కాశ్మీర్ లో నకిలీ రైల్వే రిక్రూట్మెంట్ స్కామ్
ఇటీవల కాలంలో ప్రభుత్వ ఉద్యోగాలు ఇప్పిస్తామంటూ మోసగాళ్ళు భారీ కుట్రలకు పాల్పడుతున్నారు. ఇలాంటి వారి బారినపడి అమాయక నిరుద్యోగులు నిరంతరం మోసపోతున్నారు. అలాంటి ఘటనే ఇటీవల కాశ్మీర్ లో జరిగింది. నకిలీ రైల్వే ఉద్యోగాల పేరిట జరిగిన ఈస్కామ్ను కాశ్మీర్ క్రైమ్ బ్రాంచ్ ఛేదించింది. దీనిలో భాగంగా కాశ్మీర్ క్రైమ్ బ్రాంచ్కు చెందిన ఎకనామిక్ అఫెన్సెస్ వింగ్ నకిలీ రైల్వే ఉద్యోగాల స్కామ్లో కీలక చర్యలు తీసుకుంది. ఈ కేసులో ఫిర్యాదుదారుడితో సహా ముగ్గురిపై ఛార్జ్షీట్ దాఖలు చేసినట్లు అధికారులు శుక్రవారం తెలిపారు.
ఈ కేసులో ప్రధానాంశాలు:
కోర్టులో ఛార్జ్షీట్:
బుద్గాంలోని బీర్వా జ్యుడీషియల్ మేజిస్ట్రేట్ కోర్టులో ముగ్గురు నిందితులపై ఈ ఛార్జ్షీట్ దాఖలైంది. అబ్దుల్ హమీద్ షేక్ (బుద్గాం), ఆదిల్ షా (శ్రీనగర్), ముఫ్తీ గులాం హసన్ కుమార్ (సోపోర్/బీర్వా) లను ఛార్జ్షీట్ లో నిందితులుగా చేర్చారు. నిరుద్యోగులకు నకిలీ రైల్వే నియామక ఉత్తర్వులు జారీ చేసి వారిని మోసగించినట్లు వీరిపై ఆరోపణలు ఉన్నాయి.
ప్రభుత్వ ఉద్యోగం ఇప్పిస్తామని నమ్మించి ఒక వ్యక్తి నుండి రూ.11 లక్షలు వసూలు చేసిన కేసులో ఇద్దరు నిందితులపై కాశ్మీర్ క్రైమ్ బ్రాంచ్ ముందుగా ఛార్జ్షీట్ దాఖలు చేసింది. బుద్గాం చీఫ్ జ్యుడీషియల్ మేజిస్ట్రేట్ కోర్టులో ఐపీసీ సెక్షన్లు 420 (మోసం), 120-బి (నేరపూరిత కుట్ర) కింద ఈ కేసు నమోదైంది.
పోలీసులు తెలిపిన వివరాల ప్రకారం.. కుప్వారా జిల్లా జిర్హామా నివాసి అయిన ఇష్రత్ బానో అనే మహిళ, తన భర్త ద్వారా ప్రభుత్వ ఉద్యోగం ఇప్పిస్తానని ఫిర్యాదుదారుడిని నమ్మించింది. ఆమె మాటలు నమ్మి బాధితుడు రూ.11లక్షలు ఆమె సూచించిన బ్యాంక్ ఖాతాలోకి బదిలీ చేశాడు. డబ్బు తీసుకున్న తర్వాత ఎంత కాలం గడిచినా ఉద్యోగం రాకపోవడంతో పాటు, బాధితుడికి డబ్బులు కూడా తిరిగి ఇవ్వలేదు. దీనిపై ఫిర్యాదు అందడంతో రంగంలోకి దిగిన ఈఓడబ్ల్యూ అధికారులు విచారణ చేపట్టి ఈ స్కామ్ ను గుర్తించారు.
ఈ కేసు తొలుత 'కుమార్' అనే వ్యక్తి ఇచ్చిన ఫిర్యాదుతో వెలుగులోకి వచ్చింది. అబ్దుల్ హమీద్ షేక్, ఆదిల్ షా తనకు ఢిల్లీలోని రైల్వే రిక్రూట్మెంట్ బోర్డు పేరుతో నకిలీ నియామక పత్రాలను ఇచ్చారని కుమార్ ఆరోపించారు. ఆ పత్రాలపై నార్తర్న్ రైల్వే డిజిఎం సంతకాలు, నకిలీ ముద్రలు ఉన్నట్లు గుర్తించారు.
ట్విస్ట్ ఇచ్చిన దర్యాప్తు:
ఈఓడబ్ల్యూ జరిపిన లోతైన విచారణలో ఆశ్చర్యకరమైన విషయాలు బయటపడ్డాయి. ఫిర్యాదుదారుడైన కుమార్ కూడా ఈ కుట్రలో భాగస్వామి అని తేలింది. కుమార్ ఇతర నిరుద్యోగుల నుండి భారీగా డబ్బు వసూలు చేశాడు. వారికి కూడా నకిలీ ఉద్యోగ పత్రాలను జారీ చేయడంలో చురుకైన పాత్ర పోషించాడు.
ముగ్గురు నిందితులు కలిసి ఒక పథకం ప్రకారం అమాయక నిరుద్యోగులను ప్రభుత్వ ఉద్యోగాల పేరుతో ఆకర్షించి, వారి నుండి భారీ మొత్తంలో డబ్బులు వసూలు చేసినట్లు ఆధారాలు లభించాయి. దీంతో అధికారులు సెక్షన్ 173 CrPC కింద తుది నివేదికను న్యాయస్థానానికి సమర్పించారు.