కాబుల్ ఆసుపత్రిపై పాక్ వైమానిక దాడి.. 400 మంది మృతి
అఫ్గానిస్థాన్ రాజధాని కాబుల్లో పాకిస్థాన్ సైన్యం జరిపిన భీకర వైమానిక దాడి పెను విషాదాన్ని నింపింది. సోమవారం అర్థరాత్రి ఒక డ్రగ్ రిహాబిలిటేషన్ సెంటర్ (మాదకద్రవ్యాల విముక్తి కేంద్రం) లక్ష్యంగా జరిగిన ఈ దాడిలో సుమారు 400 మంది పౌరులు ప్రాణాలు కోల్పోయారు. వందలాది మంది తీవ్రంగా గాయపడ్డారు. ఇటీవలి కాలంలో అఫ్గాన్ పౌరులపై జరిగిన అత్యంత ఘోరమైన దాడుల్లో ఇది ఒకటిగా నిలిచింది. ఈ ఘటనపై అఫ్గాన్ పాలకులు, అంతర్జాతీయ సమాజం తీవ్ర దిగ్భ్రాంతి వ్యక్తం చేస్తున్నాయి.
అర్థరాత్రి వేళ మృత్యుఘోష
అఫ్గాన్ అధికారిక మీడియా 'టోలో న్యూస్' కథనం ప్రకారం.. కాబుల్లోని పునరావాస కేంద్రంపై పాక్ యుద్ధ విమానాలు అర్ధరాత్రి సమయంలో బాంబుల వర్షం కురిపించాయి. గాఢ నిద్రలో ఉన్న రోగులు, విధుల్లో ఉన్న వైద్య సిబ్బంది ఈ దాడిలో చిక్కుకుపోయారు. బాంబుల ధాటికి భవనం కుప్పకూలడంతో భారీ ప్రాణనష్టం సంభవించింది.
అఫ్గాన్ ఇస్లామిక్ ఎమిరేట్ డిప్యూటీ ప్రతినిధి హమ్దుల్లా ఫిత్రత్ మృతుల సంఖ్యను ధృవీకరిస్తూ, "పాకిస్థాన్ సైనిక చర్య వల్ల ఇప్పటివరకు 400 మంది అమాయకులు మరణించారు, మరో 250 మందికి పైగా గాయపడ్డారు" అని పేర్కొన్నారు. క్షతగాత్రుల్లో పలువురి పరిస్థితి విషమంగా ఉండటంతో మరణాల సంఖ్య ఇంకా పెరిగే అవకాశం ఉందని స్థానిక అధికారులు ఆందోళన వ్యక్తం చేస్తున్నారు.
రంగంలోకి సహాయక బృందాలు
పేలుడు ధాటికి ఆ ప్రాంతమంతా భీతావహంగా మారింది. సమాచారం అందుకున్న వెంటనే సహాయక బృందాలు ఘటనా స్థలానికి చేరుకుని శిథిలాల కింద చిక్కుకున్న వారిని వెలికితీశాయి. కాబుల్లోని అన్ని ప్రధాన ఆసుపత్రులను అప్రమత్తం చేసి, క్షతగాత్రులకు అత్యవసర చికిత్స అందిస్తున్నారు. గతంలోనూ సరిహద్దు ప్రాంతాల్లో పాక్ దాడులు జరిగినప్పటికీ, రాజధాని నగరంలోని ఒక వైద్య కేంద్రాన్ని లక్ష్యంగా చేసుకోవడం తీవ్ర ఉద్రిక్తతలకు దారితీసింది.
మండిపడ్డ తాలిబన్లు.. యుద్ధ మేఘాలు!
ఈ దాడిపై అఫ్గాన్ తాలిబన్ ప్రభుత్వం తీవ్ర ఆగ్రహం వ్యక్తం చేసింది. తాలిబన్ ప్రతినిధి జబీహుల్లా ముజాహిద్ పాకిస్థాన్కు ఘాటైన హెచ్చరికలు జారీ చేశారు. "పాకిస్థాన్తో దౌత్యం ముగిసింది. ఈ దారుణానికి ప్రతీకారం తీర్చుకుంటాం" అని ఆయన ప్రకటించారు. ఈ ప్రకటనతో ఇరు దేశాల మధ్య సరిహద్దు ఉద్రిక్తతలు యుద్ధ వాతావరణాన్ని తలపిస్తున్నాయి. 2021లో అమెరికా బలగాల ఉపసంహరణ తర్వాత స్థిరత్వం కోసం ప్రయత్నిస్తున్న అఫ్గాన్కు, పాక్ చర్యలు పెద్ద విఘాతంగా మారాయని విశ్లేషకులు భావిస్తున్నారు.
అంతర్జాతీయ సమాజం తీవ్ర దిగ్భ్రాంతి
పౌర మౌలిక సదుపాయాలపై జరిగిన ఈ దాడిని అంతర్జాతీయ మానవ హక్కుల సంస్థలు తీవ్రంగా ఖండించాయి. అఫ్గానిస్థాన్లో ఐరాస మానవ హక్కుల ప్రత్యేక ప్రతినిధి రిచర్డ్ బెన్నెట్ బాధితుల కుటుంబాలకు సానుభూతి తెలిపారు. అంతర్జాతీయ చట్టాలను గౌరవించాలని, ఆసుపత్రులు వంటి బహిరంగ ప్రదేశాలను లక్ష్యంగా చేసుకోవద్దని ఇరు దేశాలను కోరారు. ఇంటర్నేషనల్ హ్యూమన్ రైట్స్ ఫౌండేషన్ ఈ ఘటనపై స్వతంత్ర అంతర్జాతీయ విచారణ జరిపించాలని డిమాండ్ చేసింది. బాధ్యులను చట్టం ముందు నిలబెట్టాలని కోరింది.
ఐరాస వేదికగా పాక్పై భారత్ నిప్పులు
అఫ్గానిస్థాన్లోని పౌరులపై పాకిస్థాన్ బాంబు దాడులు చేయడాన్ని భారత్ ప్రపంచ వేదికైన ఐక్యరాజ్యసమితిలో తీవ్రంగా తప్పుబట్టింది. పవిత్రమైన రంజాన్ మాసంలో కూడా ఆ దేశం ఇలాంటి దాడులకు తెగబడటం, అఫ్గాన్ శరణార్థులను కనికరం లేకుండా దేశం నుండి వెళ్లగొట్టడంపై భారత్ ఆగ్రహం వ్యక్తం చేసింది. ఐరాసలో భారత ప్రతినిధి పి. హరీశ్ మాట్లాడుతూ.. పాకిస్థాన్ తన తప్పులను కప్పిపుచ్చుకోవడానికి పక్క దేశాలపై నిందలు వేస్తోందని మండిపడ్డారు. సొంత దేశంలోనే అహ్మదీయ ముస్లింలను హింసిస్తూ, మతాన్ని రాజకీయం కోసం వాడుకుంటూ శాంతి గురించి మాట్లాడటం పాక్ ద్వంద్వ నీతికి నిదర్శనమని ఆయన ఎండగట్టారు.