ఐపీఎల్ వేలంలో కార్తిక్ శర్మకు రూ.14.20 కోట్లు.. ఆనందంతో కన్నీళ్లు
ఐపీఎల్ 2026 మినీ వేలంలో 19 ఏళ్ల యువ క్రికెటర్ కార్తిక్ శర్మ పేరు దేశవ్యాప్తంగా చర్చనీయాంశంగా మారింది. సోమవారం అబుదాబీలో జరిగిన వేలంలో ఐదు సార్లు చాంపియన్గా నిలిచిన చెన్నై సూపర్ కింగ్స్ జట్టు అతడిని ఏకంగా రూ.14.20 కోట్లకు కొనుగోలు చేయడంతో, ఈ యువ ఆటగాడు ఆనందంతో కన్నీళ్లు పెట్టుకున్నాడు.
కేవలం రూ.30 లక్షల ప్రాథమిక ధరతో వేలంలోకి వచ్చిన కార్తిక్, తనను ఎవరు కొనుగోలు చేస్తారో లేదోనని మొదట భయపడినట్లు వెల్లడించాడు. బిడ్డింగ్ ప్రారంభమైన సమయంలో తాను అమ్ముడుపోతానా లేదా అన్న ఆందోళనలో ఉన్నానని, కానీ జట్లు ఒకదానికొకటి పోటీగా ధర పెంచుతుండటాన్ని చూసి తన కళ్లలో నీళ్లు తిరిగాయని చెప్పాడు. వేలం ముగిసిన తర్వాత కూడా ఆ భావోద్వేగం తగ్గలేదని, ఆనందంతో ఏడుపు ఆపుకోలేకపోయానని కార్తిక్ తెలిపాడు.
కార్తిక్ ఒక వికెట్కీపర్-బ్యాట్స్మన్. టీ20 క్రికెట్లో ఈ తరహా ఆటగాళ్లకు డిమాండ్ ఎక్కువగా ఉంటుంది. వికెట్కీపింగ్ చేయడమే కాకుండా దూకుడుగా బ్యాటింగ్ చేయగల ఆటగాడు జట్టులో ఉంటే, ఆడే జట్టును సరిగా బ్యాలన్స్ చేసుకునేందుకు అవకాశం ఉంటుందని క్రికెట్ నిపుణులు చెబుతున్నారు. ఇదే కారణంగా కార్తిక్ వంటి యువ ఆటగాళ్ల విలువ వేలంలో ఎక్కువగా పెరిగిందని విశ్లేషకులు అభిప్రాయపడుతున్నారు.
కేవలం 19 ఏళ్ల వయసులోనే భవిష్యత్తును దృష్టిలో పెట్టుకుని జట్లు పెట్టుబడి పెట్టగల ఆటగాడిగా కార్తిక్ కనిపించాడని తెలుస్తోంది. ఇటీవలి కాలంలో ఐపీఎల్ జట్లు, వయసు పైబడిన ఆటగాళ్ల కంటే, దీర్ఘకాలికంగా ఉపయోగపడే అన్క్యాప్డ్ యువ ఆటగాళ్లపై ఎక్కువ దృష్టి పెడుతున్నాయి. ఈ ధోరణికి కార్తిక్ ఎంపిక కూడా ఉదాహరణగా నిలిచింది.
అంతర్జాతీయ క్రికెట్ ఆడకపోయినా, ఆయన చిన్నవయస్సు, టోర్నీల్లో కార్తిక్ ప్రతిభతో ఐపీఎల్ జట్ల స్కౌట్లను ఆకర్షించినట్లు సమాచారం. ఒత్తిడిలోనూ ఆడగలిగే సామర్థ్యం, మ్యాచ్ పరిస్థితులను ఎదుర్కొనే తీరుపై జట్లకు నమ్మకం కలిగిందని చెబుతున్నారు.
వేలంలో కార్తిక్ ధర ఒక్కసారిగా పెరగడం వెనుక ఒక్క జట్టు నిర్ణయం కంటే, అనేక జట్ల మధ్య జరిగిన తీవ్ర పోటీ కూడా ప్రధాన కారణంగా మారింది. మొదట ముంబై ఇండియన్స్, లక్నో సూపర్ జెయింట్స్ బిడ్డింగ్ ప్రారంభించగా, తర్వాత కోల్కతా నైట్ రైడర్స్ కూడా రంగప్రవేశం చేసింది. ముంబై తప్పుకోగా, లక్నో, కేకేఆర్ మధ్య పోటీ రూ.2.80 కోట్ల వరకు వెళ్లింది. ఆ సమయంలో చెన్నై సూపర్ కింగ్స్ బిడ్డింగ్లోకి రావడంతో ధర వేగంగా పెరిగింది.
రూ.13.20 కోట్ల వద్ద కేకేఆర్ పోటీ నుంచి తప్పుకోగా, సన్రైజర్స్ హైదరాబాద్ బిడ్డింగ్లోకి దిగింది. చివరికి చెన్నై సూపర్ కింగ్స్ రూ.14.20 కోట్లతో కార్తిక్ను తమ జట్టులోకి తీసుకుంది. ఇదే మొత్తానికి ఉత్తరప్రదేశ్కు చెందిన ప్రశాంత్ వీర్ కూడా అమ్ముడవడంతో, ఇద్దరూ ఐపీఎల్ చరిత్రలో అత్యధిక ధర పలికిన అన్క్యాప్డ్ ఆటగాళ్లుగా నిలిచారు.
చెన్నై సూపర్ కింగ్స్ తీసుకున్న ఈ నిర్ణయం వారి జట్టు వ్యూహానికి అనుగుణంగానే ఉందని పరిశీలకులు చెబుతున్నారు. అనుభవజ్ఞుల నేతృత్వంలో యువ ఆటగాళ్లను తీర్చిదిద్దడంలో సీఎస్కేకు మంచి పేరు ఉంది. ముఖ్యంగా మహేంద్ర సింగ్ ధోనీ వంటి సీనియర్ వికెట్కీపర్ సమక్షంలో కార్తిక్ను భవిష్యత్తు కోసం సిద్ధం చేయాలన్న ఆలోచన కూడా ఈ ఎంపికలో భాగంగా ఉన్నట్లు తెలుస్తోంది.
ఈ విజయానికి తన కుటుంబ సభ్యులు, స్నేహితుల సహకారమే కారణమని కార్తిక్ భావోద్వేగంగా చెప్పాడు. వారి మద్దతు లేకపోతే ఈ స్థాయికి చేరుకునే వాడిని కాదని పేర్కొన్నాడు. తన కుటుంబం మొత్తం ఈ సందర్భాన్ని సంబరంగా జరుపుకుంటోందని తెలిపాడు.
చెన్నై సూపర్ కింగ్స్ తరఫున ఆడే అవకాశం తన జీవితంలో మరిచిపోలేని అనుభవమని కార్తిక్ అన్నాడు. ముఖ్యంగా ధోనీతో కలిసి ఆడే అవకాశం రావడం ఎంతో ఆనందంగా ఉందని, ఆయన నుంచి చాలా విషయాలు నేర్చుకోవాలని ఆశిస్తున్నానని చెప్పాడు. ఈ వేలం తన జీవితాన్నే మార్చేసిందని, ఇప్పటికీ ఈ విషయం నిజమేనా అనే భావన నుంచి బయటపడలేకపోతున్నానని కార్తిక్ తెలిపాడు.