ఏపీ ఆరోగ్య సంస్థ, విపత్తు నిర్వహణ సంస్థల మద్య సమన్వయం

ఆంధ్రప్రదేశ్ రాష్ట్రంలో మొంథా” తుఫాను సమయంలో , సమన్వయంతో కూడిన విపత్తు నిర్వహణ, ఆరోగ్య సంరక్షణ వ్యవస్థ అరుదైన విజయాన్ని నమోదు చేసింది. రాష్ట్రంలోని ముప్పు ఉన్న ప్రాంతాల నుంచి పునరావాస కేంద్రాలకు తరలించిన 3,465 గర్భిణీ, బాలింత మహిళలు అందరూ సురక్షితంగా ఉన్నారని, వారికి సంబంధించిన వివరాలు నమోదయ్యాయని ఆంధ్రప్రదేశ్ రాష్ట్ర విపత్తు నిర్వహణ సంస్థ ఆరోగ్య శాఖ అధికారికంగా ప్రకటించాయి. పెద్ద ఎత్తున చేపట్టిన ఈ తరలింపు ప్రక్రియ ప్రభుత్వ "ప్రాణ నష్టం సున్నా" లక్ష్యంలో భాగం. ఈ సన్నద్ధత వ్యూహంలో, విపరీత వాతావరణ అత్యవసర పరిస్థితులలో గర్భిణీ స్త్రీలు, శిశువులు, వృద్ధులకు అత్యధిక ప్రాధాన్యత ఇవ్వబడింది.

అత్యంత ప్రమాదకర జిల్లాల్లో ముందుగా తరలింపు

తుఫాను తీరాన్ని తాకడానికి రెండు రోజుల ముందే బాలింతలు, గర్భిణీ స్త్రీల తరలింపు ప్రక్రియ ప్రారంభమైంది. భారత వాతావరణ శాఖ అత్యధిక ప్రభావం ఉంటుందని గుర్తించిన తీరప్రాంతాలు, ఏజెన్సీ ప్రాంతాలపై ప్రధానంగా దృష్టి సారించారు. మొదటి దశలో, తుఫాను నేరుగా తాకే మార్గంలో ఉన్న నాలుగు తీర జిల్లాల నుండి 787 గర్భిణీ స్త్రీలను తరలించారు. అధికారుల లెక్కల ప్రకారం కృష్ణాజిల్లాలో 240 మంది, ఏలూరు లో 171, కోనసీమ 150, తూర్పు గోదావరి 142 ఉన్నారు.

కొండచరియలు విరిగిపడటం వల్ల తరచుగా రోడ్లు మూసుకుపోయే అల్లూరి సీతారామరాజు జిల్లాలో, అడ్వాన్స్డ్ ప్రెగ్నెన్సీలో ఉన్న 92 మంది మహిళలను 22 మండలాల నుండి పాడేరు, చింతపల్లి, రామచంద్రాపురం ఆసుపత్రులకు తరలించారు. భారీ వర్షాల కారణంగా వరదలు వచ్చినా, పెద్ద ఎత్తున స్థానభ్రంశం జరగని శ్రీకాకుళం, విజయనగరం, పార్వతీపురం, మన్యం జిల్లాల నుండి కూడా చిన్న స్థాయిలో తరలింపులు జరిగాయి.

ఆరోగ్య మౌలిక సదుపాయాలు, సమన్వయం

17 జిల్లాలలో 551 పునరావాస కేంద్రాలను తాత్కాలిక వైద్య శిబిరాలుగా మార్చారు. వీటిలో వైద్యులు, ఆగ్జిలరీ నర్సు మిడ్‌వైఫ్‌లు, ఆశా కార్యకర్తలు, పారామెడికల్ బృందాలు పనిచేశాయి. ప్రతి కేంద్రం రియల్ టైమ్ గవర్నెన్స్ సొసైటీ ద్వారా పేషెంట్ రిజిస్టర్లను నిర్వహించింది, తద్వారా తుఫానుకు ముందు, సమయంలో, తరువాత ప్రతి మహిళ యొక్క స్థితిని అధికారులు ట్రాక్ చేయగలిగారు.

ఆరోగ్య శాఖ ప్రకారం, ఈ వ్యూహం రెండు ప్రధాన అంశాలను కలిగి ఉంది. గర్భం చివరి దశలో ఉన్న మహిళలను సురక్షితమైన ఆసుపత్రులకు తరలించడం, మిగతావారిని వాతావరణ పరిస్థితులు మెరుగుపడే వరకు కమ్యూనిటీ హెల్త్ సెంటర్లలో పర్యవేక్షణలో ఉంచడం. ఏఎన్ఎమ్ లు గ్రామ స్థాయిలో డేటాను సేకరించి, 108 అంబులెన్సులు, పడవలు లేదా ప్రభుత్వ వాహనాల ద్వారా రవాణాను సమన్వయం చేశారు.

తుఫాను సమయంలో, తరువాత ప్రసవాలు

తుఫాను కాలంలో పలువురు మహిళలు ఎటువంటి సమస్యలు లేకుండా ప్రసవించినట్లు జిల్లా రికార్డులు చూపిస్తున్నాయి

• కృష్ణా జిల్లా: మచిలీపట్నం, అవనిగడ్డ, గుడివాడ ప్రభుత్వ ఆసుపత్రులలో 17 సురక్షిత ప్రసవాలు.

• ఏలూరు జిల్లా: సహాయక కేంద్రాలు, ఆసుపత్రులలో 8 ప్రసవాలు.

• కోనసీమ: అమలాపురం ఏరియా ఆసుపత్రిలో 5 మంది మహిళలు ప్రసవించారు.

• తూర్పుగోదావరి: రాజమండ్రి, కాకినాడ ఆసుపత్రులలో 3 జననాలు నమోదయ్యాయి.

• ఏఎస్ఆర్ జిల్లా: భారీ వర్షాల మధ్య పాడేరు కమ్యూనిటీ హెల్త్ సెంటర్‌లో 2 ప్రసవాలు జరగగా తల్లీబిడ్డలు ఇద్దరూ సూరకక్షితంగా ఉన్నారు.

రాష్ట్రంలో ఎక్కడా తల్లి లేదా నవజాత శిశు మరణాలు నమోదు కాలేదు. ఆరోగ్య శాఖ మంత్రి వై. సత్య కుమార్ యాదవ్ మాట్లాడుతూ, “తుఫాను ప్రమాదకర ప్రాంతాలలో గుర్తించిన ప్రతి గర్భిణీ స్త్రీకి సకాలంలో వైద్య సంరక్షణ అందింది. ఈ విభాగంలో మేము సున్నా ప్రాణనష్టాన్ని సాధించాం,” అని తెలిపారు.

ప్రస్తుతం అంగన్‌వాడీ కేంద్రాలు, మహిళా శిశు సంక్షేమ శాఖ బృందాల ద్వారా ప్రసవానంతర తనిఖీలు, పోషకాహార కిట్‌లు, శిశు ఆహార సరఫరాలు జరుగుతున్నాయి. ప్రసవం తర్వాత కనీసం పది రోజుల పాటు పర్యవేక్షణ కొనసాగుతుంది.

తుఫాను మధ్య శౌర్యం - సోషల్ మీడియా కథనం

అధికారిక డేటా వ్యవస్థాగత సన్నద్ధతను హైలైట్ చేస్తుండగా, మంగళవారం రాత్రి సోషల్ మీడియాలో ఒక కథనం ప్రజల దృష్టిని ఆకర్షించింది.

"తుఫాను మధ్య శౌర్యం!" అనే శీర్షికతో ఉన్న పోస్ట్, 108 అంబులెన్స్ పైలట్ సురేష్ అల్లూరి జిల్లాలోని డుంబ్రిగూడ మండలంలో ఉయ్యాలవాడ గ్రామానికి చెందిన ప్రసవ వేదనలో ఉన్న సకేరి అనితను రక్షించడానికి వరద నీటిని సాహసోపేతంగా దాటి, ఆమెను ఆసుపత్రికి సురక్షితంగా చేర్చినట్లు పేర్కొంది.

ఈ కథనం ఆన్‌లైన్‌లో విస్తృతంగా వ్యాపించింది. అయితే, బుధవారం ఉదయం వరకు, ఆరోగ్య శాఖ అల్లూరి జిల్లా కలెక్టర్ కార్యాలయం ఆ పేరుతో జరిగిన రెస్క్యూను ధృవీకరించలేదు. తుఫాను ‘మొంథా ’ సమయంలో ధృవీకరించబడిన ఇతర రెస్క్యూలకు ఈ వివరణ సరిపోలుతున్నప్పటికీ, క్షేత్ర స్థాయి ధృవీకరణ జరిగే వరకు ఇది అధృవీకృతంగానే ఉంటుందని అధికారులు తెలిపారు.

గత అనుభవాల నుండి నేర్చుకున్న పాఠాలు

గతంలో వచ్చిన తుఫానులు మైచాంగ్ (2023), గులాబ్ (2021), టిట్లీ (2018) మాతా శిశు ఆరోగ్య ప్రతిస్పందనలో లోపాలను బహిర్గతం చేశాయి. అప్పటి నుండి ఆరోగ్య శాఖ ముందస్తు గుర్తింపు ప్రోటోకాల్‌లు, అంబులెన్స్ ట్రాకింగ్ మరియు అత్యవసర సిబ్బందికి క్రాస్-ట్రైనింగ్‌ను ప్రవేశపెట్టింది.

108 ఎమర్జెన్సీ నెట్‌వర్క్, జిల్లా నియంత్రణ గదులు ఇప్పుడు ముప్పు ఉన్న ప్రాంతాల్లోని గర్భిణీ స్త్రీల జాబితాలను అప్‌డేట్ చేస్తూ, తరలింపు ఆదేశాలు జారీ చేయడానికి ముందే ముందు జాగ్రత్తగా తరలింపును ప్రారంభించేందుకు వీలు కల్పిస్తున్నాయి.

సన్నద్ధతకు విజయవంతమైన పరీక్ష

రియల్ టైమ్ డేటా, ముందస్తు తరలింపు మరియు క్షేత్ర స్థాయి ఆరోగ్య సంరక్షణ సేవలను ఏకీకృతం చేయడం వలన అత్యంత దెబ్బతిన్న మండలాల్లో కూడా ప్రాణ నష్టం నివారించబడిందని స్వతంత్ర పరిశీలకులు గుర్తించారు. సాంకేతికతను, క్షేత్ర స్థాయి సమన్వయాన్ని కలిపిన రాష్ట్ర విధానం, ఇటీవలి సంవత్సరాలలో తుఫాను సమయంలో చేపట్టిన అత్యంత సమగ్రమైన మాతా శిశు ఆరోగ్య జోక్యాలలో ఒకటిగా ప్రశంసలు అందుకుంటోంది.

ఆంధ్రప్రదేశ్‌లో గుర్తించబడిన ప్రతి గర్భిణీ, బాలింత మహిళ మొంథా తుఫాను నుండి సురక్షితంగా బయటపడ్డారు. ఇది ప్రకృతి విరుచుకుపడినప్పుడు అత్యంత బలహీన పౌరులను రక్షించడంలో రాష్ట్రం యొక్క సామర్థ్యం పెరుగుతోందని నొక్కి చెబుతోంది.

అలాగే ఆంధ్రప్రదేశ్ రాష్ట్ర విపత్తుల నిర్వహణ సంస్థ తుపాను తరువాత తీసుకోవాల్సిన కొన్ని ముఖ్యమైన జాగ్రత్తలు తెలియజేసింది.

• వేడిచేసిన లేదా క్లోరినేటెడ్ నీరు మాత్రమే త్రాగాలి.

• అధికారికంగా సమాచారం వచ్చేవరకు బయటకు వెళ్లవద్దు, మిమ్మల్ని షెల్టర్, ఆశ్రయం లొ ఉంచినట్లయితే అధికారులు చెప్పేవరకు తిరిగి వెళ్ళవద్దు.

• విరిగిన విద్యుత్ స్తంభాలు, వదులుగా ఉండే తీగలు, తెగిన తీగలు మరియు ఇతర పదునైన వస్తువుల నుండి జాగ్రత్తలు తీసుకోండి.

• దెబ్బతిన్న,పడిపోయిన భవనాల్లోకి ప్రవేశించవద్దు.

• దెబ్బతిన్న విద్యుత్ పరికరాలను/వస్తువులను వాడే ముందు వాటిని ఎలక్ట్రీషియన్ చేత తనిఖీ చేయించండి.

అలాగే ఆరోగ్య శాఖ మంత్రి సత్యకుమార్ యాదవ్ ఎన్టీఆర్ జిల్లా కలెక్టరేట్​ లోని కమాండ్ కంట్రోల్ రూమ్‌లో మొంథా తుఫాన్ ప్రభావంపై సమీక్షా సమావేశం నిర్వహించాను. అధికారుల నుంచి ఎప్పటికప్పుడు తాజా పరిస్థితులు తెలుసుకున్నాను. క్షేత్ర స్థాయిలో పరిస్థితులను, ప్రజలకు అందిస్తున్న సేవలను గురించి ఆరా తీశాను అంటూ తన ఎక్స్ ఖాతాలో పోస్ట్ చేశారు.