కుప్పకూలిన స్టాక్ మార్కెట్: ఒక్క రోజే రూ. 4.5 లక్షల కోట్ల సంపద ఆవిరి!

భారతీయ స్టాక్ మార్కెట్లు గురువారం తీవ్ర ఒడిదుడుకులను ఎదుర్కొంది. అంతర్జాతీయ ప్రతికూల పవనాల నేపథ్యంలో దేశీయ సూచీలు భారీ పతనాన్ని చవిచూశాయి. మార్కెట్ ముగిసే సమయానికి బిఎస్‌ఇ సెన్సెక్స్ 1,236 పాయింట్లు (1.48%) నష్టపోయి 82,498 వద్ద స్థిరపడగా, ఎన్ఎస్ఈ నిఫ్టీ 365 పాయింట్లు (1.41%) కోల్పోయి 25,454 వద్ద ముగిసింది. ఉదయం లాభాలతో ప్రారంభమైన మార్కెట్, మిడ్-సెషన్ కల్లా బేర్స్ గుప్పిట్లోకి వెళ్ళిపోయింది.

అన్ని రంగాల్లోనూ అమ్మకాల ఒత్తిడి స్పష్టంగా కనిపించింది. ముఖ్యంగా రియల్టీ, ఆటోమొబైల్, పవర్, క్యాపిటల్ గూడ్స్, కన్స్యూమర్ డ్యూరబుల్స్ రంగాలు సుమారు 2 శాతం మేర భారీ నష్టాలను నమోదు చేశాయి. మార్కెట్ గమనాన్ని గమనిస్తే.. కేవలం 1,248 షేర్లు మాత్రమే లాభపడగా, ఏకంగా 2,790 షేర్లు నష్టాల్లో ముగిశాయి. దీంతో మదుపరుల సంపద ఒక్కరోజే భారీగా హరించుకుపోయింది.

ముఖ్యంగా అమెరికా, ఇరాన్ దేశాల మధ్య నెలకొన్న భౌగోళిక ఉద్రిక్తతలు ప్రపంచ మార్కెట్లను వణికించాయి. ఈ ఉద్రిక్తతల వల్ల మధ్యప్రాచ్యంలో యుద్ధ మేఘాలు కమ్ముకుంటాయనే భయంతో అంతర్జాతీయంగా ముడి చమురు ధరలు ఈ ఏడాది గరిష్ట స్థాయికి చేరుకున్నాయి. చమురు ధరలు పెరగడం వల్ల ద్రవ్యోల్బణ భయాలు అధికమై, ఇన్వెస్టర్లు తమ పెట్టుబడులను వెనక్కి తీసుకోవడానికి ప్రాధాన్యత ఇచ్చారు.

మరోవైపు, అమెరికా ఫెడరల్ రిజర్వ్ వడ్డీ రేట్ల తగ్గింపుపై నెలకొన్న సందిగ్ధత, భారత రూపాయి విలువ క్రమంగా బలహీనపడటం మార్కెట్ పతనానికి ఆజ్యం పోశాయి. ఆసియా మార్కెట్లలో 'లూనార్ న్యూ ఇయర్' సెలవుల కారణంగా విదేశీ సంస్థాగత పెట్టుబడిదారుల భాగస్వామ్యం తక్కువగా ఉండటంతో మార్కెట్‌లో లిక్విడిటీ తగ్గి, భారీ ఒడిదుడుకులు చోటుచేసుకున్నాయని విశ్లేషకులు అభిప్రాయపడుతున్నారు.

మార్కెట్ నిపుణుల విశ్లేషణ ప్రకారం, ప్రస్తుతం ఇన్వెస్టర్లు దూకుడుగా కొనుగోళ్లు చేయడం కంటే, తమ పెట్టుబడిని కాపాడుకునే ధోరణికి మొగ్గు చూపుతున్నారు. ఇండెక్స్ గరిష్ట స్థాయిల్లో ఉన్నప్పుడు సంస్థాగత ఇన్వెస్టర్లు లాభాల స్వీకరణకు ప్రాధాన్యత ఇస్తుండటం మార్కెట్‌పై మరింత ఒత్తిడిని పెంచుతోంది. రాబోయే రోజుల్లో అంతర్జాతీయ పరిణామాలను బట్టే మార్కెట్ కదలికలు ఉండనున్నాయి.

అంతర్జాతీయంగా అమెరికా-ఇరాన్ ఉద్రిక్తతలు, ముడి చమురు ధరల పెరుగుదల వల్ల స్టాక్ మార్కెట్ కుప్పకూలడంతో, ఇన్వెస్టర్లు సురక్షితమైన పెట్టుబడిగా భావించే బంగారం, వెండి వైపు మొగ్గు చూపుతున్నారు, దీనివల్ల ఈరోజు మార్కెట్‌లో బంగారం ధరలు పెరిగి 24 క్యారెట్ల తులం బంగారం సుమారు రూ.1,60,170 మార్కును తాకగా, వెండి ధర కూడా కిలోకు రూ.2,70,000 వద్ద కొనసాగుతోంది. షేర్ మార్కెట్ పతనం, రూపాయి విలువ క్షీణించడం వంటి కారణాలు వెండి, బంగారం ధరలు మరింత భారమవడానికి ప్రధాన కారణమయ్యాయి.