కాప్-33 ఆతిథ్య రేసు నుంచి తప్పుకున్న భారత్

అంతర్జాతీయ వాతావరణ మార్పుల సదస్సు 'కాన్ఫరెన్స్ ఆఫ్ పార్టీస్' (కాప్-33)కు ఆతిథ్యమివ్వాలన్న తన ప్రతిపాదనను భారత్ అనూహ్యంగా ఉపసంహరించుకుంది. 2028లో ఈ ప్రతిష్టాత్మక సదస్సును దేశంలో నిర్వహించాలని భారత్ ఆకాంక్షించగా, తాజాగా ఆ నిర్ణయాన్ని మార్చుకుంటున్నట్లు ఐక్యరాజ్యసమితికి స్పష్టం చేసింది. ఈ మేరకు ఏప్రిల్ 2వ తేదీన కేంద్ర పర్యావరణ, అటవీ, వాతావరణ మార్పుల మంత్రిత్వ శాఖ ఐక్యరాజ్యసమితి వాతావరణ మార్పుల విభాగానికి అధికారికంగా లేఖ రాసింది.

నిర్ణయం వెనుక కారణాలు

2023లో దుబాయ్‌లో జరిగిన కాప్-28 సదస్సులో ప్రధానమంత్రి నరేంద్ర మోడీ ప్రసంగిస్తూ.. 2028 నాటి సదస్సుకు భారత్ ఆతిథ్యం ఇవ్వడానికి సిద్ధంగా ఉందని ప్రకటించారు. ఈ ప్రతిపాదనను గత ఏడాది జరిగిన 17వ బ్రిక్స్ సదస్సులో సభ్యదేశాలు కూడా స్వాగతించాయి. సదస్సు నిర్వహణ కోసం కేంద్ర ప్రభుత్వం ప్రత్యేక విభాగాన్ని కూడా ఏర్పాటు చేసింది.

అయితే 2028 సంవత్సరానికి సంబంధించి భారత్‌కు ఇతర ముఖ్యమైన అంతర్జాతీయ బాధ్యతలు, కీలకమైన పనులు ఉండటంతో ప్రభుత్వం తన నిర్ణయాన్ని మార్చుకుంది. ఆ సమయంలో ఉండబోయే పని ఒత్తిడిని, ఇతర దేశాలకు ఇచ్చిన హామీలను దృష్టిలో ఉంచుకుని అన్ని రకాలుగా ఆలోచించిన తర్వాతే.. ఆ ఏడాది ఈ సదస్సును నిర్వహించలేమని భారత్ తన ప్రతిపాదనను వెనక్కి తీసుకుంది.

ఆతిథ్య రేసులో దక్షిణ కొరియా

ఐక్యరాజ్యసమితి నిబంధనల ప్రకారం కాప్ సదస్సు నిర్వహణ ఐదు ప్రాంతీయ సమూహాల మధ్య మారుతూ ఉంటుంది. ఆసియా-పసిఫిక్ ప్రాంతం కోటాలో భారత్ తన అభ్యర్థిత్వాన్ని ప్రకటించింది. ఇప్పుడు భారత్ తప్పుకోవడంతో, ఈ సదస్సు నిర్వహణకు ఆసక్తి చూపుతున్న దేశంగా దక్షిణ కొరియా మాత్రమే రేసులో మిగిలింది. గతంలో భారత్ 2002లో (కాప్-8) ఒకసారి మాత్రమే ఈ సదస్సును నిర్వహించింది. ప్రస్తుత షెడ్యూల్ ప్రకారం, కాప్-30 బ్రెజిల్‌లో జరగగా, ఈ ఏడాది కాప్-31కి టర్కీ, ఆస్ట్రేలియా దేశాలు సంయుక్తంగా ఆతిథ్యం ఇవ్వనున్నాయి. 2027లో (కాప్-32) సదస్సు ఇథియోపియాలో జరగనుంది.

పర్యావరణ లక్ష్యాలపై భారత్ స్పష్టత

ప్రపంచ వాతావరణ సదస్సు నిర్వహణ నుండి తప్పుకున్నప్పటికీ, పర్యావరణాన్ని కాపాడటంలో భారత్ తన బాధ్యతను ఏమాత్రం విస్మరించలేదు. దేశ కాలుష్యాన్ని తగ్గించేందుకు మార్చి 25న కేంద్ర ప్రభుత్వం కొత్త లక్ష్యాలను ప్రకటించింది. దీని ప్రకారం 2035 నాటికి దేశానికి అవసరమైన మొత్తం విద్యుత్తులో 60 శాతాన్ని బొగ్గు వంటివి కాకుండా సౌర, పవన శక్తి వంటి స్వచ్ఛమైన ఇంధనాల ద్వారానే ఉత్పత్తి చేయాలని నిర్ణయించింది. అలాగే దేశ ఆదాయానికి తగినట్లుగా వెలువడే కాలుష్య ఉద్గారాలను 47 శాతం మేర తగ్గించాలని, చెట్లు, అడవుల ద్వారా 4 బిలియన్ టన్నుల అదనపు కార్బన్‌ను పీల్చుకునేలా (కార్బన్ సింక్) చర్యలు చేపట్టాలని లక్ష్యంగా పెట్టుకుంది. ఈ భారీ మార్పుల ద్వారా ప్రకృతిని కాపాడుతూనే అభివృద్ధి చెందాలని భారత్ వేగంగా అడుగులు వేస్తోంది.