కాళేశ్వరంపై కేంద్ర మంత్రి వ్యాఖ్యలు.. బీఆర్ఎస్ నేత రావుల శ్రీధర్ రెడ్డి ఫైర్

కాళేశ్వరం ఎత్తిపోతల పథకంపై కేంద్ర జలశక్తి మంత్రి సి.ఆర్. పాటిల్ చేసిన వ్యాఖ్యలపై భారత్ రాష్ట్ర సమితి (బీఆర్ఎస్) తీవ్రస్థాయిలో మండిపడింది. తెలంగాణపై విషం చిమ్మినంత మాత్రాన వాస్తవాలు మారిపోవని బీఆర్ఎస్ నేత రావుల శ్రీధర్ రెడ్డి శుక్రవారం పేర్కొన్నారు.

రాజ్యసభలో బీఆర్ఎస్ ఎంపీ కె.ఆర్. సురేష్ రెడ్డి కాళేశ్వరానికి జాతీయ హోదా కల్పించాలని కోరిన నేపథ్యంలో కేంద్ర మంత్రి సి.ఆర్. పాటిల్ స్పందిస్తూ.. ఈ ప్రాజెక్టు రూపకల్పనలో ప్రాథమిక లోపాలు ఉన్నాయని ఆరోపించారు. సరైన ప్రణాళిక లేకపోవడం వల్ల సుమారు రూ. 1 లక్ష కోట్లు వృధా అయ్యాయని, మేడిగడ్డ, అన్నారం, సుందిళ్ల బ్యారేజీల వైఫల్యాలే ఇందుకు నిదర్శనమని ఆయన పేర్కొన్నారు. ప్రజల సొమ్మును నీళ్లపాలు చేశారని విమర్శించారు.

ఈ వ్యాఖ్యలను ఖండిస్తూ రావుల శ్రీధర్ రెడ్డి మాట్లాడుతూ.. కేసీఆర్ పదేళ్ల పాలనలో తెలంగాణ సాగునీరు, విద్యుత్ రంగాల్లో దేశానికే రోల్ మోడల్‌గా నిలిచింది. కాళేశ్వరం ప్రపంచంలోనే అతిపెద్ద ఎత్తిపోతల పథకం. దీనివల్ల తెలంగాణకు మరో 100 ఏళ్ల పాటు నీటి కష్టాలు ఉండవు. ఇలాంటి అద్భుతమైన ప్రాజెక్టుపై రూ. 1 లక్ష కోట్లు కొట్టుకుపోయాయని అనడం దురదృష్టకరం అని అన్నారు.

ఆంధ్ర ప్రాంతానికి చెందిన నేతలు తమ వ్యాపార ప్రయోజనాల కోసమే తెలంగాణపై ప్రతికూలతను వ్యాప్తి చేస్తున్నారని ఆయన ఆరోపించారు. గతంలో ఇదే కేంద్ర ప్రభుత్వం (సిడబ్ల్యూసీ) అన్ని అనుమతులు ఇచ్చి, ప్రాజెక్టును ప్రశంసించిన విషయాన్ని ఆయన గుర్తు చేశారు. ఈ ప్రాజెక్టు వల్ల సాగు భూమి 1.31 కోట్ల ఎకరాల నుంచి 2.2 కోట్ల ఎకరాలకు పెరిగిందని బీఆర్ఎస్ నేతలు గుర్తు చేశారు. ఈ పరిణామాలతో తెలంగాణలో కాళేశ్వరం ప్రాజెక్టు అంశం మరోసారి రాజకీయంగా వేడెక్కింది.