ఏపీలో యూఏఈ ఫుడ్ క్లస్టర్ ఏర్పాటు
ఆంధ్రప్రదేశ్లో ఆహార ప్రాసెసింగ్ రంగాన్ని అంతర్జాతీయ స్థాయికి తీసుకెళ్లే దిశగా కీలక పరిణామం చోటుచేసుకుంది. యునైటెడ్ అరబ్ ఎమిరేట్స్ (యూఏఈ) ఆర్థిక, పర్యాటక శాఖ మంత్రి అబ్దుల్లా బిన్ తూక్ అల్ మర్రీ బుధవారం అమరావతిలో రాష్ట్ర సచివాలయంలో ముఖ్యమంత్రి నారా చంద్రబాబు నాయుడిని కలిశారు. ఈ సందర్భంగా ఆంధ్రప్రదేశ్లో యూఏఈ ఫుడ్ క్లస్టర్ ఏర్పాటు, ఆహార ప్రాసెసింగ్ రంగంలో విలువ గొలుసు (వాల్యూ చైన్) అభివృద్ధి తదితర అంశాలపై విస్తృతంగా చర్చించినట్లు అధికారిక ప్రకటన తెలిపింది.
ఈ ఏడాది ప్రారంభంలో స్విట్జర్లాండ్లోని దావోస్లో జరిగిన ప్రపంచ ఆర్థిక వేదిక వార్షిక సమావేశానికి సీఎం చంద్రబాబు నాయుడు హాజరైన సందర్భంగా యూఏఈ ప్రతినిధులతో సమావేశమయ్యారు. అప్పుడే ఆంధ్రప్రదేశ్లో ఫుడ్ క్లస్టర్ ఏర్పాటు చేయాలనే ఆసక్తిని యూఏఈ వ్యక్తం చేసింది. ఆ చర్చలకు కొనసాగింపుగా ఇప్పుడు రెండు పక్షాలు ప్రాజెక్టు అమలుపై ముందడుగు వేసినట్లు వెల్లడైంది.
ఈ ప్రాజెక్టు కోసం ఆంధ్రప్రదేశ్ ప్రభుత్వం, యునైటెడ్ అరబ్ ఎమిరేట్స్ మధ్య భాగస్వామ్యం ఏర్పడింది. రాష్ట్రంలో ఆహార ప్రాసెసింగ్ రంగానికి సమగ్ర విలువ గొలుసును అభివృద్ధి చేయడం ద్వారా వ్యవసాయ ఉత్పత్తులకు అంతర్జాతీయ మార్కెట్లలో మెరుగైన అవకాశాలు కల్పించడమే దీని ప్రధాన లక్ష్యంగా పేర్కొన్నారు.
ఈ వాల్యూ చైన్ ద్వారా రాష్ట్రంలో పండే మామిడి, అరటి, కోకోతో పాటు ఇతర ఉద్యానవన పంటలను ప్రాసెసింగ్ చేసి విదేశీ మార్కెట్లకు ఎగుమతి చేసే అవకాశాలు మరింత విస్తరించనున్నాయి. దీనివల్ల రైతులకు మెరుగైన గిట్టుబాటు ధరలు లభించడంతో పాటు ఆహార ప్రాసెసింగ్ పరిశ్రమల్లో పెట్టుబడులు, ఉపాధి అవకాశాలు కూడా పెరిగే అవకాశం ఉందని అధికారులు భావిస్తున్నారు. ఈ సమావేశంలో రాష్ట్ర పరిశ్రమల శాఖ మంత్రి టీజీ భరత్, యూఏఈ ప్రతినిధి బృందం సభ్యులు, ఆహార ప్రాసెసింగ్ శాఖ, పరిశ్రమల శాఖ, ఆర్థికాభివృద్ధి మండలి (ఈడీబీ) ఉన్నతాధికారులు పాల్గొన్నారు.
కాగా, దావోస్ పర్యటనలో ముఖ్యమంత్రి చంద్రబాబు నాయుడు 15కు పైగా ప్రముఖ అంతర్జాతీయ సంస్థల ప్రతినిధులతో సమావేశమై రాష్ట్రంలో పెట్టుబడులకు అనుకూల వాతావరణం, పారిశ్రామిక విధానాలను వివరించారు. ఔషధాలు, వైద్య పరికరాలు, సాంకేతిక వస్త్రాలు, రైల్వే విడిభాగాల తయారీ వంటి రంగాల్లో పెట్టుబడులు పెట్టాలని ఆయా సంస్థలను ఆహ్వానించారు. ఇప్పుడు యూఏఈ ఫుడ్ క్లస్టర్ ప్రతిపాదన అమలు దిశగా అడుగులు పడటం రాష్ట్ర ఆహార ప్రాసెసింగ్ రంగానికి కీలక మైలురాయిగా భావిస్తున్నారు.