కాన్షీరాం పేరును కాంగ్రెస్ వాడుకుంటోంది: మాయావతి

బహుజన్ సమాజ్ పార్టీ (బీఎస్పీ) స్థాపకుడు కాన్షీరాం పేరును రాజకీయ ప్రయోజనాల కోసం కాంగ్రెస్ పార్టీ వినియోగిస్తోందని బీఎస్పీ అధినేత మాయావతి ఆరోపించారు. దళిత వ్యతిరేక సిద్ధాంతం ఉన్న కాంగ్రెస్ వల్లే బీఎస్పీ ఏర్పాటుకు అవసరం ఏర్పడిందని ఆమె పేర్కొన్నారు. శనివారం సోషల్ మీడియా వేదిక ఎక్స్‌లో హిందీలో చేసిన పోస్టులో మాయావతి ఈ వ్యాఖ్యలు చేశారు. ఇతర రాజకీయ పార్టీలు, ముఖ్యంగా కాంగ్రెస్, కాన్షీరాం పేరును ఉపయోగించి బీఎస్పీని బలహీనపర్చేందుకు ప్రయత్నిస్తున్నాయని ఆమె అన్నారు. దళితుల మేసయ్యగా పేరుగాంచిన రాజ్యాంగ ప్రధాన రూపకర్త బీఆర్‌‌.అంబేద్కర్‌‌కు కాంగ్రెస్ సరైన గౌరవం ఇవ్వలేదని మాయావతి విమర్శించారు. ఆయనకు కూడా అధికారంలో ఉన్నప్పుడు భారతరత్న ఇవ్వలేదని గుర్తు చేశారు. అలాంటి పార్టీ ఇప్పుడు కాన్షీరాం గారికి భారత్ రత్న ఇవ్వాలని చెప్పడం ఎలా సాధ్యమని ఆమె ప్రశ్నించారు.

లక్నోలో కాంగ్రెస్ నిర్వహించిన ‘సంవిధాన్ సమ్మేళన్’లో పార్టీ అధికారంలోకి వస్తే కాన్షీరాం గారికి భారతరత్న ఇవ్వాలని తీర్మానం చేయడం నేపథ్యంలో మాయావతి స్పందించారు. ఈ సమావేశంలో ప్రతిపక్ష నాయకుడు రాహుల్‌గాంధీ మాట్లాడుతూ, భారత తొలి ప్రధాని జవహర్‌‌లాల్‌ నెహ్రు బతికి ఉంటే కాన్షీరాం కాంగ్రెస్ నుంచి ముఖ్యమంత్రిగా ఉండేవారని వ్యాఖ్యానించారు. కాన్షీరాం మరణించినప్పుడు కేంద్రంలో కాంగ్రెస్ అధికారంలో ఉన్నప్పటికీ జాతీయ సంతాపదినం ప్రకటించలేదని మాయావతి విమర్శించారు. అదే విధంగా అప్పటి ఉత్తరప్రదేశ్ ప్రభుత్వం కూడా రాష్ట్ర దుఃఖదినం ప్రకటించలేదని ఆమె అన్నారు. దళితుల పేరుతో పనిచేస్తున్నట్లు చెప్పుకునే కొన్ని సంస్థలు పెద్ద పార్టీల చేతిలో బొమ్మలుగా మారి కాన్షీరాం పేరును రాజకీయ లాభాల కోసం ఉపయోగిస్తున్నాయని మాయావతి ఆరోపించారు.

మార్చి 15న కాన్షీరాం జయంతిని పురస్కరించుకుని దేశవ్యాప్తంగా, ముఖ్యంగా ఉత్తరప్రదేశ్‌లో నిర్వహించే కార్యక్రమాలను విజయవంతం చేయాలని బీఎస్పీ కార్యకర్తలకు ఆమె పిలుపునిచ్చారు. స్వాతంత్ర్యం తర్వాత నుంచి బహుజన్ సమాజ్ కాంగ్రెస్, బీజేపీ, సమాజ్‌వాదీ పార్టీ వంటి పార్టీలను ఎన్నోసార్లు పరీక్షించిందని, కానీ చివరికి తీవ్ర నిరాశే ఎదురైందని మాయావతి పేర్కొన్నారు. ఈ పార్టీలు ఊసరవెల్లిలా రంగులు మార్చుతున్నాయని ఆమె విమర్శించారు. బీఎస్పీ అనుచరులు అందరి మాటలు వినాలి కానీ తమ ఐక్యతను, ఓట్ల శక్తిని ఇతర పార్టీల చేతుల్లో పడనీయకూడదని ఆమె హెచ్చరించారు. అదే అంబేద్కర్‌‌, కాన్షీరాం జీవితాంతం చేసిన పోరాటాలకు నిజమైన నివాళి అవుతుందని మాయావతి తెలిపారు.