవించింది. నేషనల్ సెంటర్ ఫర్ సీస్మోలజీ వివరాల ప్రకారం, ఈ భూకంపం కేంద్రం కేవలం 5 కిలోమీటర్ల లోతులో ఉండటం ఆందోళన కలిగించే విషయం. గతంలో కూడా అంటే, నవంబర్ 30న 4.2 తీవ్రతతో, నవంబర్ 6న 3.6 తీవ్రతతో భూకంపాలు వచ్చాయి. వరుసగా వస్తున్న ఈ ప్రకంపనలు నేపాల్ ప్రజలలో భయాన్ని పెంచుతున్నాయి.