ఐరాస భద్రతా మండలిలో సంస్కరణలు అనివార్యం: జైశంకర్

ఐక్యరాజ్యసమితి భద్రతా మండలిలో సంస్కరణలు చేపట్టాల్సిన సమయం ఆసన్నమైందని భారత విదేశాంగ మంత్రి ఎస్. జైశంకర్ స్పష్టం చేశారు. ఫ్రాన్స్‌లో గురు, శుక్రవారాల్లో జరిగిన జీ-7 విదేశాంగ మంత్రుల సమావేశం లో ఆయన పాల్గొన్నారు. అంతర్జాతీయ పాలనలో సమూల మార్పులు రావాలని, శాంతి పరిరక్షణ కార్యకలాపాలను క్రమబద్ధీకరించడంతో పాటు మానవతా సరఫరా గొలుసులను బలోపేతం చేయాల్సిన అవసరం ఉందని ఆయన ఉద్ఘాటించారు. భద్రతా మండలిలో భారత్ శాశ్వత సభ్యత్వానికి అర్హురాలని దశాబ్దాలుగా పోరాడుతున్న తరుణంలో జైశంకర్ వ్యాఖ్యలు ప్రాధాన్యత సంతరించుకున్నాయి.

గ్లోబల్ సౌత్ ఆవేదన

ప్రపంచ దేశాలు ఎదుర్కొంటున్న సవాళ్లపై జైశంకర్ సదస్సులో సుదీర్ఘంగా మాట్లాడారు. ముఖ్యంగా 'గ్లోబల్ సౌత్' (అభివృద్ధి చెందుతున్న దేశాలు) ఎదుర్కొంటున్న ఇంధన సంక్షోభం, ఎరువుల కొరత, ఆహార భద్రతపై ఆయా దేశాల ఆందోళనలను జీ-7 వేదికపై ప్రస్తావించారు. ప్రపంచ ఆర్థిక వ్యవస్థలో కీలకమైన ఈ అంశాలను విస్మరించకూడదని కోరారు. ఈ సదస్సుకు భారత్‌తో పాటు సౌదీ అరేబియా, దక్షిణ కొరియా, బ్రెజిల్ దేశాలను కూడా ఫ్రాన్స్ ప్రత్యేకంగా ఆహ్వానించింది.

హోర్ముజ్ జలసంధిపై ఉత్కంఠ

పశ్చిమాసియాలో నెలకొన్న ఉద్రిక్తతలు, ముఖ్యంగా ఇరాన్ హోర్ముజ్ జలసంధిని దిగ్బంధించడంతో ప్రపంచవ్యాప్తంగా చమురు, గ్యాస్ ధరలు ఆకాశాన్నంటాయి. ప్రపంచ చమురు రవాణాలో 20 శాతం వాటా ఉన్న ఈ జలసంధిని అంతర్జాతీయ షిప్పింగ్ కోసం తెరిచి ఉంచేలా సమన్వయ ప్రయత్నాలపై జైశంకర్ చర్చించారు. భారత్ తన ఇంధన అవసరాల కోసం పశ్చిమాసియాపైనే ఎక్కువగా ఆధారపడుతున్న తరుణంలో ఈ ప్రాంతంలో శాంతి భద్రతలు అత్యంత కీలకమని అన్నారు.

కెనడాతో ద్వైపాక్షిక చర్చలు

సదస్సు మధ్యలో కెనడా విదేశాంగ మంత్రి అనితా ఆనంద్‌తో జైశంకర్ ప్రత్యేకంగా భేటీ అయ్యారు. ఈ ఏడాది ప్రారంభంలో ఇరు దేశాల ప్రధానమంత్రులు చర్చించుకున్న అంశాల పురోగతిపై వీరు సమీక్షించారు. వాణిజ్యం, మధ్య ప్రాచ్య దేశాల పరిస్థితితో పాటు కీలక ఖనిజాలు, వ్యవసాయం, విద్యా రంగాల్లో సహకారాన్ని మరింత పెంపొందించుకోవాలని ఇరువురు మంత్రులు నిర్ణయించారు.

జీ-7 కూటమి ప్రాధాన్యత

కెనడా, ఫ్రాన్స్, జర్మనీ, ఇటలీ, జపాన్, యూకే, అమెరికాతో పాటు యూరోపియన్ యూనియన్ సభ్యత్వం కలిగిన ఈ జీ-7 కూటమి.. అంతర్జాతీయ ఆర్థిక, భౌగోళిక సవాళ్లను ఎదుర్కోవడంలో అత్యంత శక్తివంతమైన వేదికగా ఉంది. ఫ్రాన్స్ విదేశాంగ మంత్రి జీన్-నోయెల్ బారో ఆహ్వానం మేరకు హాజరైన జైశంకర్, ఇతర దేశాల మంత్రులతో కూడా ద్వైపాక్షిక చర్చలు జరిపారు.