కాళేశ్వరంపై దుష్ప్రచారం కోసం నీటిని వాడటం లేదు: మాజీ మంత్రి హరీష్ రావు

రాష్ట్రంలో కరువు పరిస్థితులు నెలకొన్న వేళ రైతులకు సాగునీరు అందించడంపై దృష్టి పెట్టాల్సిన ముఖ్యమంత్రి రేవంత్ రెడ్డి రాజకీయ ప్రత్యర్థులపై వ్యాఖ్యలు చేయడంలోనే నిమగ్నమయ్యారని బీఆర్ఎస్ సీనియర్ నేత, మాజీ మంత్రి హరీష్ రావు విమర్శించారు. తెలంగాణ భవన్‌లో ఆదివారం నిర్వహించిన మీడియా సమావేశంలో ఆయన ముఖ్యమంత్రిపై తీవ్రస్థాయిలో విమర్శలు గుప్పిస్తూ కన్నెపల్లి, దేవాదుల పంపులను వెంటనే ప్రారంభించాలని ప్రభుత్వాన్ని డిమాండ్ చేశారు.

ముఖ్యమంత్రి ఇటీవల నిర్వహించిన మీడియా సమావేశం రాజ్యాంగబద్ధ పదవిలో ఉన్న వ్యక్తికి తగిన విధంగా లేదని హరీష్ రావు వ్యాఖ్యానించారు. రైతులు సాగునీరు కోరుతుంటే రక్తం చిందించడం, బెల్టులతో కొట్టడం వంటి వ్యాఖ్యలు చేయడం ప్రజాస్వామ్యానికి ఏమాత్రం మంచిది కాదన్నారు. రైతుల సమస్యలకు సమాధానం చెప్పాల్సిన సమయంలో ఇలాంటి వ్యాఖ్యలు చేయడం ఆందోళనకరమని పేర్కొన్నారు.

గోదావరిలో ప్రస్తుతం తగినంత నీరు అందుబాటులో ఉన్నప్పటికీ కాంగ్రెస్ ప్రభుత్వం కావాలనే కాళేశ్వరం ప్రాజెక్టుపై విమర్శలు కొనసాగించేందుకు నీటిని వినియోగించడం లేదని ఆరోపించారు. బీఆర్ఎస్ వర్కింగ్ ప్రెసిడెంట్ కేటీఆర్ ఇటీవల మేడిగడ్డను సందర్శించి గోదావరిలో నీటి లభ్యత ఉందని నిరూపించిన తర్వాత ప్రభుత్వం చేస్తున్న వాదనలు బట్టబయలయ్యాయని అన్నారు.

కన్నెపల్లి పంప్‌హౌస్ పనితీరుపై ముఖ్యమంత్రి చేసిన వ్యాఖ్యలు సాంకేతిక పరిజ్ఞానం లోపాన్ని సూచిస్తున్నాయని హరీష్ రావు చెప్పారు. కన్నెపల్లి పంపులు 93.5 మీటర్ల నీటిమట్టం వద్ద కూడా పనిచేయగలవని, ప్రస్తుతం గోదావరి నీటిమట్టం 97.5 మీటర్ల వద్ద ఉండటంతో పంపులు నడపడానికి ఎలాంటి అడ్డంకి లేదని వివరించారు. ఈ అంశంపై ముఖ్యమంత్రి వ్యాఖ్యలను నీటిపారుదల శాఖ మంత్రి ఉత్తమ్ కుమార్ రెడ్డి సైతం సరిదిద్దాల్సి వచ్చిందన్నారు.

రిటైర్డ్ ఇరిగేషన్ ఇంజినీర్లపై ప్రభుత్వం వైఖరి మార్చుకుందని హరీష్ రావు ఆరోపించారు. గతంలో వారిని నిపుణులుగా కొనియాడిన ప్రభుత్వం, ఇప్పుడు గోదావరి నీటిని ఎత్తిపోసి రైతులను ఆదుకోవాలని సూచించినందుకు వారిపై చర్యల బెదిరింపులకు దిగుతోందన్నారు. మేడిగడ్డ సాంకేతికంగా పనికిరాదని వారు ఎప్పుడూ చెప్పలేదని, బ్యారేజీల ద్వారా నీటిని ఎల్లంపల్లికి తరలించాలని మాత్రమే సూచించారని చెప్పారు.

ఎల్లంపల్లి ప్రాజెక్టుకు నీటిని తరలించేందుకు కేవలం రూ.8.5 కోట్ల వ్యయంతో తాత్కాలిక కాఫర్‌డ్యామ్ నిర్మిస్తే సరిపోతుందని నీటిపారుదల శాఖ అధికారులు ప్రభుత్వానికి నివేదించినప్పటికీ చర్యలు తీసుకోవడం లేదన్నారు. రాజకీయ కారణాలతోనే పంపులను నిలిపివేశారని ఆరోపించారు. ఎల్లంపల్లి ప్రాజెక్టును కాంగ్రెస్ ప్రభుత్వం పూర్తి చేసిందన్న ముఖ్యమంత్రి వ్యాఖ్యలను కూడా ఆయ‌న‌ ఖండించారు. తెలంగాణ ఏర్పాటుకు ముందు కేవలం భూసేకరణ, పునరావాస పనులు మాత్రమే జరిగాయని, అనంతరం బీఆర్ఎస్ ప్రభుత్వం 13 వేలకుపైగా నిర్వాసిత కుటుంబాలకు పునరావాసం కల్పించి రూ.2 వేల కోట్లకు పైగా వెచ్చించి 20 టీఎంసీల సామర్థ్యంతో ప్రాజెక్టును పూర్తి చేసిందన్నారు.

ప్రస్తుతం ఎల్లంపల్లిలో వినియోగానికి కేవలం 4 నుంచి 5 టీఎంసీల నీరు మాత్రమే ఉందని, ఇదే నీరు తాగునీరు, విద్యుత్ ఉత్పత్తి, పరిశ్రమలు, సింగరేణి అవసరాలు, హైదరాబాద్ నీటి సరఫరాకు ఉపయోగపడాల్సి ఉంటుందని తెలిపారు. ప్రభుత్వం రాజకీయ అహంకారంతో నీటిని ఎత్తిపోసేందుకు నిరాకరిస్తే విద్యుత్ ఉత్పత్తిపైనా ప్రభావం పడే ప్రమాదం ఉందని హెచ్చరించారు. కాళేశ్వరం ప్రాజెక్టుపై అవినీతి ఆరోపణలను కూడా ఆయ‌న‌ తోసిపుచ్చారు. ప్రాజెక్టుకు మొత్తం రూ.87 వేల కోట్లు మాత్రమే ఖర్చు అయ్యాయని, అందులో మేడిగడ్డ-ఎల్లంపల్లి భాగానికి సుమారు 10 శాతం మాత్రమే వ్యయం జరిగిందన్నారు. మిగిలిన రిజర్వాయర్లు, కాలువలు, సొరంగాలు, పంపింగ్ స్టేషన్లు ఇప్పటికీ సమర్థంగా పనిచేస్తున్నాయని తెలిపారు.

అంతేకాకుండా కన్నెపల్లి, దేవాదుల, సీతారామ ఎత్తిపోతల పథకాల ద్వారా గోదావరి నీటిని వినియోగించకుండా వదిలేయడం వల్ల ఆంధ్రప్రదేశ్‌లోని పట్టిసీమ పథకానికి పరోక్షంగా ప్రయోజనం కలుగుతోందని ఆరోపించారు. తెలంగాణ రైతుల ప్రయోజనాలను దృష్టిలో ఉంచుకుని రాజకీయ భేదాలను పక్కనపెట్టి వెంటనే కన్నెపల్లి, దేవాదుల పంపులను ప్రారంభించాలని ప్రభుత్వాన్ని కోరారు. రైతుల పంటలను కాపాడేందుకు అవసరమైతే తనపై చర్యలు తీసుకున్నా సిద్ధమేనని, కానీ రైతులను రాజకీయాలకు బలిచేయవద్దని హరీష్ రావు విజ్ఞప్తి చేశారు.