కాంగో పార్క్‌లో అరుదైన ఘటన.. పర్వత గొరిల్లాకు కవలల జననం

ఆఫ్రికాలోని కాంగో దేశంలో ఒక అరుదైన ఘటన చోటుచేసుకుంది. యుద్ధం, అలజడులతో అట్టుడుకుతున్న తూర్పు కాంగోలోని విరుంగా నేషనల్ పార్క్‌లో ఒక పర్వత గొరిల్లా కవల పిల్లలకు జన్మనిచ్చింది. అంతరించిపోతున్న ఈ జాతి గొరిల్లాల సంఖ్యను పెంచే క్రమంలో ఇది ఒక గొప్ప విజయమని పార్క్ అధికారులు అభివర్ణించారు.

జనవరి 3వ తేదీన పార్క్ సిబ్బంది గొరిల్లాల ఆరోగ్యాన్ని తనిఖీ చేస్తున్న సమయంలో ఈ కవలల జననం బయటపడింది. 'మఫుకో' అనే 22 ఏళ్ల గొరిల్లా ఈ ఇద్దరు మగ పిల్లలకు జన్మనిచ్చింది. ప్రస్తుతం తల్లి, పిల్లలు ఇద్దరూ ఆరోగ్యంగా ఉన్నారని పార్క్ అధికారులు బుధవారం విడుదల చేసిన ఒక ప్రకటనలో తెలిపారు. 2026 సంవత్సరంలో పార్క్‌లో నమోదైన మొదటి జననం ఇదే కావడం విశేషం.

రక్షణే అతిపెద్ద సవాలు

విరుంగా నేషనల్ పార్క్ ఆఫ్రికాలోనే అత్యంత పురాతనమైనది. సుమారు 3,000 చదరపు మైళ్ల విస్తీర్ణంలో ఉన్న ఈ అడవిలో ప్రపంచంలోని చివరి పర్వత గొరిల్లాలు నివసిస్తున్నాయి. అయితే, ఈ ప్రాంతంలో తిరుగుబాటు దారుల అల్లర్లు, అడవుల నరికివేత వల్ల గొరిల్లాల మనుగడకు ముప్పు పొంచి ఉంది. అందుకే ఈ కవలల సంరక్షణ కోసం అధికారులు ప్రత్యేక నిఘా ఏర్పాటు చేశారు.

తల్లి గొరిల్లా 'మఫుకో' పోరాటం

తల్లి గొరిల్లా మఫుకో జీవితం ఎంతో కష్టతరమైనది. 2007లో ఆమె తల్లిని సాయుధ దుండగులు చంపేయడంతో మఫుకో అనాథగా మారింది. ఆ తర్వాత 'కబిరిజి' కుటుంబం నుండి విడిపోయి 'బగేని' కుటుంబంలో చేరింది. మఫుకో ఇప్పటివరకు మొత్తం ఏడుగురు పిల్లలకు జన్మనిచ్చింది. గతంలో 2016లో కూడా ఆమె కవలలకు జన్మనిచ్చినప్పటికీ, పుట్టిన వారం రోజులకే అవి చనిపోయాయి. అందుకే ఇప్పుడు పుట్టిన పిల్లలను ప్రాణాలతో కాపాడుకోవడం అధికారులకు ఒక పెద్ద సవాలుగా మారింది.

పెరుగుతున్న గొరిల్లాల సంఖ్య

ప్రస్తుతం ఈ కవలల రాకతో బగేని గొరిల్లా కుటుంబ సభ్యుల సంఖ్య 59కి చేరింది. ఇది ఆ పార్క్‌లోనే అతిపెద్ద గొరిల్లా కుటుంబం. పర్వత గొరిల్లాల్లో కవలలు పుట్టడం అనేది చాలా అరుదు (కేవలం 1 శాతం లోపు మాత్రమే). ఇవి పుట్టిన మొదటి కొన్ని నెలల వరకు పూర్తిగా తల్లిపైనే ఆధారపడతాయి. తల్లి గొరిల్లా కూడా ఒకేసారి ఇద్దరిని మోయడం, పాలివ్వడం కష్టమైన పని కావడంతో రెంజర్లు నిరంతరం వీటిని గమనిస్తున్నారు.

ప్రపంచవ్యాప్తంగా అడవుల్లో కేవలం 1,100 కంటే తక్కువ పర్వత గొరిల్లాలు మాత్రమే మిగిలి ఉన్నాయి. ఇలాంటి పరిస్థితుల్లో ఇద్దరు మగ గొరిల్లాలు పుట్టడం వన్యప్రాణి ప్రేమికులకు గొప్ప వార్త. పర్యావరణ పరిరక్షణ కోసం చేస్తున్న కృషితో గొరిల్లాల సంఖ్య మెల్లమెల్లగా పెరుగుతుండటం శుభపరిణామం.

పర్వత గొరిల్లాల గురించి..

పర్వత గొరిల్లాలు ప్రపంచంలోనే అత్యంత అరుదైన కోతి జాతులలో ఒకటి. ఇవి ప్రధానంగా ఆఫ్రికాలోని కాంగో, రువాండా, ఉగాండా సరిహద్దుల్లోని ఎత్తైన పర్వత అడవుల్లో జీవిస్తాయి. ఒంటి నిండా దట్టమైన వెంట్రుకలు ఉండటం వల్ల ఇవి ఎంతటి చలినినైనా తట్టుకోగలవు. ఇవి చాలా శాంత స్వభావికులు. కేవలం ఆకుకూరలు, పండ్లు వంటి శాఖాహారాన్నే తింటాయి. ఈ గొరిల్లా గుంపునకు నాయకత్వం వహించే మగ గొరిల్లాను 'సిల్వర్ బ్యాక్' అని పిలుస్తారు. ప్రస్తుతం అడవులు తగ్గిపోవడం, అక్రమ వేట, యుద్ధాల వల్ల ఈ అరుదైన జీవులు అంతరించిపోయే ప్రమాదంలో ఉన్నాయి.