ఏపీ లిక్కర్ స్కాం…ఈడీ విచారణకు హాజరైన మిథున్ రెడ్డి

రాష్ట్రంలో గత ప్రభుత్వ హయాంలో జరిగినట్లు ఆరోపణలు ఎదుర్కొంటున్న రూ. 3,500 కోట్ల భారీ మద్యం కుంభకోణం కేసులో విచారణ ముమ్మరమైంది. ఈ స్కాంలో మనీలాండరింగ్ కోణాన్ని వెలికితీస్తున్న ఎన్‌ఫోర్స్‌మెంట్ డైరెక్టరేట్ (ఈడీ) తన దర్యాప్తును వేగవంతం చేసింది. ఇందులో భాగంగా రాజంపేట వైకాపా ఎంపీ పీ.వీ. మిథున్ రెడ్డి శుక్రవారం ఈడీ అధికారుల ముందు హాజరయ్యారు.

మనీలాండరింగ్ నిరోధక చట్టం కింద నోటీసులు అందుకున్న మిథున్ రెడ్డి, నిర్ణీత సమయానికి ఈడీ జోనల్ కార్యాలయానికి చేరుకున్నారు. మద్యం విధానంలో అక్రమాలు, నిధుల మళ్లింపుపై అధికారులు ఆయనను సుదీర్ఘంగా ప్రశ్నించారు. ఈ సందర్భంగా ఆయన వాంగ్మూలాన్ని అధికారులు రికార్డ్ చేశారు. కాగా గతంలో రాష్ట్ర ప్రభుత్వం ఏర్పాటు చేసిన ప్రత్యేక దర్యాప్తు బృందం (సిట్) మిథున్ రెడ్డిని ఏ-2 నిందితుడిగా పేర్కొంటూ 2025 జూలైలో అరెస్టు చేయగా ప్రస్తుతం ఆయన బెయిల్‌పై ఉన్న విషయం తెలిసిందే.

అయితే ఇదే కేసులో మరో కీలక నిందితుడిగా ఉన్న విజయసాయి రెడ్డిని గురువారం ఈడీ విచారించింది. మద్యం వ్యాపారంలో వచ్చిన అక్రమ సొమ్మును విజయసాయి రెడ్డి ద్వారా మాజీ ముఖ్యమంత్రి వైఎస్ జగన్ మోహన్ రెడ్డికి చేరవేశారనేది ప్రధాన ఆరోపణ. దీనికి సంబంధించి షెల్ కంపెనీల ద్వారా జరిగిన లావాదేవీలపై ఈడీ ఆరా తీస్తోంది.

సిట్ ఇప్పటికే దాఖలు చేసిన మూడు చార్జిషీట్లలో విస్తుపోయే నిజాలను వెల్లడించింది. మద్యం సిండికేట్ల ద్వారా నెలకు రూ. 50 కోట్ల నుంచి రూ. 60 కోట్ల వరకు అక్రమంగా వసూలు చేశారని, ఈ కిక్ బ్యాక్ లలో మాజీ ముఖ్యమంత్రి జగన్ మోహన్ రెడ్డి కూడా లబ్ధిదారుడని సిట్ పేర్కొంది. అయితే ప్రస్తుతం ప్రాసిక్యూషన్ ఫిర్యాదుల్లో ఆయన పేరును నిందితుడిగా చేర్చకపోయినప్పటికీ దర్యాప్తు సంస్థల విచారణ మాత్రం ఆ దిశగానే సాగుతున్నట్లు సమాచారం.

ఈ పరిణామాలపై వైకాపా అధినేత వైఎస్ జగన్ తీవ్రంగా స్పందించారు. కూటమి ప్రభుత్వం రాజకీయ కక్షతోనే తమ నేతలను ఇబ్బంది పెడుతోందని ఆరోపించారు. కేంద్ర దర్యాప్తు సంస్థలను అడ్డం పెట్టుకుని ప్రతిపక్షాలను వేధించడం ప్రజాస్వామ్య విరుద్ధమని ఆయన ఆరోపించారు. ఇది కేవలం తప్పుడు కేసు అని న్యాయస్థానాల్లో తమకు న్యాయం జరుగుతుందని ధీమా వ్యక్తం చేశారు.

సెప్టెంబర్ 2025లో ఈడీ ఈ కేసును స్వీకరించినప్పటి నుంచి వరుస విచారణలతో వైకాపా శ్రేణుల్లో ఆందోళన మొదలైంది. రానున్న రోజుల్లో ఈ కేసులో మరిన్ని అరెస్టులు జరిగే అవకాశం ఉందన్న ప్రచారం రాజకీయ వర్గాల్లో హాట్ టాపిక్‌గా మారింది.